ອຄ ແລະ ພາກທຸລະກິດ ຮ່ວມຊູນະໂຍບາຍສົ່ງເສີມສິນຄ້າລາວ

ໂດຍປະຕິບັດຕາມທິດຊີ້ນໍາຂອງລັດຖະບານ ໃນການສົ່ງເສີມການຜະລິດ ແລະ ການຊົມໃຊ້ຜະລິດຕະພັນພາຍໃນ. ດັ່ງນັ້ນ, ກົມສົ່ງເສີມການຄ້າ ຈິ່ງໄດ້ຮ່ວມມືກັບພາກທຸລະກິດ ໃນການນຳເອົາຜົນຜະລິດຂອງຊາວກະສິກຳ ແລະ ຊາວຊ່າງຫັດຖະກຳລາວ ເຂົ້າຈຳໜ່າຍໃນຮ້ານຊັບພະສິນຄ້າ, ທັງນີ້ ຮ້ານມິນິບິກຊີ ກໍໄດ້ຮ່ວມໂຄງການສົ່ງເສີມສິນຄ້າລາວ ໂດຍການໂຄສະນາ ແລະ ນຳເອົາສິນຄ້າລາວເຂົ້າໄປຂາຍຢູ່ໃນນັ້ນ.

ກົມສົ່ງເສີມການຄ້າ, ກະຊວງອຸດສາຫະກໍາ ແລະ ການຄ້າ (ອຄ) ໄດ້ຈັດປະຊຸມເຜີຍແຜ່ນະໂຍບາຍສົ່ງເສີມສິນຄ້າລາວເຂົ້າສູ່ຕະຫຼາດພາຍໃນ ແລະ ຕ່າງປະເທດ. ວາລະດັ່ງກ່າວມີຂຶ້ນເມື່ອວັນທີ 16 ກຸມພາ 2022 ຢູ່ໂຮງແຮມ QUBE ນະຄອນຫຼວງວຽງຈັນ, ໂດຍເປັນປະທານຂອງ ທ່ານ ໄຊສົມເພັດ ນໍລະສິງ ຫົວໜ້າກົມສົ່ງເສີມການຄ້າ, ມີຕາງໜ້າຈາກບັນດາບໍລິສັດ, ຜູ້ປະກອບການທຸລະກິດ ແລະ ພາກສ່ວນກ່ຽວຂ້ອງເຂົ້າຮ່ວມ.

ທັງນີ້, ຫົວໜ້າກົມສົ່ງເສີມການຄ້າ ໄດ້ກ່າວວ່າ: ເພື່ອເຮັດໃຫ້ແຜນງານດັ່ງກ່າວມີປະສິດທິຜົນ, ຊຶ່ງໄລຍະຜ່ານມາກໍໄດ້ມີການສ້າງໂຄງການຮ່ວມມືລະຫວ່າງພາກລັດ ແລະ ພາກເອກະຊົນ ໂດຍໄດ້ເຊັນບົດບັນທຶກຮ່ວມກັນລະຫວ່າງກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ ກັບບໍລິສັດ ເອັມພອຍມາຣ໌ທ ການຄ້າ ຈໍາກັດ (ຮ້ານມິນິບິກຊີ) ແລະ ບໍລິສັດວຽງຈັນເຊັນເຕີ,ເປົ້າໝາຍກໍເພື່ອຮ່ວມມືພັດທະນາ ແລະ ຊຸກຍູ້ສົ່ງເສີມສິນຄ້າລາວເຂົ້າສູ່ຕະຫຼາດພາຍໃນ ແລະ ຕ່າງປະເທດ, ເພື່ອກະຕຸ້ນໃຫ້ຜູ້ຜະລິດ ແລະ ຜູ້ປະກອບການພາຍໃນ ໄດ້ຜະລິດສິນຄ້າທີ່ມີຄຸນນະພາບ, ມີມາດຕະຖານ ແລະ ເພີ່ມປະລິມານສີນຄ້າໃໝ່ໆຫຼາຍຂຶ້ນ. ທີ່ສໍາຄັນແມ່ນເພື່ອສ້າງຄວາມໝັ້ນໃຈແກ່ຜູ້ບໍລິໂພກໃນດ້ານຄວາມປອດໄພ.

​ໃນກອງປະຊຸມຄັ້ງນີ້, ແມ່ນໄດ້ແນະນຳຫົວໜ່ວຍທຸລະກິດທີ່ມີຄວາມພ້ອມ ແລະ ສົນໃຈ ໃຫ້ມີຄວາມເຂົ້າໃຈຕື່ມກ່ຽວມາດຕະຖານ ແລະ ເງື່ອນໄຂຂອງສິນຄ້າທີ່ຈະນໍາໄປຂາຍຢູ່ໃນຮ້ານຊັບພະສິນຄ້າ ມິນິບິກຊີ ໃນນະຄອນຫຼວງວຽງຈັນ, ຊຶ່ງມີທັງໝົດ 62 ສາຂາ.

แชร์