ສສຊ ແລະ ສສຂ ພົບປະພະນັກງານທີ່ທຸລະຄົມ

ທ່ານ ຈະເລີນ ເຢຍປາວເຮີ ຄະນະປະຈໍາສະພາແຫ່ງຊາດ, ຮອງປະທານສະພາແຫ່ງຊາດ, ສະມາຊິກສະພາແຫ່ງຊາດເຂດ 10 ແຂວງວຽງຈັນ ພ້ອມຄະນະໂດຍປະກອບມີ ທ່ານ ນາງ ຈັນທະຄອນ ສີອໍາພອນ ຮອງປະທານສະພາປະຊາຊົນແຂວງ, ສະມາຊິກສະພາປະຊາຊົນແຂວງປະຈໍາເມືອງ ແລະ ທ່ານ ບຸນເລີດ ສີຫາປັນຍາ ຮອງເລຂາພັກເມືອງ ສະມາຊິກສະພາປະຊາຊົນແຂວງປະຈໍາເມືອງ, ໄດ້ເຄື່ອນໄຫວພົບປະໂອ້ລົມພະນັກງານ ທັງເຜີຍແຜ່ຜົນສໍາເລັດກອງປະຊຸມສະໄໝສາມັນເທື່ອທີ 2 ຂອງສະພາແຫ່ງຊາດຊຸດທີ IX ແລະ ຜົນສໍາເລັດກອງປະຊຸມສະພາປະຊາຊົນແຂວງວຽງຈັນຊຸດທີ 2 ທີ່ເມືອງທຸລະຄົມ ແຂວງວຽງຈັນ ເມື່ອວັນທີ 14 ກຸມພາ 2022.

ໃນວາລະດຽວກັນ, ທ່ານ ນາງ ວົງເດືອນ ວັດຕະໂສ ເຈົ້າເມືອງທຸລະຄົມ, ກໍໄດ້ລາຍງານສະພາບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງເມືອງໃນໄລຍະໜຶ່ງປີຜ່ານມາ ແລະ ການຈັດຕັ້ງປະຕິບັດ 2 ວາລະແຫ່ງຊາດ, ວຽກງານປ້ອງກັນ ແລະ ສະກັດກັ້ນການລະບາດຂອງພະ ຍາດໂຄວິດ-19. ໂດຍໄດ້ຍົກໃຫ້ເຫັນສະພາບລວມ ແລະ ຈຸດພິເສດຂອງເມືອງທຸລະຄົມ, ຍົກໃຫ້ເຫັນ ທ່າແຮງຂອງເມືອງ, ສະພາບພົ້ນເດັ່ນດ້ານການປູກຝັງລ້ຽງສັດ ແລະ ການຜະລິດກະສິກໍາເປັນສິນຄ້າ, ໂດຍອາໄສທ່າແຮງດ້ານລະບົບຊົນລະປະທານທີ່ມີຫຼາຍແຫ່ງ, ທັງມີສາຍນໍ້າງື່ມ, ນໍ້າມັງ-ນໍ້າປອດ ຊຶ່ງເປັນສາຍນໍ້າສໍາຄັນຕອບສະໜອງແກ່ເນື້ອທີ່ການຜະລິດ, ອີກທັງທ່າແຮງດ້ານການທ່ອງ ທ່ຽວແບບປະຊາຊົນມີສ່ວນຮ່ວມ ແລະ ທ່າແຮງບໍລິການ-ຄ້າຂາຍ, ເພາະເປັນເມືອງທາງຜ່ານສູ່ນະຄອນຫຼວງ ແລະ ແຂວງຕ່າງໆ.

ໂອກາດນີ້, ທ່ານ ຈະເລີນ ເຢ່ຍປາວເຮີ ກໍໄດ້ມີຄໍາເຫັນໂອ້ລົມ, ໂດຍຕາງໜ້າໃຫ້ຜູ້ແທນເຂດ 10 ແຂວງວຽງຈັນ ກໍຄືຜູ້ແທນຂອງສະພາປະຊາຊົນແຂວງຊຸດທີ 2 ສະແດງຄວາມຂອບໃຈຕໍ່ຄະນະນໍາເມືອງ ແລະ ປະຊາຊົນເມືອງທຸກຊັ້ນຄົນ. ທີ່ໄດ້ໃຫ້ຄວາມໄວ້ວາງໃຈເລືອກໃຫ້ເປັນຜູ້ແທນປະຊາຊົນ,ພ້ອມຢືນຢັນຈະສືບຕໍ່ປະຕິບັດສິດ, ພາລະບົດບາດໃນນາມເປັນຕົວແທນຂອງປະຊາຊົນ, ເປັນຂົວຕໍ່ປະສານງານລາຍງານຄວາມມຸ່ງມາດປາດຖະໜາຂອງປະຊາຊົນ ໃຫ້ສະພາແຫ່ງຊາດ ແລະ ສະພາທ້ອງຖິ່ນຄົ້ນຄວ້າພິຈາລະນາ.

แชร์