ລັດຖະບານ ລາວ ແລະ UNFPA ລົງນາມຮ່ວມໃນແຜນງານຮອບວຽນໃໝ່

ທ່ານ ສະຖາບັນດິດ ອິນສີຊຽງໃໝ່ ຮອງລັດຖະມົນຕີກະຊວງແຜນການ ແລະ ການລົງທຶນ ແລະ ທ່ານ ນາງ ມາຣຽມ ເອຄານ ຜູ້ຕາງໜ້າອົງການສະຫະປະຊາຊາດກອງທຶນສຳລັບປະຊາກອນ (UNFPA) ໄດ້ລົງນາມໃນແຜນການຮ່ວມມືສໍາລັບແຜນດຳເນີນງານຮອບວຽນໃໝ່ 2022-2026 (CPAP) ຫຼັງຈາກສຳເລັດການເປີດແຜນດຳເນີນງານຮອບວຽນທີ 7 ລະຫວ່າງ ລັດຖະບານ ສປປ ລາວ ແລະ ອົງການ UNFPA ເມື່ອເດືອນຜ່ານມາ.

ວາລະດັ່ງກ່າວຈັດຂຶ້ນໃນວັນທີ 16 ກຸມພາ 2022 ທີ່ນະຄອນຫຼວງວຽງຈັນ, ແຜນວຽກ CPAP ແມ່ນເອກະສານສຳລັບການຈັດຕັ້ງປະຕິບັດຂອງແຜນດຳເນີນງານຮອບວຽນໃໝ່ 2022-2026, ຊຶ່ງຮັບຮອງໂດຍຄະນະອໍານວຍການໃຫຍ່ຂອງອົງການ UNFPA ເມື່ອເດືອນກັນຍາ 2021. ແຜນວຽກດັ່ງກ່າວ, ແມ່ນສຸມໃສ່ 4 ຂົງເຂດບຸລິມະສິດເຊັ່ນ: ສຸຂະພາບທາງເພດ ແລະ ສຸຂະພາບຈະເລີນພັນ ແລະ ສິດທິ; ໄວໜຸ່ມ ແລະ ເຍົາວະຊົນ; ຄວາມສະເໝີພາບລະຫວ່າງຍິງ-ຊາຍ ແລະ ການສ້າງຄວາມອາດສາມາດໃຫ້ແມ່ຍິງ; ຂໍ້ມູນ ແລະ ການປ່ຽນແປງດ້ານປະຊາກອນເພື່ອປະກອບສ່ວນເຂົ້າໃນການບັນລຸເປົ້າໝາຍການເຂົ້າເຖິງສຸຂະພາບທາງເພດ ແລະ ສຸຂະພາບຈະເລີນພັນ ແລະ ສິດທິດ້ານຈະເລີນພັນສຳລັບທຸກຄົນ.

ແຜນດຳເນີນງານຮອບວຽນທີ 7 ແມ່ນອີງໃສ່ບົດຮຽນທີ່ຖອດຖອນໄດ້ຈາກແຜນດຳເນີນງານຮອບວຽນທີ່ຜ່ານມາ ແລະ ນຳໃຊ້ຂໍ້ມູນຈາກການສຶກສາປະຊາກອນ ສປປ ລາວ 2030 ຊຶ່ງສອດຄ່ອງກັບແຜນພັດທະນາເສດຖະກິດ-ສັງຄົມ ແຫ່ງຊາດ 5 ປີ ຄັ້ງທີ IX, ໂດຍປະຕິບັດຕາມຄວາມໝາຍໝັ້ນຂອງລັດຖະບານລາວຕໍ່ກອງປະຊຸມສາກົນກ່ຽວກັບການພັດທະນາປະຊາກອນ ຄັ້ງທີ 25 (ICPD25) ແລະ ກອບການຮ່ວມມືດ້ານການພັດທະນາແບບຍືນຍົງຂອງສະຫະປະຊາຊາດ.

แชร์