ສປປ ລາວ ກັບການແກ້ໄຂບັນຫາຂາດສານອາຫານຊຳເຮື້ອ

ຕະຫຼອດໄລຍະຜ່ານມາ, ພັກ-ລັດ ໄດ້ສຸມໃສ່ຊີ້ນຳ-ນຳພາໂຄງການຄໍ້າປະກັນສະບຽງອາຫານ ແລະ ການໃຫ້ຄວາມຮູ້ທາງດ້ານໂພຊະນາການ, ນະໂຍບາຍເກີດລູກ ແລະ ປີ່ນປົວເດັກນ້ອຍລຸ່ມ 5 ປີບໍ່ເສຍຄ່າ, ທັງປະຕິບັດກິດຈະກໍາເຊື່ອມສານວຽກງານສົ່ງເສີມສຸຂະພາບໃນຊຸມຊົນ ແລະວຽກງານຮັກສາສຸຂະພາບຂັ້ນຕົ້ນດ້ານໂພຊະນາການ. ຊຶ່ງປະກອບມີຫຼາຍແຜນງານທີ່ໄດ້ຈັດຕັ້ງປະຕິບັດຜ່ານມາແລ້ວ, ເພື່ອບັນລຸເປົ້າໝາຍຄໍ້າປະກັນສະບຽງອາຫານ ແນໃສ່ແກ້ບັນຫາ ແລະຫຼຸດຜ່ອນການຂາດສານອາຫານຊຳເຮື້ອ.

ຫຼ້າສຸດກໍໄດ້ມີການຈັດກອງປະຊຸມແຫ່ງຊາດດ້ານໂພຊະນາການ ຄັ້ງທີ VII ແລະ ກອງປະຊຸມແຫ່ງຊາດດ້ານໂພຊະນາການປະຈຳປີ 2021 ເມື່ອວັນທີ 16 ກຸມພາ 2022 ທີໂຮງແຮມຄຣາວພລາ ຊາ, ໂດຍເປັນປະທານຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ ປະທານຄະນະກຳມາທິການໂພຊະນາການແຫ່ງຊາດ, ທ່ານ ສະໜອງ ທອງຊະນະ ຮອງລັດຖະມົນຕີກະຊວງສາທາລະນະສຸກ ຫົວໜ້າກອງເລຂາຄະນະກຳມະການແຫ່ງຊາດດ້ານໂພຊະນາການ, ມີເອກອັກຄະລັດຖະທູດສະຫະພາບຢຸໂຣປ ປະຈຳ ສປປ ລາວ, ເອກອັກຄະລັດຖະທູດສະຫະລັດອະເມຣິກາ ປະຈຳ ສປປ ລາວ, ຜູ້ຕາງໜ້າອົງການຢູນິເຊຟ ປະຈຳ ສປປ ລາວ, ບັນດາຄະນະກໍາມະການແຫ່ງຊາດດ້ານໂພຊະນາການຂັ້ນສູນກາງ, ຮອງເຈົ້າແຂວງ, ກອງເລຂາຄະນະກໍາມະການແຫ່ງຊາດດ້ານໂພຊະນາການສູນກາງ, ແຂວງ ແລະ ຂະແໜງການກ່ຽວຂ້ອງ ເຂົ້າຮ່ວມ.

    ​ໂດຍທ່ານ ກິແກ້ວ ໄຂຄຳພິທູນ, ໄດ້ຍົກໃຫ້ເຫັນການຈັດຕັ້ງປະຕິບັດຍຸດທະສາດ ແລະແຜນປະຕິບັດງານແຫ່ງຊາດດ້ານໂພຊະນາການ ແລະຫຼຸດຜ່ອນສະພາບການຂາດສານອາຫານຊຳເຮື້ອ, ໜຶ່ງໃນນັ້ນກໍແມ່ນການສະໜອງອາຫານເສີມໄລຍະ 52 ວັນ ໃຫ້ເດັກລຸ່ມ 5 ປີໃນເມືອງນອງ ແຂວງສະຫວັນນະເຂດ ຊຶ່ງມີ 365 ຄົນ ໃນ 6 ບ້ານ ແລະ ເມືອງຊ່ອນ ແຂວງຫົວພັນ ມີ 360 ຄົນ ໃນ 6 ບ້ານ.

