ປະທານສານປະຊາຊົນສູງສຸດ ຢ້ຽມຢາມຄຳມ່ວນ

ທ່ານ ນາງ ວຽງທອງ ສີພັນດອນ ເລຂາທິການສູນກາງພັກ, ເລຂາຄະນະບໍລິຫານງານພັກປະທານສານປະຊາຊົນສູງສຸດ, ພ້ອມຄະນະ. ໄດ້ເຄື່ອນໄຫວຢ້ຽມຢາມ ແລະ ເຮັດວຽກຢູ່ແຂວງຄຳມ່ວນ ໃນລະຫວ່າງວັນທີ 14-15 ກຸມພາ 2022, ໂດຍການຕ້ອນຮັບຂອງ ທ່ານ ວັນໄຊ ພອງສະ ຫວັນ ກຳມະການສູນກາງພັກ, ເລຂາພັກແຂວງ ເຈົ້າແຂວງຄຳມ່ວນ, ມີບັນດາຄະນະນຳແຂວງ, ຄະນະນຳ10 ເມືອງ ແລະພະນັກທີ່ກ່ຽວຂ້ອງເຂົ້າຮ່ວມ.

 ​ທັງນີ້, ເຈົ້າແຂວງຄຳມ່ວນ ໄດ້ລາຍງານໃຫ້ຄະນະຊາບ, ໂດຍຍົກໃຫ້ເຫັນຄວາມມີສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ການພັດທະນາເສດຖະກິດ-ສັງຄົມ ຂະຫຍາຍຕົວຢ່າງຕໍ່ເນື່ອງ, ເສດຖະກິດມະຫາພາກຂະຫຍາຍຕົວໃນລະດັບ 5,73 % (ແຜນການປີ 5,93%), ສະເລ່ຍຕໍ່ຫົວຄົນໄດ້ 2.272 ໂດລາສະຫະລັດ. ການຈັດເກັບລາຍຮັບງົບປະມານສາມາດບັນລຸໄດ້ 98,84% ເຖິງວ່າພູດສູນກາງບໍ່ໄດ້ຕາມແຜນການຊຶ່ງບັນລຸພຽງແຕ່ 84,37% ຂອງມະຕິສະພາ, ແຕ່ພູດທ້ອງຖິ່ນແມ່ນລື່ນຄາດໝາຍຊຶ່ງປະຕິບັດໄດ້ 120,19% (ລື່ນແຜນ20,19%).

ສຳລັບການຜັນຂະຫຍາຍວາລະແຫ່ງຊາດໃນການຈັດຕັ້ງປະຕິບັດມາດຕະການການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂກ່ຽວກັບບັນຫາຢາເສບຕິດ, ໂດຍໄດ້ຫັນເນື້ອໃນສອງວາລະແຫ່ງຊາດເປັນແຜນງານຈັດຕັ້ງປະຕິບັດ. ພ້ອມທັງມອບໝາຍຄວາມຮັບຜິດຊອບໃຫ້ບັນດາພະແນກການ, ກຳລັງ ປກຊ-ປກສ ແລະ ບັນດາເມືອງ, ຜ່ານມາໄດ້ມີການກວດກາ ແລະ ຕິດຕັ້ງຊິງຊັ່ງທັນສະໄໝຢູ່ດ່ານຊາຍແດນ, ປັບປຸງລະບຽບການຄຸ້ມຄອງຂຸດຄົ້ນບໍ່ແຮ່, ແກ້ໄຂການນຳເຂົ້າພາຫະນະທີ່ບໍ່ຖືກຕ້ອງ, ປ້ອງກັນ, ປາບປາມການຊື້-ຂາຍ ແລະ ເສບຢາເສບຕິດ, ຄຽງຄູ່ກັບການແກ້ໄຂຜົນກະທົບການລະບາດຂອງພະຍາດໂຄວິດ-19 ເພື່ອຟື້ນຟູເສດຖະກິດ ແລະ ວາງແຜນຮັບມືໄພພິບັດທຳມະຊາດທີ່ເຄີຍເກີດຂຶ້ນຢູ່ທ້ອງຖິ່ນຕ່າງໆ, ທັງໄດ້ສ້າງພື້ນຖານໂຄງລ່າງທີ່ສຳຄັນຈຳນວນໜຶ່ງ.

ໂອກາດສຳຄັນນີ້, ປະທານສານປະຊາຊົນສູງສຸດ ກໍໄດ້ມີຄໍາເຫັນໂອ້ລົມ, ໂດຍເນັ້ນໃຫ້ການນຳແຂວງຄຳມ່ວນ ສືບຕໍ່ຜັນຂະຫຍາຍມະຕິຂອງພັກກໍ່ຄືມະຕິກອງປະຊຸມໃຫຍ່ຂອງແຂວງໃຫ້ໄປຕາມທິດທາງທີ່ວາງໄວ້. ໂດຍສະເພາະແມ່ນການປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດການເງິນ ແລະ ແກ້ໄຂບັນຫາຢາເສບຕິດ, ຊຶ່ງທຸກພາກສ່ວນຕ້ອງມີສ່ວນຮ່ວມໃນການຈັດເກັບລາຍຮັບນັບແຕ່ໜ້ອຍຫາຫຼາຍ ໂດຍອີງໃສ່ທ່າແຮງຂອງແຂວງ, ເອົາໃຈໃສ່ສົ່ງເສີມສີມືແຮງງານ ແລະ ສົ່ງເສີມການຜະລິດຂອງປະຊາຊົນດ້ວຍຫຼາຍຮູບແບບ ເພື່ອສ້າງຖານລາຍຮັບໃຫ້ຫຼາຍຂຶ້ນ. ພ້ອມນັ້ນ, ກໍຕ້ອງປະຕິບັດດຳລັດວ່າດ້ວຍການປະຢັດ ແລະ ເພີ່ມທະວີວຽກງານປ້ອງກັນຊາດ-ປ້ອງກັນຄວາມສະຫງົບ, ຄຽງຄູ່ກັບການປ້ອງກັນການລະບາດຂອງພະຍາດໂຄວິດ-19ເພື່ອຮັບປະກັນໃຫ້ແກ່ການພັດທະນາແຂວງ.

ໃນໂອກາດດຽວກັນ, ທ່ານ ນາງ ວຽງທອງ ສີພັນດອນ ກໍໄດ້ໄປຢ້ຽມຢາມສານປະຊາຊົນເຂດ1 ແລະ ພົບປະໂອ້ລົມພະນັກງານສານແຂວງ ແລະ ສານເຂດ ອີກດ້ວຍ.

แชร์