ເຜີຍຜົນງານ ຖວທ ໃນປີ 2021

ໃນຕະຫຼອດໄລຍະ 1 ປີຜ່ານມາ, ໃນທ່າມກາງສະພາບຄວາມຫຍຸ້ງທາງດ້ານເສດຖະກິດ-ການເງິນ ແລະ ການລະບາດຂອງພະຍາດໂຄວິດ-19; ແຕ່ວ່າວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວກໍສືບຕໍ່ຂະຫຍາຍຕົວ ແລະ ໄດ້ຮັບການປັບປຸງດີຂຶ້ນທັງດ້ານປະລິມານ ແລະ ຄຸນນະພາບ, ປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມຂອງປະເທດເຮົາໃຫ້ມີຄວາມເຂັ້ມແຂງຂຶ້ນຕໍ່ເນື່ອງ, ປະກອບສ່ວນເຮັດໃຫ້ປະເທດຊາດມີຄວາມສະຫງົບ, ມີສະຖຽນລະພາບ ແລະ ຄວາມໝັ້ນຄົງທາງດ້ານການເມືອງທີ່ໜັກແໜ້ນ, ປະຊາຊົນບັນດາເຜົ່າມີຄວາມສາມັກຄີປອງດອງ ແລະ ມີຊີວິດການເປັນຢູ່ທາງດ້ານວັດຖຸ ກໍຄືຈິດໃຈນັບມື້ນັບດີຂຶ້ນ”.

ໂດຍທ່ານ ນາງ ສວນສະຫວັນ ວິຍະເກດ ລັດຖະມົນຕີ ກະຊວງຖະແຫຼງຂ່າວ, ວັດທະນະທໍາ ແລະ ທ່ອງທ່ຽວ (ຖວທ) ໄດ້ກ່າວໃນໂອກາດໄຂກອງປະຊຸມວຽກງານ (ຖວທ) ທົ່ວປະເທດ ປະຈຳປີ 2021 ແລະ ທິດທາງແຜນການ ປີ 2022 ຊຶ່ງໄຂຂຶ້ນໃນວັນທີ 10 ກຸມພາ 2022 ທີ່ນະຄອນຫຼວງວຽງຈັນ. ທັງນີ້, ມີຮອງລັດຖະມົນຕີ, ຮອງເຈົ້າແຂວງ, ຮອງເຈົ້າຄອງນະຄອນຫຼວງວຽງຈັນ, ຫົວໜ້າກົມ, ຮອງກົມ, ຫົວໜ້າພະແນກ ຖວທ ແຂວງໃນຂອບເຂດທົ່ວປະເທດ ແລະ ພາກສ່ວນກ່ຽວຂ້ອງເຂົ້າຮ່ວມ ທັງໃນຮູບແບບເຊິ່ງໜ້າ ແລະ ແບບທາງໄກ.

ໂດຍລັດຖະມົນຕີ ຖວທ ໃນນາມປະທານກອງປະຊຸມ, ໄດ້ກ່າວວ່າ “ໄປຄຽງຄູ່ກັບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ  XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5ປີ ຄັ້ງທີ IX, ການປະຕິບັດສອງວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ; ໃນນັ້ນ ທົ່ວຂະແໜງການ ຖວທ ກໍ່ໄດ້ສືບຕໍ່ປະຕິບັດໜ້າທີ່ການເມືອງຂອງຕົນ, ດ້ວຍຄວາມຮັບຜິດຊອບສູງ ເພື່ອພ້ອມກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຂອງອົງຄະນະພັກກະຊວງ ຖວທ ຄັ້ງທີ V ແລະ ແຜນພັດທະນາວຽກງານ ຖວທ ປີ 2021-2025 ສອດຫ້ອຍເຂົ້າສູ່ວຽກງານຕົວຈິງຂອງຂະແໜງການທັງສູນກາງ ແລະທ້ອງຖິ່ນຢ່າງເປັນຮູບປະທໍາ”.

