ທາບທາມຄໍາເຫັນໃສ່ຮ່າງກົດໝາຍ ວ່າດ້ວຍຄວາມປອດໄພຂອງເຂື່ອນ

ນີ້ເປັນການຂໍຄໍາເຫັນນໍາຜູ້ຕາງໜ້າຈາກບັນດາກະຊວງ ແລະ ພາກສ່ວນທີ່ກ່ຽວຂ້ອງອ້ອມຂ້າງສູນກາງ, ໃສ່ຮ່າງກົດໝາຍວ່າດ້ວຍຄວາມປອດໄພຂອງເຂື່ອນ, ຊຶ່ງເປັນຮ່າງກົດໝາຍສ້າງຂຶ້ນໃໝ່, ພາຍຫຼັງທີ່ໄດ້ທາບທາມ ແລະ ຂໍຄໍາເຫັນຈາກພະແນກພະລັງງານ ແລະ ບໍ່ແຮ່ ໃນແຕ່ລະແຂວງ ທົ່ວປະເທດມາແລ້ວ 2 ຄັ້ງ. ທັງນີ້, ກໍເພື່ອເຮັດໃຫ້ເນື້ອໃນຂອງຮ່າງກົດໝາຍສະບັບນີ້ເໝາະສົມ, ຮັດກຸມ ແລະ ຄົບຖ້ວນຂຶ້ນກວ່າເກົ່າ, ກ່ອນທີ່ຈະນຳເຂົ້າຜ່ານກອງປະຊຸມສະໄໝສາມັນ ເທື່ອທີ 3 ຂອງສະພາແຫ່ງຊາດ ຊຸດທີ IX ທີ່ຈະຈັດຂຶ້ນໃນອີກບໍ່ດົນ.

ໂດຍກະຊວງພະລັງງານ ແລະ ບໍ່ແຮ່, ໄດ້ຈັດກອງປະຊຸມທາບທາມປະກອບຄໍາເຫັນໃສ່ຮ່າງກົດໝາຍ ວ່າດ້ວຍຄວາມປອດໄພຂອງເຂື່ອນ ຄັ້ງທີ 3 ໃນວັນທີ 17 ກຸມພາ 2022 ທີ່ຫໍປະຊຸມແຫ່ງຊາດ, ນະຄອນຫຼວງວຽງຈັນ ພາຍໃຕ້ການເປັນປະທານຮ່ວມຂອງ ທ່ານ ນາງ ຈັນສະຫວາດ ບຸບຜາ, ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທັງເປັນຫົວໜ້າຄະນະຊີ້ນໍາລວມການສ້າງຮ່າງກົດໝາຍດັ່ງກ່າວ ແລະ ທ່ານ ສີນາວາ ສຸພານຸວົງ ຮອງລັດຖະມົນຕີກະຊວງພະລັງງານ ແລະ ບໍ່ເເຮ່.

ທ່ານ ນາງ ຈັນສະຫວາດ ບຸບຜາ ໃຫ້ຮູ້ວ່າ: ປັດຈຸບັນ, ສປປ ລາວ ມີເຂື່ອນໄຟຟ້າ 88 ແຫ່ງ ແລະ ບໍ່ແຮ່ອີກ 10 ແຫ່ງ. ນັບແຕ່ໄດ້ສ້າງຕັ້ງ ກະຊວງພະລັງງານ ແລະ ບໍ່ແຮ່ ໃນ ປີ 2006, ລັດຖະບານ ກໍໄດ້ປັບປຸງກົດໝາຍວ່າດ້ວຍໄຟຟ້າ ແລະ ກົດໝາຍວ່າດ້ວຍແຮ່ທາດ, ທັງສ້າງນິຕິກໍາໃຕ້ກົດໝາຍໄດ້ຫຼາຍກວ່າ 86 ສະບັບ, ເພື່ອນໍາໃຊ້ສົ່ງເສີມ ແລະ ຄຸ້ມຄອງການລົງທຶນຂະແໜງພະລັງງານ ແລະ ບໍ່ແຮ່ ເປັນອັນສະເພາະ; ແຕ່ວ່າໃນໄລຍະຜ່ານມາ, ບັນດາກົດໝາຍ ແລະ ນິຕິກໍາທີ່ນໍາໃຊ້ຄຸ້ມຄອງຄວາມປອດໄພຂອງເຂື່ອນຢູ່ ສປປ ລາວ ຍັງມີໜ້ອຍ ແລະ ບໍ່ທັນເໝາະສົມກັບສະພາບການຂອງໂລກປັດຈຸບັນ ທີ່ມີໄພທໍາມະຊາດເກີດຂຶ້ນຫຼາຍ ແລະ ນັບມືຮ້າຍແຮງ, ນິຕິກໍາທີ່ມີຢູ່ກໍຍັງມີລັກສະນະສົ່ງເສີມການລົງທຶນ ແຕ່ບໍ່ທັນເວົ້າເຖິງຄວາມປອດໄພເທົ່າທີ່ຄວນ, ຂະນະທີ່ການຈັດຕັ້ງປະຕິບັດ ແລະ ບັງຄັບໃຊ້ກົດໝາຍ ຫຼື ນິຕິກໍາກໍຍັງບໍ່ທັນແຂງແຮງ. ການແບ່ງຂັ້ນຄຸ້ມຄອງ ແລະ ຄວາມຮັບຜິດຊອບໃຫ້ພາກສ່ວນຕ່າງໆທີ່ກ່ຽວຂ້ອງໃນດ້ານຄວາມປອດໄພຂອງເຂື່ອນ ກໍຍັງບໍ່ທັນຈະແຈ້ງ ແລະ ບໍ່ທັນລະອຽດ ແລະ ບັນຫາອື່ນໆ. ດັ່ງນັ້ນ, ໃນປີ 2020 ລັດຖະບານ ຈິ່ງໄດ້ຕົກລົງສ້າງກົດໝາຍວ່າດ້ວຍຄວາມປອດໄພຂອງເຂື່ອນ, ຊຶ່ງແມ່ນໜຶ່ງໃນບັນດາກົດໝາຍທີ່ນອນຢູ່ໃນແຜນການສ້າງຂອງລັດຖະບານ ແຕ່ປີ 2021-2025 ເພື່ອກາຍເປັນເຄື່ອງມືສໍາຄັນ ແລະ ມີປະສິດທິຜົນກວ່າເກົ່າ ໃນການຄຸ້ມຄອງເຂື່ອນທຸກປະເພດໃນ ສປປ ລາວ.

ສໍາລັບຮ່າງກົດໝາຍວ່າດ້ວຍຄວາມປອດໄພຂອງເຂື່ອນ ປະກອບມີ XII ພາກ, 88 ມາດຕາ. ຜ່ານມາໄດ້ຈັດກອງປະຊຸມທາບທາມປະກອບຄໍາເຫັນຈາກຕາງໜ້າພະແນກພະລັງງານ ແລະ ບໍ່ແຮ່ ແຕ່ລະແຂວງທົ່ວປະເທດ ມາແລ້ວ 2 ຄັ້ງ (ຄັ້ງທີ 1 ຈັດຂຶ້ນໃນວັນທີ 19 ມັງກອນ 2022 ແລະ ຄັ້ງທີ 2 ຈັດຂຶ້ນໃນວັນທີ 26 ມັງກອນ 2022).

แชร์