ປ່ວຍລາຍວັນກວ່າ 50 ພັນຄົນ ຍູ້ສະຖິຕິຕິດເຊື້ອໃໝ່ສູງສຸດໃນ ສ.ເກົາຫຼີ

ຜູ້ປ່ວຍໂຄວິດ-19ໃນ ສ.ເກົາຫຼີ ພຸ່ງເປັນສະຖິຕິໃໝ່ຫຼາຍກວ່າ 50 ພັນຄົນ ຕໍ່ວັນ, ທ່າມກາງການລະບາດຢ່າງໄວວາຂອງເຊື້ອ ”ໂອມິຄຣອນ” ຂະນະທີ່ຜູ້ຕິດເຊື້ອໃໝ່ທີ່ບໍ່ສະແດງອາການ ແລະສະແດງອາການແບບໜ້ອຍ, ກໍມີຕົວເລກຫຼາຍກວ່າ 1,7 ແສນຄົນ ທີ່ພາກັນປິ່ນປົວຕົນເອງຢູ່ເຮືອນ.

ສຳນັກຂ່າວຕ່າງປະເທດໄດ້ສະເໜີໂດຍອ້າງການລາຍງານຈາກນະຄອນໂຊລ ໃນວັນທີ 10 ກຸມພາ 2022 ວ່າ: ສຳນັກງານຄວບຄຸມ ແລະ ປ້ອງກັນພະຍາດຂອງ ສ.ເກົາຫຼີ (KCDA) ໄດ້ລາຍງານສະຖິຕິຜູ້ປ່ວຍໂຄວິດ-19 ມີຈຳນວນສະສົມຢ່າງໜ້ອຍ 1.185.361 ຄົນ ຊຶ່ງເພີ່ມຂຶ້ນ 54.122 ຄົນ. ທັງນີ້, ຖືເປັນສະຖິຕິລາຍວັນສູງສຸດນັບຕັ້ງແຕ່ຕົ້ນປີ 2020 ແລະ ນັບເປັນຄັ້ງທຳອິດທີ່ ສ.ເກົາຫຼີ ມີການຢືນຢັນຕົວເລກຜູ້ຕິດເຊື້ອລາຍວັນຫຼາຍກວ່າ 50 ພັນຄົນ.

ລາຍງານດຽວກັນໃຫ້ຮູ້ຕື່ມວ່າສະຖິຜູ້ປ່ວຍໂຄວິດ-19 ໃນ ສ.ເກົາຫຼີ ເພີ່ມຂຶ້ນເກືອບ 4 ເທົ່າພາຍໃນໄລຍະເວລາບໍ່ເຖິງ 2 ອາທິດ, ອັນເປັນຜົນມາຈາກການລະບາດຢ່າງໄວວາຂອງເຊື້ອ ”ໂອມິຄຣອນ” ຊຶ່ງກາຍເປັນສາຍພັນຫຼັກໃນປັດຈຸບັນ. ໂດຍ KCDA ກໍຄາດຄະເນວ່າຈຳນວນຜູ້ຕິດເຊື້ອໃນ ສ.ເກົາຫຼີ ອາດເພີ່ມຂຶ້ນເປັນ 1,7 ແສນຄົນຕໍ່ວັນພາຍໃນທ້າຍເດືອນນີ້. ຂະນະທີ່ສະຖິຕິຜູ້ເສຍຊີວິດຈາກໂຄວິດ-19 ໃນ ສ.ເກົາຫຼີ ກໍມີຕົວເລກສະສົມແລ້ວຢ່າງໜ້ອຍ 6.963 ລາຍ, ໃນນີ້ແມ່ນເພີ່ມຂຶ້ນໃໝ່ 20 ລາຍ.

ປັດຈຸບັນ, ລະບົບສາທາລະນະສຸກສຳລັບຜູ້ປ່ວຍໂຄວິດ-19 ໃນ ສ.ເກົາຫຼີ ແມ່ນສະຫງວນໄວ້ສຳລັບຜູ້ປ່ວຍອາການປານກາງຂ້ອນໄປຫາໜັກ ແລະ ຜູ້ຕິດເຊື້ອອາການວິກິດ ເປັນຕົ້ນກໍແມ່ນຜູ້ອາຍຸສູງ. ສ່ວນຜູ້ຕິດເຊື້ອທີ່ບໍ່ສະແດງອາການ ແລະ ມີອາການເລັກໜ້ອຍ, ໂດຍແພດໄດ້ແນະນຳໃຫ້ປະຕິບັດລະບົບແຍກຕົວແລະປິ່ນປົວຢູ່ເຮືອນ. ຊຶ່ງມາເຖິງຕອນນີ້,ຜູ້ປ່ວຍທີ່ຕ້ອງປິ່ນປົວຕົວເອງຢູ່ເຮືອນມີຕົວເລກສະສົມຢ່າງໜ້ອຍ 174.177 ຄົນ.

แชร์