ປະທານສະພາແຫ່ງຊາດ ສຳເລັດຢ້ຽມຢາມ ແລະ ເຄື່ອນໄຫວວຽກງານທີ່ໄຊຈຳພອນ

ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ພ້ອມດ້ວຍຄະນະໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ເມືອງໄຊຈໍາພອນ ແຂວງບໍລິຄໍາໄຊ. ໃນໂອກາດນີ້, ທັງຄະນະໄດ້ຕິດຕາມເບິ່ງຫຼາຍໂຄງການພັດທະນາ ແລະນຳເອົາເຄື່ອງຊ່ວຍເຫຼືອໄປມອບໃຫ້ອີກດ້ວຍ. ໃຫ້ການຕ້ອນຮັບ ແລະ ເຄື່ອນໄຫວນຳຄະນະປະທານສະພາແຫ່ງຊາດ ເມື່ອວັນທີ 15 ກຸມພາ 2022, ໂດຍທ່ານ ກອງແກ້ວ ໄຊສົງຄາມ ກໍາມະການສູນກາງພັກ, ເຈົ້າແຂວງບໍລິຄຳໄຊ ແລະ ທ່ານ ສຸວັນນີ ໄຊຊະນະ ປະທານສະພາປະຊາຊົນແຂວງ, ພ້ອມດ້ວຍພະນັກງານກ່ຽວຂ້ອງ.

ທັງນີ້, ເຈົ້າເມືອງໄຊຈຳພອນ ໄດ້ລາຍງານກ່ຽວກັບສະພາບເສດຖະກິດ-ສັງຄົມຂອງເມືອງ, ຊຶ່ງໄຊຈໍາພອນເປັນເມືອງທີ 7 ຂອງແຂວງບໍລິຄໍາໄຊ ແລະ ຍັງເປັນເມືອງທຸກຍາກ, ຕັ້ງຢູ່ພາກຕາເວັນອອກສ່ຽງເໜືອຂອງແຂວງ ແລະ ເປັນເຂດພູດອຍ. ເມືອງແຫ່ງນີ້, ເຄີຍເປັນເສັ້ນທາງເຄື່ອນໄຫວປະຕິວັດຂອງອະດີດການນຳລຸ້ນທຳອິດຂອງລາວ ຊຶ່ງໄດ້ຜ່ານດິນແດນແຫ່ງນີ້ໄປສູ່ເມືອງແອັ່ງເຊິນ ແຂວງເຫງະອານ ສສ.ຫວຽດນາມ ແລະ ຜ່ານໄປຫາເຂດເມືອງວຽງທອງ ລົງສູ່ເຂດທົ່ງພຽງ, ທັງເປັນເຂດທີ່ໝັ້ນຂອງການປະຕິວັດຊາດ ປະຊາທິປະໄຕ ໃນເມື່ອກ່ອນ, ເປັນບ້ານເກີດຂອງທ່ານ ສີສົມພອນ ລໍວັນໄຊ ອະດີດກໍາມະການກົມການເມືອງສູນກາງພັກ. ເມືອງໄຊພູທອງ ໄດ້ຮັບການສ້າງຕັ້ງຂຶ້ນຕາມດໍາລັດຂອງນາຍົກລັດຖະມົນຕີ ສະບັບເລກທີ 125/ນຍ, ລົງວັນທີ 11 ພຶດສະພາ 2009 ມີເນື້ອທີ່ທັງໝົດ 2.265 ຕາກິໂລແມັດ, ປະກອບມີ 4 ກຸ່ມບ້ານ, ມີ 17 ບ້ານ, 1.980 ຄອບຄົວ, ພົນລະເມືອງທັງໝົດ 12.067 ຄົນ, ຍິງ 5.750 ຄົນ.