ພ້ອມນັ້ນ, ທ່ານນາງ ສວນສະຫວັນ ວິຍະເກດ ກໍໄດ້ຍົກໃຫ້ເຫັນວ່າ “ວຽກງານ ຖວທ ແມ່ນວຽກງານຊຸກຍູ້ສົ່ງເສີມ, ພັດທະນາຄົນ ແລະ ສັງຄົມ, ແມ່ນວຽກງານສ້າງພື້ນຖານອະລະຍະທຳທາງດ້ານຈິດໃຈຂອງສັງຄົມ, ເຊິ່ງເປັນປັດໄຈປະກອບສ່ວນເຂົ້າໃນການຕັດສິນການຄົງຕົວ ແລະ ຂະຫຍາຍຕົວຂອງຊາດເຮົາໃຫ້ທຽບທັນກັບບັນດາອະລະຍະປະເທດຕ່າງໆ ແລະ ສາມາດເຂົ້າຮ່ວມກັບກະແສຄວາມກ້າວໜ້າຂອງຂະບວນວິວັດແຫ່ງການພັດທະນາໃນໂລກໄດ້; ຊຶ່ງຄະນະພັກ, ຄະນະນຳແຕ່ລະຂັ້ນ ທັງສູນກາງ ແລະ ທ້ອງຖິ່ນ ໄດ້ມີຄວາມຮັບຜິດຊອບສູງ ປະກອບສ່ວນເຂົ້າໃນການຊີ້ນຳ-ນໍາພາວຽກງານ ຖວທ ຢ່າງໃກ້ຊິດຕິດແທດ, ເຊິ່ງສະແດງອອກໃນການເອົາໃຈໃສ່ກໍານົດບັນດາແຜນການ, ແຜນງານ ແລະ ໂຄງການຈຸດສຸມຂອງວຽກງານ ຖວທ ເຂົ້າໃນແຜນພັດທະນາທັງຂັ້ນສູງກາງ ແລະທ້ອງຖິ່ນຢ່າງຖືກຕ້ອງສອດຄ່ອງ; ພະນັກງານ-ລັດຖະກອນ ທົ່ວຂະແໜງການ ຖວທ ໄດ້ມີຄວາມຫ້າວຫັນ ໃນການປະຕິບັດໜ້າທີ່ຂອງຕົນ, ບັນດາກົມ, ກອງອ້ອມຂ້າງກະຊວງ ແລະບັນດາພະແນກ ຖວທ ແຂວງ ແລະ ນະຄອນຫຼວງ ກໍໄດ້ເປັນເຈົ້າການປະຕິບັດໜ້າທີ່ການເມືອງດ້ວຍຄວາມຮັບຜິດຊອບສູງ, ເປັນເສນາທິການໃຫ້ແກ່ຄະນະພັກ-ຄະນະນຳກະຊວງ ກໍຄື ຄະນະພັກ ແລະ ອຳນາດການປົກຄອງທ້ອງຖິ່ນ.

​ກອງປະຊຸມຄັ້ງສໍາຄັນນີ້, ຈະດໍາເນີນເປັນເວລາ 2 ວັນ. ຊຶ່ງນອກຈາກສະຫຼຸບຕີລາຄາການຈັດຕັ້ງປະຕິບັດວຽກງານ ຖວທ ໃນໄລຍະ 1 ປີຜ່ານມາ ແລະ ການປະກອບຄໍາເຫັນຂອງຜູ້ເຂົ້າຮ່ວມກອງປະຊຸມແລ້ວ. ໃນຕອນທ້າຍກໍຈະໄດ້ຮັບຟັງການໂອ້ລົມຈາກການນໍາຂັ້ນສູງເພື່ອເປັນທິດຊີ້ນໍາໃນການຈັດຕັ້ງປະຕິບັດວຽກງານ ຖວທ ໃຫ້ມີຜົນສໍາເລັດໃໝ່ຍິ່ງໃຫຍ່ກວ່າເກົ່າ. 

 

แชร์