ປກສ ເມືອງໂພນທອງ ທຳລາຍສວນຝິ່ນຫຼາຍກວ່າ 153 ເຮັກຕາ

ເຈົ້າໜ້າທີ່ກອງບັນຊາການ ປ້ອງກັນຄວາມສະຫງົບ (ປກສ) ເມືອງໂພນທອງ ແຂວງຫຼວງພຣະບາງ, ຮ່ວມກັບເຈົ້າໜ້າທີ່ກອງບັນຊາການ ປກສ ແຂວງ, ກອງບັນຊາການທະຫານແຂວງ-ເມືອງ ແລະ ອົງການປົກຄອງບ້ານ ໄດ້ເຂົ້າທຳລາຍສວນຝິ່ນທີ່ປະຊາຊົນລັກລອບປູກຢູ່ໃນພື້ນທີ່ 14 ບ້ານ, ລວມເນື້ອທີ່ປູກຝິ່ນປະມານ 153,74 ເຮັກຕາ.

ປະຕິບັດການດັ່ງກ່າວ, ມີຂຶ້ນເມື່ອລະຫວ່າງທ້າຍເດືອນມັງກອນ ຫາ ຕົ້ນເດືອນກຸມພາ 2022.ຊຶ່ງກ່ອນໜ້າທີ່ຈະມີການເຂົ້າທຳລາຍສວນຝິ່ນນັ້ນ, ທາງເຈົ້າໜ້າທີ່ກໍໄດ້ສົມທົບກັບອົງການປົກຄອງເມືອງ ແລະ ບ້ານ, ດໍາເນີນການສຶກສາອົບຮົມ ແລະ ເຮັດບົດບັນທຶກກັບອົງການປົກຄອງບ້ານ ລວມທັງເຈົ້າຂອງສວນຝິ່ນທັງ 14 ບ້ານໃຫ້ຢຸດເຊົາ, ທັງໄດ້ອະທິບາຍໃຫ້ຮູ້ເຖິງລະບຽບກົດໝາຍ ແລະ ພິດໄພຂອງຝິ່ນ ເພື່ອບໍ່ໃຫ້ມີການລັກລອບປູກອີກ.

ຢ່າງໃດກໍຕາມ, ປະຊາຊົນຈຳນວນໜຶ່ງຍັງຝ່າຝືນ ແລະ ບໍ່ປະຕິບັດຕາມບົດບັນທຶກ ແລະ ສືບຕໍ່ປູກຝິ່ນ. ການລັກລອບເຄື່ອນໄຫວດັ່ງກ່າວ, ຖືເປັນການສ້າງປາກົດການຫຍໍ້ທໍ້ໃນສັງຄົມ ແລະ ຜິດຕໍ່ກົດໝາຍຂອງ ສປປ ລາວ.

ສຳລັບການທຳລາຍສວນຝິ່ນໃນຄັ້ງນີ້, ໄດ້ແບ່ງອອກເປັນ 5 ຈຸ ທ່າມກາງສະພາບຫຍຸ້ງຍາກທາງດ້ານດິນຟ້າອາກາດທີ່ບໍ່ອຳນວຍ, ມີອາກາດໜາວ, ທັງມີຝົນຕົກ, ເສັ້ນທາງໄປຫາພື້ນທີປູກຝິ່ນຍາວໄກ, ເຕັມໄປດ້ວຍອຸປະສັກ ແລະ ພູຜາສູງຊັນ, ທັງທຸລະກັນດານ ຊຶ່ງຕ້ອງໃຊ້ເວລາຍ່າງ 4-5 ຊົ່ວໂມງ.

ຜ່ານການກວດກາ ແລະສໍາຫຼວດຕົວຈິງ, ໄດ້ທຳລາຍສຳເລັດ 23 ຈຸດ ແລະ ຍັງອີກຈຳນວນໜຶ່ງບໍ່ສາມາດທຳລາຍໄດ້ເນື່ອງຈາກກົກຢາຝິ່ນຍັງເປັນເບ້ຍຊຶ່ງມີເນື້ອທີ່ປະມານ 42,1 ເຮັກຕາ, ໂດຍເຈົ້າໜ້າທີ່ກໍໄດ້ເຮັດບົດບັນທຶກກັບເຈົ້າຂອງສວນຝິ່ນ ແລະ ສັ່ງໃຫ້ທຳລາຍຖິ້ມ.

แชร์