ລາວ-ກຳປູເຈຍ ເພີ່ມທະວີຄວາມຮ່ວມມືພັດທະນາຮອບດ້ານ

ໂດຍຕອບສະໜອງຕາມຄຳເຊີນຂອງ ທ່ານ ປຣາກ ໂຊຄົນ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ແຫ່ງ ຣາຊະອານາຈັກກຳປູເຈຍ, ຊຶ່ງທ່ານ ສະເຫຼີມໄຊ ກົມມະສິດ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ພ້ອມດ້ວຍຄະນະ, ກໍໄດ້ເດີນທາງຢ້ຽມຢາມຣາຊະອານາຈັກກຳປູເຈຍ ຢ່າງເປັນທາງການ ແລະ ເຂົ້າຮ່ວມກອງປະຊຸມລັດຖະມົນຕີຕ່າງປະເທດອາຊຽນແບບວົງແຄບ, ໃນລະຫວ່າງວັນທີ 15-17 ກຸມພາ 2022. ທັງນີ້, ກໍ ເພື່ອຮັດແໜ້ນສາຍພົວພັນມິດຕະພາບ ອັນເປັນມູນເຊື້ອຖານບ້ານໃກ້ເຮືອນຄຽງທີ່ດີຊຶ່ງມີມາແຕ່ດົນນານ ແລະເພີ່ມທະວີການຮ່ວມມືຍຸດທະສາດຮອບດ້ານ, ໝັ້ນຄົງຍາວນານ ລະຫວ່າງສອງປະເທດ ລາວ ແລະ ກຳປູເຈຍ.

ເມື່ອວັນທີ 16 ກຸມພາ 2022, ທີ່ກະຊວງການຕ່າງປະເທດ ແຫ່ງຣາຊະອານາຈັກກຳປູເຈຍ, ລັດຖະມົນຕີກະຊວງການຕ່າງປະເທດ ແຫ່ງ ສປປ ລາວ ແລະ ຄະນະ, ໄດ້ພົບປະສອງຝ່າຍກັບ ຮອງນາຍົກລັດຖະມົນຕີ, ລັດຖະມົນຕີກະຊວງການຕ່າງປະເທດ ແລະ ຮ່ວມມືສາກົນ ແຫ່ງຣາຊະອານາຈັກ ກຳປູເຈຍ. ໃນການພົບປະຄັ້ງນີ້, ສອງຝ່າຍໄດ້ທົບທວນຄືນ ແລະ ຜັນຂະຫຍາຍການຢ້ຽມຢາມທາງການຂອງ ທ່ານນາຍົກລັດຖະມົນຕີ ພັນຄຳ ວິພາວັນ ເມື່ອເດືອນພະຈິກ 2021, ພ້ອມນີ້ ກໍໄດ້ຕີລາຄາສູງຕໍ່ສາຍພົວພັນມິດຕະພາບ ແລະ ການຮ່ວມມືທີ່ເປັນມູນເຊື້ອ ຖານບ້ານໃກ້ເຮືອນຄຽງທີ່ມີມາແຕ່ດົນນານ ລະຫວ່າງປະຊາຊົນສອງຊາດ ລາວ-ກໍາປູເຈຍ ທີ່ນັບມື້ໄດ້ຮັບການເສີມຂະຫຍາຍຂຶ້ນຢ່າງແໜ້ນແຟ້ນ, ພາຍຫຼັງທີ່ໄດ້ຍົກລະດັບການພົວພັນສອງຝ່າຍຂຶ້ນເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານ ໃນປີ 2019 ຜ່ານມາ.

