ເຊກອງ ຝຶກອົບຮົມກໍາມະການກີລາເຕະບານ

ສະຫະພັນບານເຕະແຫ່ງຊາດລາວ (ສຕລ) ຮ່ວມກັບສະຫະພັນບານເຕະແຂວງເຊກອງ (ສຕຂ) ໄດ້ເປີດຊຸດຝຶກອົບຮົມກໍາມະການຕັດສິນກີລາເຕະບານ, ເມື່ອວັນທີ 15 ກຸມພາ 2022 ຢູ່ສູນໄອຊີທີ (ICT) ໂຮງຮຽນມໍປາຍແຂວງ.

ໂດຍການເຂົ້າຮ່ວມຂອງ ທ່ານ ສຸລິຄໍາ ພອນທະລາ ຮອງຫົວໜ້າພະແນກສຶກສາທິການ ແລະ ກີລາແຂວງ, ທ່ານ ທອງປະເສີດ ພອນສິລິຍະວົງ ຫົວໜ້າຫ້ອງການນິຕິກໍາ ສຕລ, ທ່ານ ສໍລະເສີນສັກ ຟອງສານຸວົງ ຮອງປະທານ ສຕຂ ແລະ ພາກສ່ວນກ່ຽວຂ້ອງ.

ທັງນີ້, ຮອງຫົວໜ້າພະແນກສຶກສາທິການ ແລະ ກີລາແຂວງເຊກອງ ໃຫ້ຮູ້ວ່າ: ຈຸດປະສົງຂອງການເປີດຊຸດອົບຮົມຄັ້ງນີ້, ເພື່ອເປັນການຜັນຂະຫຍາຍແຜນຍຸດທະສາດການພັດທະນາວຽກງານສຶກສາທິການ ແລະ ກີລາ ໂດຍສະເພາະກໍແມ່ນການຍົກລະດັບຄວາມຮູ້ໃຫ້ແກ່ກໍາມະການຕັດສິນກີລາເຕະບານທົ່ວແຂວງເຊກອງ, ຄຽງຄູ່ກັບການພັດທະນານັກກີລາເຕະບານ, ທັງເປັນການສ້າງກໍາມະການຮຸ່ນສືບທອດທົດແທນ, ເພາະປັດຈຸບັນ ກໍາມະການທີ່ຮັບໃຊ້ກີລາເຕະບານແມ່ນມີຈໍາກັດ. ດັ່ງນັ້ນ, ເພື່ອສ້າງໂອກາດໃຫ້ກໍາມະການໃໝ່ໄດ້ຮັບການພັດທະນາ ແລະ ຮຽນຮູ້ຕື່ມອີກກ່ຽວກັບກະຕິກາແຂ່ງຂັນ, ທັງຮູ້ນໍາໃຊ້ກະຕິກາໃຫ້ຖືກຕ້ອງ ແລະ ເໝາະສົມກັບການແຂ່ງຂັນໃນແຕ່ລະນັດ.

ການຝຶກອົບຮົມຄັ້ງນີ້, ຈະໄດ້ດໍາເນີນໄປຮອດວັນທີ 18 ກຸມພາ 2022 ຊຶ່ງສໍາມະນາກອນແມ່ນໄດ້ຮຽນຮູ້ທັງທາງດ້ານທິດສະດີ, ການປະຕິບັດຕົວຈິງ ແລະອື່ນໆ.

แชร์