ເນື່ອງຈາກເປັນພື້ນທີ່ຫ່າງໄກ ແລະ ສະພາບພູມປະເທດທຸລະກັນດານ, ອີກທັງເສັ້ນທາງຄົມມະນາຄົມໄປ-ມາພົບຄວາມຫຍຸ້ງຍາກ ແລະຈໍາກັດທີ່ສຸດ,ເຮັດໃຫ້ວຽກງານລຶບລ້າງຄວາມທຸກຍາກເຖິງວ່າເຮັດໄດ້ແຕ່ກໍຍັງບໍ່ຮັບປະກັນຄວາມຍືນຍົງ, ການສ້າງບ້ານພົ້ນທຸກ ແລະບ້ານພັດທະນາກໍຍັງບໍ່ທັນໄດ້ຈິ່ງເຮັດໃຫ້ໄຊຈຳພອນຍັງເປັນເມືອງທຸກຍາກ; ຄຸນນະພາບການຮຽນ-ການສອນຂອງຄູ-ອາຈານ ແລະຂອງນັກຮຽນຍັງບໍ່ທັນສູງ, ເພາະຂາດວັດຖຸອຸປະກອນ ແລະ ຄູ-ອາຈານບໍ່ພຽງພໍ; ຊຶ່ງທາງເມືອງກໍໄດ້ສະເໜີຂໍງົບປະມານໃນການສ້າງເສັ້ນທາງລະຫວ່າງເມືອງຫາເມືອງ ແລະ ເມືອງລົງຫາບ້ານ, ງົບປະມານການປັບປຸງເທສະບານຜັງເມືອງໃໝ່ນໍ້າອ້ອນ, ງົບປະມານໃນການເຮັດຊົນລະປະທານ ແລະງົບປະມານຊື້ທໍ່ຢາງດໍາເພື່ອເອົານໍ້າເຂົ້ານາໃຫ້ປະຊາຊົນ.

ໃນໂອກາດນີ້, ປະທານສະພາແຫ່ງຊາດ ກໍໄດ້ໂອ້ລົມໃຫ້ກຳລັງໃຈຄະນະນຳເມືອງ ແລະ ພະນັກງານຫຼັກແຫຼ່ງ, ກໍຄືປະຊາຊົນບັນດາເຜົ່າ ຈົ່ງຮ່ວມແຮງຮ່ວມໃຈກັນຈັດຕັ້ງປະຕິບັດສອງວາລະແຫ່ງຊາດ ຊຶ່ງຖືເປັນວິທີທາງດຽວທີ່ຈະນໍາພາປະເທດຊາດໃຫ້ຫຼຸດພົ້ນຈາກສະພາບຄວາມຫຍຸ້ງຍາກທາງດ້ານເສດຖະກິດ-ການເງິນ; ໂດຍສະເໜີໃຫ້ຄະນະພັກ, ສະມາຊິກສະພາປະຊາຊົນແຂວງ, ອົງການປົກຄອງເມືອງ ເພີ່ມທະວີການນໍາພາຮອບດ້ານຕໍ່ວຽກງານປ້ອງກັນຊາດ-ປ້ອງກັນຄວາມສະຫງົບ, ຍົກສູງສະຕິລະວັງຕົວຕໍ່ການເຄື່ອນໄຫວມ້າງເພທໍາລາຍຂອງອິດທິກໍາລັງປໍລະປັກ, ປັບປຸງສອງກໍາລັງໃຫ້ມີຄວາມເຂັ້ມແຂງ, ມີຄວາມຈົງຮັກພັກດີຕໍ່ປະຊາຊົນ, ຕໍ່ລະບອບໃໝ່; ເອົາໃຈໃສ່ປົກປັກຮັກສາຄວາມສະຫງົບ, ຄວາມເປັນລະບຽບຮຽບຮ້ອຍ; ສະກັດກັ້ນບັນຫາຢາເສບຕິດ ເພື່ອເຮັດໃຫ້ສັງຄົມມີຄວາມສະຫງົບປອດໄພ, ຊຶ່ງເປັນພື້ນຖານໃຫ້ແກ່ການພັດທະນາເສດຖະກິດ-ສັງຄົມ.

