ເອກະຊົນ ຈະເຂົ້າຂຸດຄົ້ນບໍ່ຄຳທີ່ຊຽງຂວາງ

ລັດຖະບານແຫ່ງ ສປປ ລາວ, ອະນຸຍາດໃຫ້ບໍລິສັດ ນິກສັນ ພັດທະນາບໍ່ແຮ່ ຈໍາກັດຜູ້ດຽວ, ຮັບສຳປະທານຂຸດຄົ້ນ, ປຸງແຕ່ງ, ສົ່ງອອກແຮ່ທອງ ແລະ ແຮ່ຄໍາ ໃນເນື້ອທີ່ 18,28 ຕາກິໂລແມັດ, ໃນອາຍຸສັນຍາ 20 ປີ.

ທັງນີ້, ໄດ້ມີພິທີເຊັນສັນຍາເມື່ອຕອນແລງຂອງວັນທີ 10 ກຸມພາ 2022, ທີ່ຫອ້ງການກະຊວງແຜນການ ແລະ ການລົງທຶນ ນະຄອນຫຼວງວຽງຈັນ, ຕາງໜ້າລັດຖະບານແຫ່ງ ສປປ ລາວ ລົງນາມໂດຍ ທ່ານ ນາງ ຄໍາຈັນ ວົງແສນບູນ, ຮອງລັດຖະມົນຕີກະຊວງແຜນການ ແລະ ການລົງທຶນ ກັບ ທ່ານ ນິກສັນ ພົມມະວິຈິດ ປະທານກຸ່ມບໍລິສັດນິກສັນ ພັດທະນາບໍ່ແຮ່ ຈໍາກັດຜູ້ດຽວ, ຊຶ່ງເປັນຜູ້ລົງທຶນ ແລະ ຖືຫຸ້ນ 100%. ເຂົ້າຮ່ວມເປັນສັກຂີພິຍານໂດຍ ທ່ານ ບຸນຈັນ ສີວົງພັນ ເຈົ້າແຂວງຊຽງຂວາງ, ທ່ານ ທອງພັດ ອິນທະວົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ມີພະນັກງານ ວິຊາການກ່ຽວຂ້ອງ, ພ້ອມດ້ວຍທ່ານ ບຸນຍູ້ ສີສານ ທີ່ປຶກສາຂອງ ບໍລິສັດນິກສັນ ພັດທະນາບໍ່ແຮ່ ຈໍາກັດຜູ້ດຽວ.

ໃນວາລະດຽວກັນ ປະທານກຸ່ມບໍລິສັດນິກສັນ ພັດທະນາບໍ່ແຮ່, ກໍໄດ້ມອບພັນທະຄ່າຊັບພະຍາ ກອນລ່ວງໜ້າໃຫ້ລັດຖະບານກ່ອນ ຈໍານວນ 2.000.000 $ (ສອງລ້ານໂດລາສະຫະລັດ) ແລະ ຢືນຢັນຊ່ວຍສ້ອມແປງທາງໃຫ້ລັດຖະບານໂດຍບໍ່ໄດ້ຄິດໄລ່ລາຄາ ແລະ ບໍ່ໄດ້ຫັກຕົ້ນທຶນ ຊຶ່ງມີໄລຍະແຕ່ເຂດເມືອງຄໍາ ແຂວງຊຽງຂວາງ ຫາເຂດເມືອງຮ້ຽມ ແຂວງຫົວພັນ, ຄວາມຍາວທັງໝົດ 48 ກິໂລແມັດ, ລວມມູນຄ່າ 24.000.000.000 ກີບ (ຊາວສີ່ຕື້ກີບ). ໂດຍບໍລິສັດຈະລົງທຶນຂຸດຄົ້ນ ແລະ ສ້າງຕັ້ງໂຮງງານທັນສະໄໝຕາມມາດຕະຖານສາກົນ ດ້ວຍທຶນເບື້ອງຈໍານວນ 46.000.000 $  (ສີ່ສິບຫົກລ້ານໂດລາສະຫະລັດ).

ການອະນຸມັດໂຄງການນີ້, ແມ່ນປະຕິບັດຕາມແນວທາງພັດທະນາຂອງລັດຖະບານ ເພື່ອແນໃສ່ເຮັດໃຫ້ເສດຖະກິດແຫ່ງຊາດນັບມື້ເຕີບໃຫຍ່ຂະຫຍາຍຕົວ, ເພື່ອສ້າງລາຍຮັບໃຫ້ແກ່ລັດຖະບານ, ທັງເປັນການປະກອບສ່ວນເຮັດໃຫ້ປະຊາຊົນທີ່ອາໃສຢູ່ຂົງເຂດໃກ້ຄຽງໂຄງການໄດ້ມີວຽກເຮັດງານທໍາ, ມີລາຍຮັບເພີ່ມຂຶ້ນ ແລະ ມີທ່າກ້າວຫຼຸດພົ້ນອອກຈາກຄວາມທຸກຍາກ.

แชร์