ພິເສດໃນປີຜ່ານມາ, ສອງຝ່າຍໄດ້ຮ່ວມກັນຈັດພິທີສະເຫຼີມສະຫຼອງ ຄົບຮອບ 65 ປີ ແຫ່ງການສ້າງຕັ້ງສາຍພົວພັນການທູດຂອງສອງປະເທດ ຢ່າງມີຂະບວນຟົດຟື້ນ, ເຖິງວ່າຈະມີສະພາບລະບາດຂອງພະຍາດໂຄວິດ-19, ແຕ່ການພົວພັນຮ່ວມມືສອງປະເທດກໍຍັງດຳເນີນຢ່າງເປັນປົກກະຕິ, ການຮ່ວມມືດ້ານການເມືອງຂະຫຍາຍຕົວເປັນກ້າວໆ. ໂດຍການນຳຂັ້ນສູງສອງປະເທດໄດ້ມີການແລກ ປ່ຽນຢ້ຽມຢາມ, ສົນທະນາທາງໂທລະສັບ ແລະ ທາງວິດີໂອ ຢ່າງເປັນປົກກະຕິ. ສິ່ງດັ່ງກ່າວໄດ້ເປັນພື້ນຖານສໍາຄັນ ແລະ ໜັກແໜ້ນໃຫ້ແກ່ການຮ່ວມມືດ້ານອື່ນໆ, ວຽກງານປ້ອງກັນຊາດ-ປ້ອງກັນຄວາມສະຫງົບ, ວຽກງານຕ້ານຢາເສບຕິດ ກໍໄດ້ຮັບຄວາມເອົາໃຈໃສ່ຈາກການນຳສອງປະເທດ, ດ້ານວັດທະນະທຳ-ສັງຄົມ, ການສຶກສາ-ກີລາ, ການຮ່ວມມືລະດັບທ້ອງຖິ່ນ ແມ່ນມີການຂະຫຍາຍຕົວເປັນກ້າວໆ, ມີການສ້າງຕັ້ງແຂວງແຮກສ່ຽວ ລະຫວ່າງ ນະຄອນຫຼວງວຽງຈັນ-ນະຄອນຫຼວງພະນົມເປນ, ແຂວງຈຳປາສັກ ກັບ ແຂວງຊຽມຣຽບ ແລະ ອື່ນໆ; ພົ້ນເດັ່ນແມ່ນການຮ່ວມມືດ້ານເສດຖະກິດ-ການຄ້າ ຊຶ່ງມີທ່ວງທ່າຂະຫຍາຍຕົວຂຶ້ນ, ເປັນຕົ້ນແມ່ນ ການຊື້-ຂາຍໄຟຟ້າ ໄດ້ເລີ່ມຈັດຕັ້ງປະຕິບັດແລ້ວ, ເຮັດໃຫ້ມູນຄ່າການຄ້າສອງຝ່າຍກ້າວກະໂດດຂຶ້ນຢ່າງໄວວາ ຈາກສະເລ່ຍປີລະ 10-20 ລ້ານໂດລາສະຫະລັດ, ກໍເພີ່ມເປັນປີລະ 100 ກວ່າລ້ານໂດລາ ນັບແຕ່ປີ 2020 ເປັນຕົ້ນມາ, ຂະນະທີ່ການລົງທຶນສອງຝ່າຍ ກໍສືບຕໍ່ເພີ່ມຂຶ້ນເລື້ອຍໆ, ຊຶ່ງມາຮອດປັດຈຸບັນ ມີນັກລົງທຶນກຳປູເຈຍມາລົງທຶນຢູ່ລາວປະມານ 30 ບໍລິສັດ, ມູນຄ່າຈົດທະບຽນ 107 ລ້ານໂດລາ ແລະ ນັກລົງທຶນອັນດັບຕົ້ນຂອງລາວ ກໍເຂົ້າໄປລົງທຶນໃນກຳປູເຈຍ ຫຼາຍຂຶ້ນເຊັ່ນກັນ.

ຢ່າງໃດກໍດີ, ສອງກະຊວງການຕ່າງປະເທດ ໄດ້ເຫັນດີສືບຕໍ່ຊຸກຍູ້ຂະແໜງການກ່ຽວຂ້ອງຂອງສອງຝ່າຍໃນການຈັດຕັ້ງປະຕິບັດບົດບັນທຶກຄວາມເຂົ້າໃຈຂອງຄະນະກຳມາທິການຮ່ວມ ວ່າດ້ວຍ ການຮ່ວມມືສອງຝ່າຍ ລາວ-ກໍາປູເຈຍ, ກໍາປູເຈຍ-ລາວ (JC) ຄັ້ງທີ 13 ທີ່ລົງນາມເມື່ອຕົ້ນປີ 2019 ຜ່ານມາ ໃຫ້ເປັນຮູບປະທຳ ແລະ ກະກຽມກອງປະຊຸມ JC ຄັ້ງທີ 14 ທີ່ຝ່າຍກໍາປູເຈຍ ຈະເປັນເຈົ້າພາບ, ສືບຕໍ່ຮ່າງແຜນປະຕິບັດງານຮ່ວມ (Action Plan) ໃຫ້ສໍາເລັດໂດຍໄວ, ສືບຕໍ່ຊຸກຍູ້ໃຫ້ສອງຝ່າຍປຶກສາຫາລືກັນ ເພື່ອໃຫ້ສໍາເລັດວຽກງານປັກຫຼັກໝາຍຊາຍແດນ ລາວ-ກໍາປູເຈຍ ທີ່ຍັງຄົງຄ້າງ, ການຮັກສາຄວາມເປັນລະບຽບຮຽບຮ້ອຍຕາມບໍລິເວນຊາຍແດນຮ່ວມກັນ, ເພີ່ມທະວີການຮ່ວມມືສອງຝ່າຍໃຫ້ຫຼາຍຂຶ້ນໃນຂົງເຂດການຄ້າ, ການລົງທຶນ, ການບໍລິການທ່ອງທ່ຽວ, ພະລັງງານໄຟຟ້າ. ໂດຍສະເພາະແມ່ນເພີ່ມກໍາລັງການຊື້ຂາຍໄຟຟ້າພະລັງນໍ້າ ແລະ ຖ່ານຫີນ ຈາກ ສປປ ລາວ ໄປສູ່ກຳປູເຈຍ ໃນອະນາຄົດ, ສືບຕໍ່ໃຫ້ການຮ່ວມມື ແລະ ສະໜັບສະໜູນຊ່ວຍເຫຼືອເຊິ່ງກັນ ແລະ ກັນ ໃນເວທີອະນຸພາກພື້ນ, ພາກພື້ນ ແລະ ສາກົນ, ໃນຂອບສະຫະປະຊາຊາດ, ອາຊຽນ, ອະນຸພາກພື້ນແມ່ນໍ້າຂອງ ແລະ ອື່ນໆ. ຊຶ່ງສອງຝ່າຍກໍໄດ້ແຈ້ງສະພາບການພັດທະນາພາຍໃນປະເທດໃນໄລຍະຜ່ານມາໃຫ້ກັນຊາບ.

