ໂຄອາລາ ເຫຼືອບໍ່ເຖິງ1 ແສນໂຕ ມີຊື່ໂພ່ບັນຊີສັດໃກ້ສູນພັນ

ລັດຖະບານອອສເຕຣເລຍ, ຂຶ້ນບັນຊີ ໂຄອາລາ ທົ່ວພູມີພາກແຄມຝັ່ງຕາເວັນອອກຂອງປະເທດເປັນ “ສັດໃກ້ສູນພັນ” ຢ່າງເປັນທາງການແລ້ວ. ທັງນີ້, ກໍເນື່ອງມາຈາກຜົນກະທົບຂອງໄພແຫ້ງແລ້ງ, ການຖາງປ່າ, ພະຍາດສັດ ແລະ ໄຟປ່າຄັ້ງໃຫຍ່ຊຶ່ງເຮັດໃຫ້ສັດມີຖົງໜ້າທ້ອງຊະນິດນີ້ຫຼຸດຈຳນວນລົງຢ່າງໄວວາ, ໂດຍມີການປະເມີນວ່າ ປະຊາກອນໂຄອາລາຍັງເຫຼືອຢູ່ບໍ່ເຖິງ1 ແສນໂຕ.

ເມື່ອບໍ່ດົນມານີ້, ທ່ານ ນາງ ຊູຊານ ລີຍ໌ ລັດຖະມົນຕີກະຊວງສິ່ງແວດລ້ອມຂອງອອສເຕຣເລຍ, ລະບຸວ່າ: ໄດ້ຂຶ້ນບັນຊີປະຊາກອນໂຄອາລາ ເປັນສັດໃກ້ສູນພັນຢ່າງເປັນທາງການ, ເພື່ອເພີ່ມມາດຕະການຄຸ້ມຄອງລະດັບສູງແກ່ສັດລ້ຽງລູກດ້ວຍນົມທີ່ມີຖົງໜ້າທ້ອງໃນລັດນິວເຊົາທ໌ເວລສ໌, ອອສເຕຣລຽນແຄພິທອລເທຣ໌ຣິທໍຣີ ແລະ ຄວີນສ໌ແລນດ໌.

ທາງດ້ານນັກອະນຸຮັກກໍໄດ້ເຕືອນວ່າ: ໃນຊ່ວງ 2 ທົດສະວັດຜ່ານມາ, ປະຊາກອນໂຄອາລາໃນອອສເຕຣເລຍຕາເວັນອອກ ແມ່ນຫຼຸດຈຳນວນລົງຫຼາຍ, ຊຶ່ງສັດທີ່ທົ່ວໂລກຍອມຮັບວ່າ ເປັນສັນຍະລັກຂອງສັດປ່າທີ່ພົບສະເພາະໃນອອສເຕຣເລຍ ກຳລັງເຂົ້າສູ່ພາວະສູນພັນ, ຫວນຄືນເມື່ອກ່ອນໜ້ານີ້ 10 ປີ ໂຄອາລາໃນຝັ່ງຕາເວັນອອກກໍເຄີຍຖືກຂຶ້ນບັນຊີເປັນສັດໃນກຸ່ມ “ສ່ຽງ”.

ຂະນະດຽວກັນ, ອອສເຕຣເລຍກໍພວມດຳເນີນມາດຕະການເພື່ອຄຸ້ມຄອງໂຄອາລາໃນແບບທີ່ບໍ່ເຄີຍມີມາກ່ອນ, ຊຶ່ງເມື່ອບໍ່ດົນມານີ້ລັດຖະບານອອສເຕຣເລຍກໍໃຫ້ຄຳໝັ້ນສັນຍາວ່າ“ຈະໃຫ້ງົບປະມານ 50 ລ້ານໂດລາອອສເຕຣເລຍ, ເພື່ອປົກປ້ອງແລະຟື້ນຟູຖິ່ນທີ່ຢູ່ຂອງໂຄອາລາ”.

ສ່ວນທ່ານ ໂຈຊີຍ໌ ຜູ້ຈັດການປຸກລະດົມຄຸ້ມຄອງຊີວິດສັດປ່າຂອງກອງທຶນສະວັດດີພາບສັດນານາຊາດ, ກໍໃຫ້ທັດສະນະວ່າ: ຊາຕາກຳໂຄອາລາຂອງອອສເຕຣເລຍ ແມ່ນງອຍຢູ່ເທິງປາກເຫວຕັ້ງແຕ່ກ່ອນເຫດໄຟປ່າທຳລາຍລ້າງ “ແບ໊ລກຊຳເມີຣ໌” ເມື່ອປີ 2019-2020 ເນື່ອງຈາກການຂຸດຄົ້ນ ແລະຖາງປ່າ, ລວມທັງຜົນກະທົບຈາກໄພແລ້ງ, ພະຍາດສັດ, ອຸບັດເຫດໃນຂະນະພວກມັນຂ້າມຖະໜົນ ແລະຖືກໝາກັດ. ແຕ່ເຫດໄຟປ່າກໍປຽບຄືເຟືອງເສັ້ນສຸດທ້າຍ ແລະນີ້ກໍເປັນສັນຍານເຕືອນລັດຖະບານອອສເຕຣເລຍ ແລະບັນດາປະເທດທົ່ວໂລກໃຫ້ເລັ່ງດຳເນີນການປົກປ້ອງໄວຂຶ້ນເພື່ອແກ້ໄຂພາວະໂລກຮ້ອນຢ່າງຈິງຈັງ.

• 15/02/2022