ສ.ເກົາຫຼີ ສັກວັຄຊີນເຂັມ 4 ໃຫ້ປະຊາກອນກຸ່ມສ່ຽງ

ໜ່ວຍງານດ້ານສາທາລະນະສຸກຂອງ ສ.ເກົາຫຼີ, ໄດ້ເລີ່ມສັກວັຄຊີນໂຄວິດ-19 ເຂັມທີ 4ຫຼື ເຂັມກະຕຸ້ນທີສອງໃຫ້ປະຊາກອນອາຍຸສູງ ແລະຜູ້ມີບັນຫາລະບົບພູມຄຸ້ມກັນ; ແຕ່ນອກເໜືອຈາກກຸ່ມຄົນເຫຼົ່ານັ້ນ, ແມ່ນຍັງບໍ່ທັນແນະນຳໃຫ້ບູສເຕີຣ໌ເຂັມທີ 2 ເທື່ອ.

ອີງຕາມການສະເໜີຂອງສຳນັກຂ່າວຕ່າງປະເທດ, ຊຶ່ງອ້າງການລາຍງານຈາກນະຄອນໂຊລ ຂອງ ສ.ເກົາຫຼີ ໃນວັນທີ 15 ກຸມພາ 2022, ໂດຍສຳນັກງານຄຸ້ມຄອງ ແລະ ປ້ອງກັນພະຍາດ ສ.ເກົາຫຼີ (KCDA) ໄດ້ລະບຸວ່າ: ພົນລະເມືອງຂອງ ສ.ເກົາຫຼີ 44,2 ລ້ານຄົນໃນ 52 ລ້ານຄົນ ຊຶ່ງຄິດເປັນ 86,2% ຂອງຈຳນວນປະຊາກອນໄດ້ຮັບວັຄຊີນໂຄວິດ-19 ຄົບແລ້ວ.

ຢ່າງໃດກໍດີ, ໜ່ວຍງານສາທາລະນະສຸກຂອງ ສ.ເກົາຫຼີ ກໍໄດ້ເລີ່ມສັກວັຄຊີນເຂັມທີ 4 ໃຫ້ແກ່ປະຊາຊົນກຸ່ມອາຍຸ 60 ປີຂຶ້ນໄປ ແລະພະນັກງານທຸກໄວອາຍຸທີ່ເຮັດວຽກຢູ່ໃນສູນຊ່ວຍເຫຼືອຜູ້ສູງອາຍຸຈຳນວນ 5 ແສນຄົນ, ລວມທັງຜູ້ມີພະຍາດປະຈຳຕົວທີ່ກ່ຽວກັບພູມຄຸ້ມກັນອີກປະມານ 1,3 ລ້ານຄົນ.

ລາຍງານດຽວກັນໃຫ້ຮູ້ຕື່ມວ່າ: ໃນຮອບ 24 ຊົ່ວໂມງຜ່ານມາ ສ.ເກົາຫຼີ ໄດ້ຢືນຢັນຈຳນວນຜູ້ປ່ວຍໂຄວິດເພີ່ມຂຶ້ນອີກ 57.177 ຄົນ, ຊຶ່ງເປັນສະຖິຕິສູງສຸດຄັ້ງໃໝ່ ແລະ ເປັນວັນທີ 6ຕິດຕໍ່ກັນທີ່ມີລາຍງານຜູ້ຕິດເຊື້ອລາຍວັນຫຼາຍກວ່າ 50 ພັນຄົນ. ສ່ວນຈຳນວນຜູ້ເສຍຊີວິດໃນຮອບວັນຫຼ້າສຸດ ກໍເພີ່ມຂຶ້ນອີກ 61 ລາຍ, ເຮັດໃຫ້ມາເຖິງຕອນນີ້ ສ.ເກົາຫຼີ ມີຜູ້ປ່ວຍສະສົມຢ່າງໜ້ອຍ 1.462.421 ຄົນ ແລະ ເສຍຊີວິດສະສົມແລ້ວຢ່າງໜ້ອຍ 7.163 ລາຍ.

แชร์