ໃນໂອກາດດຽວກັນ, ທ່ານລັດຖະມົນຕີ ສະເຫຼີມໄຊ ກົມມະສິດ ໄດ້ສະແດງຄວາມຊົມເຊີຍຕໍ່ບົດບາດການເປັນປະທານອາຊຽນຂອງກຳປູເຈຍ ໃນປີ 2022 ນີ້ ແລະ ຢືນຢັນຄວາມພ້ອມທີ່ຈະໃຫ້ການຮ່ວມມື ແລະ ສະໜັບສະໜູນກໍາປູເຈຍ ໃຫ້ສຳເລັດໜ້າທີ່ສຳຄັນດັ່ງກ່າວຢ່າງຈົບງາມ; ສະ ແດງຄວາມຂອບໃຈມາຍັງ ພັກ-ລັດຖະບານ ແລະ ປະຊາຊົນກຳປູເຈຍ ທີ່ໄດ້ໃຫ້ການຊ່ວຍເຫຼືອແກ່ ສປປລາວ ໃນການຕ້ານ ແລະ ສະກັດກັ້ນການລະບາດຂອງພະຍາດໂຄວິດ-19, ການໃຫ້ຄວາມຊ່ວຍເຫຼືອດ້ານອຸປະກອນການແພດ, ວັຄຊີນຕ້ານໂຄວິດ, ເງິນສົດ ແລະ ອື່ນໆ ໃນໄລຍະຜ່ານມາ. ພ້ອມອວຍພອນໃຫ້ສາຍພົວພັນມິດຕະພາບອັນເປັນມູນເຊື້ອ ຖານບ້ານໃກ້ເຮືອນຄຽງທີ່ດີ ທີ່ມີມາແຕ່ດົນນານ ແລະ ການເປັນຄູ່ຮ່ວມມືຍຸດທະສາດຮອບດ້ານ ແລະ ໝັ້ນຄົງຍາວນານລະຫວ່າງ ລາວ ແລະ ກຳປູເຈຍ ຈົ່ງໄດ້ຮັບການເພີ່ມພູນຄູນສ້າງຂຶ້ນໄປເລື້ອຍໆ.

ໃນໂອກາດຢ້ຽມຢາມຄັ້ງນີ້, ທ່ານລັດຖະມົນຕີ ສະເຫຼີມໄຊ ກົມມະສິດ ແລະຄະນະກໍໄດ້ເຂົ້າຢ້ຽມຂໍ່ານັບ ເຈົ້າຊີວິດ ໂນໂຣດົມ ສີຫາມຸນີ ແລະ ສົມເດັດອັກຄະມະຫາເສນາບໍດີ ເຕໂຈ ຮຸນແຊນ, ນາຍົກລັດຖະມົນຕີ ແຫ່ງ ຣາຊະອານາຈັກ ກຳປູເຈຍ. ໃນໂອກາດດັ່ງກ່າວ, ທ່ານລັດຖະມົນຕີກໍໄດ້ນຳເອົາຄວາມຢື້ຢາມຖາມຂ່າວຂອງ ທ່ານ ທອງລຸນ ສີສຸລິດ, ປະທານປະເທດ ແລະທ່ານ ພັນຄຳ ວິພາວັນ, ນາຍົກລັດຖະມົນຕີ ແຫ່ງ ສປປ ລາວ, ມາຍັງພຣະມະຫາກະສັດ ແລະນາຍົກລັດຖະມົນຕີ ແຫ່ງ ຣາຊະອານາຈັກກຳປູເຈຍຕາມລໍາດັບ.

แชร์