ບຸນວັດພູປີນີ້ ຊູພິທີກຳທາງວັດທະນະທຳ ເນັ້ນປ້ອງກັນໂຄວິດ

ງານບຸນນະມັດສະການຜາສາດຫີນວັດພູ​ ຈໍາປາສັກ (ມໍລະດົກໂລກແຫ່ງທີ​ II​ ຂອງລາວ) ຈັດຂຶ້ນເມື່ອຕອນບ່າຍ​ຂອງວັນທີ​ 13​ ກຸມພາ​ 2022 ທີ່ເດີ່ນທາງຂຶ້ນຜາສາດຫີນວັດພູ,​ ພິເສດ ໃນນັ້ນແມ່ນໄດ້ຈັດຕັ້ງກອງບຸນຂຶ້ນ 11 ກອງ ເພື່ອອຸທິດເຖິງບັນພະບູລຸດ, ພໍ່ແມ່, ຄູບາ​-​ອາຈານ, ເຈົ້າຖິ່ນເຈົ້າຖານ, ເຈົ້າແມ່ທໍລະນີ ແລະ ເຈົ້າກຳນາຍເວນ ເພື່ອເປັນສິຣິມຸງຄຸນແກ່ຊາວແຂວງຈຳປາສັກ.

​ ເຂົ້າຮ່ວມໂດຍ ພຣະອາຈານ​ ສຸວັນ ຈັນທະຣາຊ ກໍາມະການສູນກາງອົງການພຸດທະສາສະໜາສຳພັນແຫ່ງ ສປປ ລາວ (ອພສ​) ປະທານ​ ອພສ​ ແຂວງ,​ ທ່ານ​ ວິໄລວົງ​ ບຸດ​ດາ​ຄໍາ​ ເຈົ້າແຂວງ​ຈໍາປາສັກ,​ ໃນນາມປະທານ​ຈັດງານ​ ພ້ອມພັນລະຍາ,​ ທ່ານ​ ສາຍທອງ​ ໄຊຍະວົງ​ ​ ປະທານສະພາປະຊາ ຊົນແຂວງ,​ ທ່ານ​ ສະນັ່ນ​ ສີພາພົມມະຈັນ​ ຫົວໜ້າ​ຄະນະຈັດຕັ້ງ​ແຂວງ,​ ທ່ານ​ ສະຫວາດ​ ແກ້ວບັນດິດ ​ ເຈົ້າເມືອງຈໍາປາສັກ, ມີບັນດາການນໍາແຂວງ,​ ການນໍາ​ 8 ເມືອງ,​ 1​ ນະຄອນ,​ ພ້ອມດ້ວຍພະນັກ ງານອາວຸໂສບໍານານ, ອະດີດການນໍາແຂວງ,​ ການນໍາຫ້ອງການຕ່າງໆຂອງເມືອງຈໍາປາສັກ,​ ເຖົ້າແກ່ມຸນໂທ​ ແລະ​ ມວນຊົນເຂົ້າຮ່ວມ.​

 ຢ່າງໃດກໍດີ, ກ່ອນເຖິງວັນຈັດງານບຸນນະມັດສະການຜາສາດຫີນວັດພູຈຳປາສັກ ປີ 2022,​ ທາງແຂວງກໍໄດ້ຈັດກິດຈະກໍາປູກຕົ້ນດອກຈໍາປາ ເພື່ອສ້າງໃຫ້ເປັນສວນອຸດທິຍານປະດັບປູຊະນິຍະສະຖານແຫ່ງນີ້ ທີ່ຕິດພັນກັບການຈັດງານທາງພຸດທະສາສະນະກິດ, ເພື່ອຮັກສາຮີດຄອງປະເພນີ,​ ວັດທະນະທໍາດີງາມຂອງຊາດ,​ ກໍຂອງທ້ອງຖິ່ນ.

ທັງນີ້, ກໍມີການເປີດໃຫ້ມວນຊົນເຂົ້ານະມັດສະການກາບໄຫວ້-ບູຊາພຣະພຸດທະຮູບ, ທ່ຽວຊົມ ຫໍວາງສະແດງວັດຖຸບູຮານ, ປະຫວັດການກໍ່ສ້າງຜາສາດຫີນວັດພູ, ທ່ຽວງານຕະຫຼາດນັດ ແລະ ຈຳໜ່າຍສິນຄ້າ​ທັງພາຍໃນ ແລະ​ ຕ່າງປະເທດ, ຊົມການແຂ່ງຂັນກີລາພື້ນເມືອງ, ສິລະປະດົນຕີ ແລະ ຊີມອາຫານທ້ອງຖິ່ນເອກະລັກເມືອງຈໍາປາສັກ ເຊັ່ນ: ເຂົ້າຫຼາມ,​ ປີ້ງໄກ່,​ ຕົ້ມໄກ່ໃສ່ໄຂ່ມົດແດງສົ້ມ.​ ໃນຄ່ຳຄືນວັນທີ 15 ກຸມພາ, ຈະມີພິທີທາງສາສະໜາ, ໄຫວ້ພຣະ,​ ຮັບ​ສິນ,​ ຟັງທຳສູດປະລິຕະມຸງຄຸນ ແລະ ໃນວັນທີ 16 ກຸມພາ ​ເລີ່ມແຕ່ເວລາ 6:3​0 ໂມງ,​ ຈະມີພິທີທໍາບຸນໃສ່ບາດ​ ແລະ​ ຖວາຍສັງຄະທານແດ່ພະສົງ 100 ອົງ. ຊຶ່ງຕະຫຼອດວາລະພິທີ, ແມ່ນໃຫ້ຜູ້ເຂົ້າຮ່ວມປະຕິບັດມາດຕະການປ້ອງກັນໂຄວິດ-19 ເພື່ອຄວາມປອດໄພຂອງທຸກຄົນ.

• 14/02/2022