ເຖິງແມ່ນວ່າລັດຖະບານໄດ້ມີການລົງທຶນໃສ່ດ້ານໂພຊະນາການເພື່ອພັດທະນາຊັບພະຍາກອນມະນຸດແບບມີຄຸນະພາບ ແລະ ມີຄວາມຍືນຍົງໃນ ສປປ ລາວ, ຊຶ່ງສາມາດແກ້ໄຂບັນຫາດ້ານໂພຊະນາການໄດ້ໃນລະດັບໃດໜຶ່ງ. ຢ່າງໃດກໍຕາມ,ມາຮອດປັດຈຸບັນກໍຍັງມີເດັກນ້ອຍລາວ 1 ໃນ 3 ຄົນ ຫຼື ເກືອບ 3 ແສນຄົນ ຍັງສ່ຽງຕໍ່ການຂາດສານອາຫານ,ຊຶ່ງຈະສົ່ງຜົນກະທົບຕໍ່ພັດທະນາການດ້ານຮ່າງກາຍ ແລະມັນສະໝອງເພາະການຂາດສານອາຫານຊໍາເຮື້ອແບບລວງສູງບໍ່ໄດ້ມາດຕະຖານ,ນໍ້າໜັກບໍ່ໄດ້ມາດຕະຖານ ແລະ ການຂາດອາຫານກະທັນຫັນ ອັນເກີດຈາກຄວາມບໍ່ໝັ້ນຄົງໃນການຄໍ້າປະກັນສະບຽງອາຫານ, ສະພາບດິນຟ້າອາກາດປ່ຽນແປງ, ໄພພິບັດທາງທຳມະຊາດ, ພຶດຕິກໍາການບໍລິໂພກອາຫານທີ່ບໍ່ຫຼາກຫຼາຍພຽງພໍ, ນອກນັ້ນຍັງພົບວ່າປະຊາຊົນເກີດບັນຫາໂພຊະນາການເກີນ ແລະ ຕຸ້ຍທັງໃນເດັກ ແລະ ຜູ້ໃຫຍ່ເພີ່ມຂຶ້ນຈາກພຶດຕິກຳໃນການບໍລິໂພກອາຫານທີ່ບໍຖືກຫຼັກໂພຊະນາການຊຶ່ງຈະພາໃຫ້ເກີດພະຍາດເບົາຫວານ, ຫົວໃຈ, ຄວາມດັນ ເລືອດສູງ ແລະ ມະເຮັງລໍາໄສ້.

ບັນຫາສຸຂະພາບອັບເກີດຈາກການຂາດສານອາຫານຊຳເຮື້ອ ແລະ ບັນຫາໂພຊະນາການເກີນ ຈະກໍ່ໃຫ້ເກີດຄວາມສູນເສຍດ້ານເສດຖະກິດ ແລະ ສັງຄົມ. ດັ່ງນັ້ນ ຈິ່ງຖືເປັນພາລະກິດທີ່ໜັກໜ່ວງ, ໂດຍລັດຖະບານ ແຫ່ງ ສປປ ລາວ ຕ້ອງໄດ້ຮ່ວມມືກັບຫຼາຍຝ່າຍ ເພື່ອຈະເຮັດໃຫ້ການລົງທຶນດ້ານໂພຊະນາການ, ພັດທະນາມະນຸດທີ່ມີຄຸນະພາບ ແລະ ຍືນຍົງ ປາກົດຜົນເປັນຈິງ. ທັງນີ້, ກໍເພື່ອຮັບປະກັນໃຫ້ລູກຫຼານ ກໍຄືປະຊາຊົນລາວ ມີໂພຊະນາການທີ່ດີຂຶ້ນ, ເພື່ອເປັນກໍາລັງແຮງໃນການປົກປັກຮັກສາ ແລະ ສ້າງສາພັດທະນາປະເທດຊາດໃນຕໍ່ໜ້າ.

ຂະນະທີ່ຮອງລັດຖະມົນຕີກະຊວງສາທາລະນະສຸກ, ກໍໄດ້ຮຽກຮ້ອງໃຫ້ຄະນະກໍາມະການແຫ່ງຊາດດ້ານໂພຊະນາການທັງສູນກາງ, ທ້ອງຖິ່ນ, ກອງເລຂາຜູ້ແທນພາຍໃນ ແລະ ຕ່າງປະເທດ, ຈົ່ງພ້ອມກັນເຊີດຊູຄວາມຮັບຜິດຊອບສູງໃນການຄົ້ນຄວ້າ ແລະ ປະກອບຄໍາເຫັນຢ່າງຕັ້ງໜ້າ ເພື່ອແກ້ໄຂທຸກຮູບແບບຂອງການຂາດສານອາຫານທີ່ຈະເກີດຂຶ້ນກັບເດັກນ້ອຍໃນ ສປປ ລາວ ໃນຊຸມປີຕໍ່ໜ້າໃຫ້ມີການຫັນປ່ຽນ. ໃນນັ້ນ, ແມ່ນຕ້ອງປະຕິບັດແຜນຈັດຕັ້ງປະຕິບັດວຽກງານແຫ່ງຊາດດ້ານໂພຊະນາການ ຮອດປີ 2025 ຢ່າງຄົບຖ້ວນສົມບູນ.

แชร์