ພ້ອມນັ້ນ, ກໍສະເໜີໃຫ້ຄະນະພັກ, ອົງການປົກຄອງເມືອງ ເອົາໃຈໃສ່ຊຸກຍູ້ສົົ່ງເສີມ ແລະ ສ້າງເງື່ອນໄຂໃຫ້ປະຊາຊົນເຮັດການຜະລິດກະສິກໍາ, ການລ້ຽງສັດໃຫຍ່ເປັນສິນຄ້າ, ໃນເງື່ອນໄຂທີ່ເມືອງໄຊຈໍາພອນມີຊາຍແດນຕິດກັບ ສສ ຫວຽດນາມ ຊຶ່ງອົງການປົກຄອງຂັ້ນທ້ອງຖິ່ນຂອງສອງຝ່າຍ, ກໍໄດ້ມີການປະສານສົມທົບວຽກງານຮ່ວມກັນເປັນປົກກະຕິ ຈິ່ງເປັນທ່າແຮງໜຶ່ງຂອງການຜະລິດກະສິກໍາເປັນສິນຄ້າ. ເອົາໃຈໃສ່ສ້າງ ແລະ ຂະຫຍາຍຮູບແບບເສດຖະກິດລວມໝູ່ຂອງປະຊາຊົນໃຫ້ກາຍເປັນຖານເສດຖະກິດອັນໝັ້ນຄົງ ແລະ ໜັກແໜ້ນ, ໂດຍສະເພາະການສ້າງນັກວິຊາການດ້ານການປູກຝັງ-ລ້ຽງສັດ ເພື່ອເຮັດໃຫ້ການຜະລິດກະສິກໍາພາຍໃນເມືອງຂະຫຍາຍຕົວ ແລະ ມີຄວາມເຂັ້ມແຂງ. ເອົາໃຈໃສ່ສ້າງ ແລະ ສ້ອມແປງໂຮງຮຽນ ເພື່ອ ອໍານວຍຄວາມສະດວກໃຫ້ແກ່ລູກຫຼານໄດ້ເຂົ້າຮຽນ; ເອົາໃຈໃສ່ປັບປຸງໂຮງໝໍຊຸມຊົນ ເຮັດໃຫ້ພໍ່ແມ່ປະຊາຊົນສາມາດເຂົ້າເຖິງການບໍລິການດ້ານສາທາລະນະສຸກທີ່ສະດວກ ແລະ ວ່ອງໄວຂຶ້ນ. ເອົາໃຈໃສ່ວຽກງານພັດທະນາຊົນນະບົດ ແລະ ແກ້ໄຂຄວາມທຸກຍາກຂອງປະຊາຊົນໃຫ້ເຂົ້າສູ່ລວງເລິກ ແລະ ທົ່ວເຖິງ ຕາມທິດ 3 ສ້າງ ແລະ ພັດທະນາຊົນນະບົດດ້ວຍການສົ່ງເສີມການຜະລິດເປັນສິນຄ້າ ຄຽງຄູ່ກັບການຈັດສັນພູມລໍາເນົາ ແລະ ບ່ອນທໍາມາຫາກິນຖາວອນ.

ໃນໂອກາດນີ້, ທັງຄະນະກໍໄດ້ນໍາເອົາອຸປະກອນການຮຽນ, ປຶ້ມແບບຮຽນ ຊັ້ນ ປ1 ຫາ ປ5 ຄົບຊຸດ, ໝາກບານ, ກະຕໍ້, ຜ້າຫົ່ມ ແລະ ເຄື່ອງບໍລິໂພກອີກຈຳນວນໜຶ່ງໄປມອບໃຫ້,ຊຶ່ງຕາງໜ້າກ່າວມອບໂດຍ ທ່ານ ນາງ ມະນີວັນ ເຍຍປາວເຮີ ຮອງປະທານກໍາມາທິການວັດທະນະທຳສັງຄົມສະພາແຫ່ງຊາດ ແລະກ່າວຮັບໂດຍ ທ່ານ ໂກ້ ໄຊສົມບັດ ເຈົ້າເມືອງໄຊຈຳພອນ. ຕໍ່ຈາກນັ້ນ, ທັງຄະນະກໍໄດ້ໄປຢ້ຽມຢາມໂຮງໝໍເມືອງໄຊຈຳພອນ, ໂຄງການຕາຝັ່ງເຈື່ອນ, ຕະຫຼາດໃໝ່ເຂດເທສະບານເມືອງປາກຊັນ ແລະ ໂຄງການກໍ່ສ້າງຂົວຂ້າມແມ່ນຳ້ຂອງມິດຕະພາບ ລາວ-ໄທ ແຫ່ງທີ V ບໍລິຄຳໄຊ-ບຶງການ ປະເທດໄທ.

แชร์