ຕິດໂຄວິດລາຍວັນ ດັນສະຖິຕິໃໝ່ໃນອິນໂດນີເຊຍສູງສຸດເປັນປະຫວັດການ

ອິນໂດນີເຊຍ ພົບຜູ້ຕິດເຊື້ອໃນທົ່ວປະເທດຫຼາຍກວ່າ 57 ພັນຄົນ, ຊຶ່ງເປັນຕົວເລກຕິດເຊື້ອໃໝ່ໃນໄລຍະ 24 ຊົ່ວໂມງ ທີ່ນັບມາເຖິງວັນທີ 15 ກຸມພາ 2022,ສະຖິຕິດັ່ງກ່າວຖືເປັນການຕິດເຊື້ອລາຍວັນສູງສຸດຕັ້ງແຕ່ເກີດການລະບາດຢູ່ໃນປະເທດ.

ສຳນັກຂ່າວຕ່າງປະເທດໄດ້ເປີດເຜີຍຖະແຫຼງການຂອງກະຊວງສາທາລະນະສຸກອິນໂດນີເຊຍເມື່ອວັນອັງຄານ,ຊຶ່ງລະບຸວ່າໃນຮອບ 1 ວັນຜ່ານມາມີຜູ້ຕິດເຊື້ອໂຄວິດ-19 ລາຍໃໝ່ເຖິງ57.049 ຄົນ,ເສຍຊີວິດ 134 ລາຍ, ຫາຍດີຈາກອາການປ່ວຍ 26.747ຄົນ. ຈາກຕົວເລກຫຼ້າສຸດ, ສົ່ງຜົນໃຫ້ຈຳນວນຜູ້ຕິດເຊື້ອສະສົມເພີ່ມເປັນ 4.901.328 ຄົນ ແລະເສຍຊີວິດສະສົມ 145.455ລາຍ,ຊຶ່ງນັບເປັນສະຖິຕິຕິດເຊື້ອ ແລະສະຖິຕິການຕາຍສູງສຸດໃນເອເຊຍຕາເວັນອອກສຽງໃຕ້ ຫຼືອາຊຽນ, ສ່ວນຜູ້ປ່ວຍທີ່ປິ່ນປົວດີກໍມີຕົວເລກສະສົມທີ່ 4.349.848 ຄົນ.

ຢ່າງໃດກໍຕາມ, ຈຳນວນຜູ້ຕິດເຊື້ອໂຄວິດ-19 ໃນອິນໂດນີເຊຍທີ່ພຸ່ງສູງຂຶ້ນນັ້ນ, ແມ່ນຫຼັງຈາກມີການກວດພົບຜູ້ຕິດເຊື້ອສາຍພັນໂອມິຄຣອນເປັນຄັ້ງທຳອິດເມື່ອເດືອນທັນວາ 2021ແລະ ໃນເດືອນມັງກອນ 2022 ກໍພົບຜູ້ຕິດເຊື້ອໃໝ່ທົ່ວປະເທດ90.650ຄົນ.ສ່ວນຕົວເລກຫຼ້າສຸດເມື່ອວັນທີ 15 ກຸມພານີ້, ກໍນັບເປັນການທຳລາຍສະຖິຕິສູງສຸດດັ້ງເດີມຂອງປະເທດທີ່ເຄີຍມີຕົວເລກສູງເຖິງ 56.757 ຄົນເມື່ອວັນທີ 15 ກຸມພາ 2021 ແລະໃນຂະນະນີ້, ອິນໂດນີເຊຍ ກໍພວມຕໍ່ສູ້ກັບການລະບາດຂອງພະຍາດໂຄວິດ-19 ສາຍພັນເດລຕາ.

ທັງນີ້, ລັດຖະບານອິນໂດນີເຊຍ ກໍຄາດຄະເນວ່າ: ຕົວເລກຜູ້ຕິດເຊື້ອໂຄວິດ-19 ລາຍວັນໃນປະເທດຈະຂຶ້ນສູ່ລະດັບສູງສຸດນັບຕັ້ງແຕ່ກາງເດືອນກຸມພາໄປຈົນເຖິງເດືອນມີນາ, ຫຼັງຈາກນັ້ນກໍຈະຄ່ອຍໆຫຼຸດຈຳນວນລົງ.

แชร์