ມີນານີ້ ພົບງານມະຫະກໍາສີມືແຮງງານລາວ 2022 ທີ່ວຽງຈັນເຊັນເຕີ

ງານມະຫະກໍາສົ່ງເສີມສີມືແຮງງານລາວ 2022 ຈະຈັດຂຶ້ນໃນລະຫວ່າງວັນທີ 16-20 ມີນາ 2022 ທີ່ສູນການຄ້າວຽຈັນເຊັນເຕີ, ນະຄອນຫຼວງວຽງຈັນ. ກິດຈະກໍາດັ່ງກ່າວຖືເປັນໂອກາດດີຂອງນັກຮຽນ, ນັກສຶກສາ, ແຮງງານປະຊາຊົນບັນດາເຜົ່າ, ນັກທຸລະກິດ, ພາກລັດ ແລະ ເອກະຊົນ ທັງພາຍໃນ ແລະ ຕ່າງປະເທດ ທີ່ຈະໄດ້ພົບປະ ແລະ ເຂົ້າເຖິງຂໍ້ມູນອັນເປັນປະໂຫຍດໃນດ້ານການສົ່ງເສີມວຽກເຮັດງານທຳ.

ງານນີ້ຈັດໂດຍ ສະພາການຄ້າ ແລະ ອຸດສາຫະກໍາແຫ່ງຊາດລາວ ຮ່ວມກັບ ກະຊວງແຮງງານ ແລະ ສະຫວັດດີການສັງຄົມ, ກະຊວງສຶກສາທິການ ແລະ ກີລາ ພ້ອມດ້ວຍ ສູນກາງສະຫະ ພັນກໍາມະບານລາວ. ໂດຍທ່ານ ໄຊບັນດິດ ຣາຊະພົນ ຮອງປະທານສະພາການຄ້າ ແລະ ອຸດສາຫະກໍາແຫ່ງຊາດລາວ ໄດ້ຖະແຫຼງຕໍ່ສື່ເມື່ອວັນທີ 10 ກຸມພາ 2022 ວ່າ: ສີມືແຮງງານລາວ ເປັນບັນຫາທີ່ສໍາຄັນຊີ້ບອກການພັດທະນາຊັບພະຍາກອນມະນຸດ, ການມີວຽກເຮັດງານທໍາ ແລະ ການຍົກສູງຜະລິດຕະພາບ, ທັງເປັນໜຶ່ງທ່າແຮງພື້ນຖານໃນການພັດທະນາເສດຖະກິດ-ສັງຄົມຂອງປະເທດ; ໂດຍສະເພາະແມ່ນການຊ່ວຍຊຸກຍູ້ສ້າງຜູ້ປະກອບການ, ການປະກອບອາຊີບອິດສະຫຼະ, ການຜະລິດເປັນສິນຄ້າ, ການຄໍ້າປະກັນສະບຽງອາຫານ, ການບໍລິການ, ການເຄື່ອນໄຫວທຸລະກິດ, ການຫັນເປັນອຸດສາຫະກໍາ ແລະ ທັນສະໄໝ ແລະ ການຍົກສູງຊີວິດການເປັນຢູ່ຂອງປະຊາຊົນບັນດາເຜົ່າ. ໂດຍລັດຖະບານ ໄດ້ເອົາໃຈໃສ່ຊີ້ນຳ ແລະ ຖືເປັນບຸລິມະສິດ, ແນໃສ່ພັດທະນາສີມືແຮງງານ ໃຫ້ສອດ ຄ່ອງກັບການຂະຫຍາຍຕົວຂອງເສດຖະກິດ-ສັງຄົມ ແລະ ການເຊື່ອມໂຍງກັບພາກພື້ນ ແລະ ສາກົນ ໃນແຕ່ລະໄລຍະ.

ທັງນີ້, ຈິ່ງເຊີນຊວນທົ່ວສັງຄົມ ແລະ ການຈັດຕັ້ງທຸກພາກສ່ວນ ເຂົ້າຮ່ວມຊົມກິດຈະກໍາ ຕ່າງໆຕາມວາລະຂອງງານ, ເພື່ອປະກອບສ່ວນ ແລະ ສະໜັບສະໜູນຢ່າງແຂງແຮງໃຫ້ທຸກໆກິດຈະກໍາມີບັນຍາກາດທີ່ຄຶກຄື້ນ ແລະ ເກີດຜົນປະໂຫຍດສູງສຸດ.

แชร์