ອົງການໄອຍະການປະຊາຊົນສູງສຸດ ເຄື່ອນໄຫວຊີ້ນຳຜັນຂະຫຍາຍວາລະແຫ່ງຊາດທີ່ຫົວພັນ

ທ່ານ ໄຊຊະນະ ໂຄດພູທອນ ກໍາມະການສູນກາງພັກ, ເລຂາຄະນະບໍລິຫານງານພັກ, ຫົວໜ້າອົງການໄອຍະການປະຊາຊົນສູງສຸດ. ໄດ້ເຄື່ອນໄຫວຊີ້ນໍາການຈັດຕັ້ງຜັນຂະຫຍາຍວາລະແຫ່ງຊາດ ກ່ຽວກັບບັນຫາຢາເສບຕິດ ຢູ່ແຂວງຫົວພັນ, ຮ່ວມໃນຄະນະຄັ້ງນີ້ມີທ່ານ ພຸດທະວົງ ບົວລະພາ ຫົວໜ້າຫ້ອງການ, ທ່ານ ສີສຸພັນ ສີວັນທອງ ຫົວໜ້າກົມການເງິນ ອົງການໄອຍະການປະຊາຊົນສູງສຸດ, ທ່ານ ກິ່ງເພັດ ບົວລະພັນ ຫົວໜ້າອົງການໄອຍະການປະຊາຊົນ ແຂວງຫົວພັນ, ບັນດາຄະນະນໍາ, ພະນັກງານ-ລັດຖະກອນອົງການໄອຍະການປະຊາຊົນແຂວງ ແລະ ອົງການໄອຍະການປະຊາຊົນເຂດ 1, 2 ແລະ ເຂດ 3.

ການເຄື່ອນໄຫວເມື່ອວັນທີ 15 ກຸມພາ 2022, ໂດຍຫົວໜ້າອົງການໄອຍະການປະຊາຊົນສູງສຸດ ໄດ້ຕິດຕາມ, ຊຸກຍູ້ການຈັດຕັ້ງຜັນຂະຫຍາຍແນວທາງນະໂຍບາຍຂອງພັກ-ລັດຖະບານ ແຫ່ງ ສປປ ລາວ, ມະຕິກອງປະຊຸມໃຫຍ່ ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ, ວາລະແຫ່ງຊາດ ກ່ຽວກັບການແກ້ໄຂບັນຫາຢາເສບຕິດ, ການພັດທະນາວຽກງານໄອຍະການປະຊາ ຊົນແຂວງ, ອົງການໄອຍະການປະຊາຊົນເຂດຕາມທິດກ້າວໜ້າ, ທັນສະໄໝ ແລະ ວິທະຍາສາດ; ໂດຍສະເພາະແມ່ນການຮ່ວມມືກັບອົງການສືບສວນ-ສອບສວນຂອງເຈົ້າໜ້າທີ່ຕຳຫຼວດ, ພາສີ, ປ່າໄມ້ ແລະອົງການສືບສວນ-ສອບສວນອື່ນໆຢ່າງກົມກຽວ. ດ້ວຍການສ້າງນິຕິກໍາແລະ ບົດບັນ ທຶກຮ່ວມ ເພື່ອເປັນພື້ນຖານໃຫ້ແກ່ການຍົກສູງຄຸນນະພາບໃນການຕິດຕາມກວດກາ,ການປະຕິບັດກົດໝາຍ, ເພື່ອເຮັດໃຫ້ການດໍາເນີນຄະດີໃຫ້ມີຄວາມເຂັ້ມງວດ ແລະ ຖືກຕ້ອງຕາມກົດໝາຍ. ພ້ອມທັງສ້າງຄວາມເຂົ້າໃຈ ແລະ ຄວາມເປັນເອກະພາບໃນການດໍາເນີນຄະດີຢາເສບຕິດ ກໍຄືການແກ້ໄຂບັນຫາຢາເສບຕິດໃຫ້ມີຄວາມເດັດຂາດ, ໂປ່ງໃສ ແລະ ເປັນມືອາຊີບ.

ເພື່ອບັນລຸເປົ້າໝາຍດັ່ງກ່າວ, ທ່ານ ໄຊຊະນະ ໂຄດພູທອນ ໄດ້ຮຽກຮ້ອງໃຫ້ພະນັກງານ-ລັດຖະກອນອົງການໄອຍະການປະຊາຊົນແຂວງຫົວພັນຈົ່ງເຊີດຊູຄວາມຮັບຜິດຊອບຂອງຕົນໃນການເຮັດຫຼ້ອນໜ້າທີ່ ທີ່ພັກ, ລັດ ແລະ ປະຊາຊົນມອບໝາຍໃຫ້; ຈັດຕັ້ງຜັນຂະຫຍາຍວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກ ທາງດ້ານເສດຖະກິດ-ການເງິນ, ການແກ້ໄຂບັນຫາຢາເສບຕິດເຂົ້າສູ່ວຽກງານໄອຍະການປະຊາຊົນ; ຍົກສູງຄຸນນະພາບໃນການຕິດຕາມກວດກາການປະຕິບັດກົດໝາຍ, ການຕິດຕາມກວດກາທົ່ວໄປ, ການດໍາເນີນຄະດີປົກຄອງ,ການປະຕິບັດຄໍາຕັດສີນຂອງສານ, ເຮັດໃຫ້ສັງຄົມມີຄວາມສະຫງົບ, ເປັນລະບຽບຮຽບຮ້ອຍ, ເສດຖະກິດຂະຫຍາຍຕົວຕໍ່ເນື່ອງ, ປະເທດຊາດຈະເລີນກ້າວໜ້າຢ່າງບໍ່ຢຸດຢັ້ງ.

ໃນວາລະດຽວກັນ, ຫົວໜ້າຫ້ອງການອົງການໄອຍະການປະຊາຊົນສູງສຸດ, ກໍໄດ້ມອບເຄື່ອງມືຈັດກອງປະຊຸມທາງໄກ ຈໍານວນ 1 ຊຸດ ໃຫ້ອົງການໄອຍະການປະຊາຊົນແຂວງຫົວພັນ ແລະ ປິຣ໌ນເຕີຣ໌ 1 ຊຸດ ໃຫ້ອົງການໄອຍະການທະຫານ ລວມມູນຄ່າ 43.990.000 ກີບ.

แชร์