ກະຊວງພາຍໃນ ກຳນົດເຂດແດນເຊື່ອມຕໍ່ 4 ແຂວງ

ເພື່ອບັນທຶກ ແລະ ຖ່າຍທອດເສັ້ນເຂດແດນເຊື່ອມຕໍ່ລົງໃນແຜນທີ່ພູມສັນຖານ, ດັ່ງນັ້ນ ກະຊວງພາຍໃນ, ຈິ່ງໄດ້ຈັດປະຊຸມຖ່າຍທອດເສັ້ນເຂດແດນເຊື່ອມຕໍ່ລະຫວ່າງ ແຂວງໄຊສົມບູນ ກັບ ແຂວງຫຼວງພຣະບາງ, ແຂວງໄຊສົມບູນ ກັບ ແຂວງວຽງຈັນ ແລະ ກວດກາທິດເນັ່ງເສັ້ນເຂດແດນເຊື່ອມຕໍ່ລະຫວ່າງ ແຂວງວຽງຈັນ ກັບ ແຂວງບໍລິຄໍາໄຊ.

ເປັນປະທານໃນວາລະດຳເນີນກອງປະຊຸມເມື່ອລະຫວ່າງວັນທີ 10-11 ກຸມພາ 2022, ໂດຍ ທ່ານ ທອງຈັນ ມະນີໄຊ ລັດຖະມົນຕີກະຊວງພາຍໃນ, ມີຄະນະຮັບຜິດຊອບແກ້ໄຂເຂດແດນເຊື່ອມຕໍ່ຂອງກະຊວງພາຍໃນ ແລະ 4 ແຂວງ, ພ້ອມດ້ວຍຫົວໜ້າກົມ-ຮອງກົມ, ຫົວໜ້າພະແນກ-ຮອງພະແນກ, ບັນດາເຈົ້າເມືອງ ແລະ ວິຊາການທີ່ກ່ຽວຂ້ອງ ເຂົ້າຮ່ວມທັງໝົດ 54 ທ່ານ.

ໂດຍປະຕິບັດຕາມຜົນຂອງກອງປະຊຸມ ການກໍານົດເຂດແດນເຊື່ອມຕໍ່ລະຫວ່າງແຂວງໄຊສົມບູນ ກັບ ແຂວງວຽງຈັນ, ແຂວງໄຊສົມບູນ ກັບ ແຂວງຫຼວງພຣະບາງ ແລະ ແຂວງໄຊສົມ ບູນ ກັບ ແຂວງບໍລິຄຳໄຊ ເມື່ອຄັ້ງວັນທີ 2 ກຸມພາ 2021 ທີ່ຜ່ານມາ. ຊຶ່ງກອງປະຊຸມຄັ້ງນີ້, ກໍໄດ້ສືບຕໍ່ຄົ້ນຄວ້າ, ປຶກສາຫາລືຫຼາຍບັນຫາ ເພື່ອໃຫ້ມີຄວາມເປັນເອກະພາບກັນ, ໃນນັ້ນ ໄດ້ພ້ອມກັນຄົ້ນຄວ້າຈຸດຄົບເສັ້ນເຂດແດນເຊື່ອມຕໍ່ ຢູ່ 2 ຈຸດຄື: ຈຸດຄົບ (ຈຸດເຊື່ອມຕໍ່) ແຂວງໄຊສົມບູນ-ຫຼວງພຣະບາງ-ວຽງຈັນ, ແມ່ນເຫັນດີເປັນເອກະພາບກໍານົດເອົາຢູ່ຈຸດຈອມພູມາຢາ, ໄດ້ຕົກລົງເປັນເອກະພາບກໍານົດຈຸດຄົບ ຢູ່ຈຸດສູງ 882 ຊຶ່ງເປັນຈຸດຄົບແຂວງໄຊສົມບູນ-ວຽງຈັນ-ບໍລິຄຳໄຊ, ທັງໄດ້ພັນລະນາເຂດແດນເຊື່ອມຕໍ່ລະຫວ່າງ ແຂວງໄຊສົມບູນ ກັບ ແຂວງຫຼວງພຣະບາງ, ແຂວງໄຊສົມບູນ ກັບ ແຂວງວຽງຈັນ, ກວດກາ ແລະ ພັນລະນາທິດເນັ່ງເສັ້ນເຂດແດນເຊື່ອມຕໍ່ລະຫວ່າງ ແຂວງວຽງຈັນ ກັບ ແຂວງບໍລິຄໍາໄຊ.

ໃນໂອກາດດຽວກັນ, ກໍໄດ້ພ້ອມກັນຖ່າຍທອດເສັ້ນເຂດແດນເຊື່ອມຕໍ່ລົງໃນແຜນທີ່ພູມສັນຖານມາດ ຕາສ່ວນ 1:100.000 ແລະ ໄດ້ມີພິທີເຊັນບົດບັນທຶກຮ່ວມກັນເພື່ອເປັນຫຼັກຖານ ແລະ ຂໍ້ມູນໃຫ້ແກ່ການຈັດຕັ້ງປະຕິບັດໃນຕໍ່ໜ້າ.

• 15/02/2022