ຕິດເຊື້ອໂຄວິດ-19 ທົ່ວໂລກຫຼຸດລົງ ແຕ່ຕົວເລກການຕາຍຄົງທີ່

ຈຳນວນຜູ້ຕິດເຊື້ອໂຄວິດ-19 ກໍລະນີໃໝ່ໃນທົ່ວໂລກເມື່ອສັບປະດາຜ່ານມາ ມີປະມານ 16 ລ້ານຄົນ, ຊຶ່ງຫຼຸດລົງປະມານ 19%. ຂະນະທີ່ຈໍານວນຜູ້ເສຍຊີວິດຍັງຄົງຢູ່ໃນລະດັບຄົງທີ່ປະມານ 75 ພັນລາຍ.

​ສຳນັກຂ່າວຕ່າງປະເທດໄດ້ລາຍງານໃນວັນທີ 17 ກຸມພາ 2022 ໂດຍອ້າງການເປີດເຜີຍຂອງອົງການອະນາໄມໂລກ (WHO) ທີ່ລະບຸວ່າ: ແປຊິຟິກຕາເວັນຕົກ, ເປັນພຽງພູມີພາກດຽວທີ່ມີລາຍງານການຕິດເຊື້ອເພີ່ມຂຶ້ນໃນສັບປະດາທີ່ຜ່ານມາ ປະມານ 19%, ຂະນະທີ່ເອເຊຍຕາເວັນອອກສຽງໃຕ້ ແມ່ນມີລາຍງານຜູ້ຕິດເຊື້ອໃໝ່ຫຼຸດລົງ 37% ຊຶ່ງຖືວ່າເປັນການຫຼຸດລົງຫຼາຍທີ່ສຸດເມື່ອທຽບກັບພູມີພາກອື່ນໆ. ສ່ວນຈໍານວນຜູ້ເສຍຊີວິດຊ້ໍາພັດເພີ່ມຂຶ້ນ 38% ໃນຕາເວັນອອກກາງ.

​ປະເທດທີ່ມີຜູ້ຕິດເຊື້ອໃໝ່ເພີ່ມຂຶ້ນຫຼາຍທີ່ສຸດຄື ຣັສເຊຍ, ຊຶ່ງຈຳນວນຜູ້ຕິດເຊື້ອໃນຣັສເຊຍ ແລະ ພື້ນທີ່ອື່ນໆຂອງຢຸໂຣປຕາເວັນອອກ ແມ່ນເພີ່ມຂຶ້ນ 2 ເທົ່າໃນໄລຍະບໍ່ເທ່ົາໃດສັບປະດາຜ່ານມາ, ອັນເປັນຜົນມາຈາກການລະບາດຂອງໂຄວິດ-19 ສາຍພັນກາຍພັນ ໂອມິຄຣອນ.

​ໂດຍອົງການອະນາໄມໂລກ, ໃຫ້ຮູ້ຕື່ມວ່າ: ໄວຣັສກາຍພັນສາຍພັນອື່ນໆ ບໍ່ວ່າຈະເປັນ ອັລຟາ, ເບຕາ ແລະ ເດລຕາ ມີສະຖິຕິຫຼຸດລົງທົ່ວໂລກ, ຂະນະທີ່ເຊື້ອກາຍພັນ ໂອມິຄຣອນ ໄດ້ກ້າວຂຶ້ນແຊງໜ້າໄວຣັສກາຍພັນທຸກຕົວໄປເປັນທີ່ຮຽບຮ້ອຍແລ້ວ ຊຶ່ງສູງເຖິງ 98% ຂອງຈຳນວນທີ່ມີລາຍງານເຂົ້າມາໃນຖານຂໍ້ມູນເມື່ອສັບປະດາຜ່ານມາ. ສ່ວນໄວຣັສກາຍພັນ ໂອມິຄຣອນ ສາຍພັນຍ່ອຍ BA.2ກໍພວມແພ່ລະບາດເພີ່ມຂຶ້ນຢ່າງໄວວາ ແລະ ພົບເຫັນການລະບາດໄດ້ທົ່ວໄປໃນແອຟຣິກາໃຕ້, ເດນມາຣ໌ກ, ອັງກິດ ແລະ ອີກຫຼາຍປະເທດ.

​ຢ່າງໃດກໍຕາມ, ອາການຂອງຜູ້ຕິດເຊື້ອ ໂອມິຄຣອນ ຍັງຢູ່ໃນລະດັບຕໍ່າເມື່ອທຽບກັບໄວຣັສກາຍພັນກ່ອນໜ້ານີ້. ຂະນະທີ່ປະເທດຊຶ່ງມີອັດຕາການສັກວັຄຊີນສູງ, ເມື່ອເບິ່ງໄປທີ່ສະຖິຕິການເຂົ້າປິ່ນປົວໃນໂຮງໝໍ ແລະການເສຍຊີວິດກໍບໍ່ໄດ້ເພີ່ມຂຶ້ນຢ່າງມີໄນສຳຄັນເຖິງແມ່ນວ່າຈະເກີດການລະບາດສູງ.

แชร์