ມື້ອື່ນ ຫວຽດນາມ ຍົກເລີກມາດຕະການຈຳກັດຖ້ຽວບິນ

ເລີ່ມແຕ່ວັນທີ 15 ກຸມພາ 2022 ເປັນຕົ້ນໄປ, ສສ ຫວຽດນາມ ຈະຍົກເລີກມາດຕະການຈຳກັດຈຳນວນຖ້ຽວບິນ ເຂົ້າ-ອອກ ລະຫວ່າງປະເທດຂອງສາຍການບິນທຸກແຫ່ງ.

​ລາຍງານຂ່າວຕ່າງປະເທດເມື່ອວັນທີ 13 ກຸມພາ 2022 ໄດ້ອ້າງຂໍ້ມູນຈາກ “ຕວຍເຕຣ” ໜັງສືພິມຂອງ ສສ ຫວຽດນາມ ທີ່ລະບຸວ່າ: ສຳນັກງານການບິນພົນລະເຮືອນແຫ່ງຊາດຫວຽດນາມ, ກຽມຍົກເລີກມາດຕະການຄວບຄຸມທາງສັງຄົມ ແລະ ສາທາລະນະສຸກກັບຖ້ຽວບິນຂອງທຸກປະເທດ, ທີ່ໃຫ້ບໍລິການເຂົ້າ-ອອກ ຫວຽດນາມ ຕັ້ງແຕ່ວັນທີ 15 ກຸມພາ, ຊຶ່ງຄວາມຖີ່ຂອງຖ້ຽວບິນຈະກັບມາທຽບເທົ່າກັບຊ່ວງເວລາດຽວກັນກັບໄລຍະກ່ອນເກີດການລະບາດພະຍາດໂຄວິດ-19.

​ທັງນີ້, ໜ່ວຍງານທີ່ກ່ຽວຂ້ອງຂອງຫວຽດນາມໄດ້ແຈ້ງເລື່ອງນີ້ໃຫ້ບັນດາສາຍການບິນຮັບຊາບຮຽບຮ້ອຍແລ້ວ. ຢ່າງໃດກໍຕາມ, ສາຍການບິນຂອງ ສປ ຈີນ ຍັງບໍ່ໄດ້ຕອບຮັບການກັບມາໃຫ້ບໍລິການລະຫວ່າງປະເທດກັບຫວຽດນາມເທື່ອ, ເນື່ອງຈາກສະຖານະການຂອງໂຄວິດ-19 ທີ່ຍັງຄົງລະບາດຢູ່.

​ຂະນະທີ່ ສສ ຫວຽດນາມ, ກໍຢືນຢັນຕົວເລກຜູ້ປ່ວຍໂຄວິດ-19 ມີຈພນວນເພີ່ມຂຶ້ນ 27.311 ຄົນ ເມື່ອວັນທີ 12 ກຸມພາ, ຊຶ່ງເປັນສະຖິຕິສູງສຸດຄັ້ງທຳອິດນັບຕັ້ງແຕ່ການລະບາດໂຄວິດ-19 ເມື່ອປີ 2020, ເຮັດໃຫ້ມີຕົວເລກຜູ້ຕິດເຊື້ອສະສົມແລ້ວ 2.484.481 ຄົນ ແລະ ເສຍຊີວິດສະສົມຢ່າງໜ້ອຍ 38.862 ລາຍ, ຊຶ່ງເພີ່ມຂຶ້ນໃນຮອບວັນເຖິງ 78 ລາຍ.

แชร์