ໝົດສິ້ນແລ້ວ ປ່າຂ່າໃນລຳນໍ້າຂອງລາວ

ປາຂ່າ ຫຼື ໂລມາອີຣະວະດີ ໂຕສຸດທ້າຍໃນລຳນໍ້າຂອງເຂດຊາຍແດນລາວ-ກຳປູເຈຍ, ຖືກພົບເປັນສົບຕັ້ງແຕ່ວັນທີ 15 ກຸມພາ 2022. ທັງນີ້, ອົງການກອງທຶນອະນຸຮັກສັດປ່າໂລກ (WWF)ປະຈຳລາວ ໄດ້ລະບຸໃນເວ໊ບໄຊຕ໌ທາງການວ່າ “ການຕາຍຂອງປາຂ່າໂຕນີ້ ສະແດງອອກເຖິງການສູນພັນລະດັບຊາດສຳລັບປະເທດລາວ”.

ຂ່າວເສົ້ານີ້ ໄດ້ຊ້ຳເຕີມຄຳປະກາດທີ່ວ່າ ປາຂ່າ “ສູນພັນຕາມທຳມະຊາດ” (functionally extinct: ໝາຍເຖິງການທີ່ມີສະມາຊິກໃນທຳມະຊາດບໍ່ພຽງພໍທີ່ຈະຜະລິດປະຊາກອນຮຸ່ນຕໍ່ໄປໄດ້) ຕັ້ງແຕ່ປີ 2016, ຊຶ່ງຕອນນັ້ນ ມີປາຂ່າໃນເຂດຊາຍແດນລາວ-ກຳປູເຈຍ ເຫຼືອພຽງ 3 ໂຕ. ສ່ວນໃນນໍ້າຂອງເຂດກຳປູເຈຍມີປາຂ່າເຫຼືອປະມານ 89 ໂຕ (ອີງຕາມກາມສຳຫຼວດເມື່ອປີ 2020).

ໃນລາຍງານຊຶ່ງອ້າງຂໍ້ມູນຂອງ PhnomPenh Post, ລະບຸວ່າ: ປາຂ່າໂຕນີ້ຖືກພົບວ່າເສຍຊີວິດຢູ່ໃກ້ກັບຕາຝັ່ງບໍລິເວນທີ່ມັນອາໄສຢູ່. ປາຂ່າໂຕນີ້ອາດຈະຕາຍເພາະບໍ່ສາມາດທົນຕໍ່ບາດແຜຍ້ອນໄດ້ຮັບບາດເຈັບຈົນມີອາການປ່ວຍ.

ຂະນະທີ່ ທ່ານ Srey Sam Vichet ຫົວໜ້າອົງການປະມົງແຂວງ Stung Treng ຂອງກຳປູເຈຍ, ກໍຄາດຄະເນວ່າ: ປ່າຂ່າໂຕນີ້ ອາດຕາຍຈາກບາດແຜທີ່ເກີດຈາກມອງຫາປາ. ຢ່າງໃດກໍຕາມ, ຍັງຈະຕ້ອງມີການສືບສວນ ແລະ ຊັນນະສູດຊາກສົບເພີ່ມ, ກ່ອນທີ່ຈະໄດ້ຂໍ້ສະຫຼຸບເຖິງສາເຫດທີ່ແທ້ຈິງ.

ກ່ຽວກັບເລື່ອງນີ້, ທ່ານ Lan Mercado ຜູ້ອຳນວຍການອົງການ WWF ປະຈຳເອເຊຍ-ແປຊີຟິກ, ກໍໄດ້ສະແດງຄວາມເສຍໃຈເປັນຢ່າງຍິ່ງຕໍ່ການຕາຍຂອງປາຂ່າໂຕສຸດທ້າຍທີ່ພວກເຮົາຮູ້ຈັກໃນອ່າງນໍ້າຂອງເຂດຊາຍແດນ ລາວ-ກຳປູເຈຍ. ຊຶ່ງຈຳນວນຂອງປາຂ່າໃນອ່າງນໍ້າຂອງແມ່ນຫຼຸດລົງຕ່ຳທີ່ສຸດໃນບໍ່ເທົ່າໃດປີທີ່ຜ່ານມາເນື່ອງຈາກໄພຄຸກຄາມຫຼາຍຢ່າງ, ລວມທັງໂຄງການພັດທະນາທີ່ໄດ້ສ້າງການລົບກວນຕໍ່ກະແສນໍ້າ, ການຈົມນໍ້າຕາຍຈາກການຕິດຢູ່ໃນມອງຫາປາ ແລະ ການນຳໃຊ້ວິທີຫາປາແບບດັບສູນ ເຊັ່ນ: ໃຊ້ໄຟຟ້າຊ໊ອດ ຫຼື ການຫາປາທີ່ຫຼາຍເກີນໄປ.

ສຳລັບປາຂ່າທີ່ຕາຍລົງນີ້ ມີອາຍຸ 25 ປີ, ເພດຜູ້, ມີຄວາມຍາວລໍາໂຕ 260 ຊັງຕີແມັດ ແລະ ໜັກ 110 ກິໂລກຣາມ.

ຂອບໃຈຂໍ້ມູນຈາກເພຈ: muan.la,

ຮູບພາບຈາກເພຈ: ທ່ຽວຢູ່ລາວ Stay in Laos)

แชร์