ຮອງປະທານປະເທດຍົກເຄື່ອງມືສື່ຄືໜຶ່ງໃນບັນຫາທີ່ຄະນະໂຄສະນາຕ້ອງພັດທະນາ ແລະຄຸ້ມຄອງ

​ໃນໂອກາດທີ່ ທ່ານ ບຸນທອງ ຈິດມະນີ ຜູ້ປະຈຳການຄະນະເລຂາທິການສູນກາງພັກ, ຮອງປະທານປະເທດໄດ້ໃຫ້ກຽດໂອລົມຕໍ່ກອງປະຊຸມວຽກງານໂຄສະນາອົບຮົມທົ່ວປະເທດ ປະຈຳປີ 2021 ແລະ ທິດທາງແຜນການປະຈໍາປີ 2022 ຊຶ່ງຈັດຂຶ້ນເມື່ອວັນທີ່ 9 ກຸມພາ. ໂດຍທ່ານໄດ້ເນັ້ນໜັກ 7 ບັນຫາສໍາຄັນທີ່ຄະນະໂຄສະນາອົບຮົມສູນກາງພັກຕ້ອງໄດ້ເອົາໃຈໃສ່ເປັນພິເສດ ແລະໜຶ່ງໃນນັ້ນກໍ່ຄືວຽກງານສື່ເພື່ອໃຫ້ກາຍເປັນພາຫະນະທີ່ທັນສະໄໝໃນການສຶກສາອົບຮົມ ແລະສ່ອງແສງບັນຫາໄດ້ຢ່າງວ່ອງໄວທັນການ.

​ໂດຍຮອງປະທານປະເທດໄດ້ໃຫ້ທິດຊີ້ນໍາຄະນະພັກແຕ່ລະຂັ້ນຕ້ອງເພີ່ມທະວີການນຳພາ-ຊີ້ນຳວຽກງານການເມືອງ-ແນວຄິດ ກໍຄືວຽກງານໂຄສະນາອົບຮົມໃຫ້ແທດເຖິງ, ເລິກເຊິ່ງ ແລະ ແຂງແຮງກວ່າເກົ່າ. ຕ້ອງສ້າງການຫັນປ່ຽນຢ່າງແຂງແຮງ, ເລິກເຊິ່ງທາງດ້ານເນື້ອໃນ ແລະ ຮູບການຂອງການເຄື່ອນໄຫວວຽກງານໂຄສະນາອົບຮົມເພື່ອໃຫ້ສາມາດຕອບສະໜອງຄວາມຮຽກຮ້ອງຕ້ອງການໃນໄລຍະໃໝ່. ຕ້ອງຕີຖອຍບັນດາປະກົດການຫຍໍ້ທໍ້ຢູ່ພາຍໃນກົງຈັກການຈັດຕັ້ງຂອງພັກ-ລັດ, ອົງການຈັດຕັ້ງມະຫາຊົນ ແລະ ໃນສັງຄົມ. ໂດຍເລີ່ມຈາກການສຶກສາອົບຮົມພະນັກງານ, ສະມາຊິກພັກ ໃຫ້ມີຄຸນທາດການເມືອງ, ຄຸນສົມບັດສິນທຳປະຕິວັດ ແລະ ມີຄວາມເປັນແບບຢ່າງນຳໜ້າທີ່ດີໃນການປະຕິບັດໜ້າທີ່ ແລະ ການດຳລົງຊີວິດ; ພ້ອມທັງສະກັດກັ້ນສະພາບການຫັນປ່ຽນດ້ວຍຕົນເອງ ອັນເປັນຊ່ອງຫວ່າງໃຫ້ອິດທິກຳລັງປໍລະປັກໂຈມຕີ ແລະ ແຊກມ້າງ, ໃຫ້ສືບຕໍ່ເອົາໃຈໃສ່ຫຼາຍຂຶ້ນຕື່ມໃນວຽກງານຄົ້ນຄວ້າທິດສະດີ ແລະພຶດຕິກຳຂອງພັກ ຢ່າງຕໍ່ເນື່ອງ ແລະເລິກເຊິ່ງໂດຍສະເພາະການເກັບກຳສະຫຼຸບບົດຮຽນຂອງພັກເຮົາ ໃນການຄົ້ນຄວ້າຜັນຂະຫຍາຍບັນດາຫຼັກມູນທິດສະດີມາກ-ເລນິນ ເຂົ້າໃນສະພາບການຕົວຈິງຂອງປະເທດ. ບັນຫາສຳຄັນຕົ້ນຕໍ ແມ່ນການເລືອກເຟັ້ນ, ກໍ່ສ້າງ-ບໍາລຸງຍົກລະດັບຂອງພະນັກງານດ້ວຍການສົ່ງໄປຮຽນພາຍໃນ ແລະຕ່າງປະເທດສົມທົບລະຫວ່າງການບຳລຸງຍົກລະດັບທາງດ້ານທິດສະດີ-ວິຊາສະເພາະກັບການນຳໃຊ້ເຂົ້າໃນວຽກງານຕົວຈິງ. ຕ້ອງປັບປຸງລະບົບກົນໄກປະສານງານລະຫວ່າງຄະນະໂຄສະນາອົບຮົມສູນກາງພັກກັບຄະນະພັກກະຊວງ, ອົງການຕ່າງໆ ຢູ່ຂັ້ນສູນກາງ ແລະ ທ້ອງຖິ່ນ ໃຫ້ກົມກຽວ ແລະ ວ່ອງໄວ ເພື່ອຕິດຕາມ, ຊຸກຍູ້ການປະຕິບັດວຽກງານໂຄສະນາອົບຮົມໃຫ້ເປັນປົກກະຕິ, ເກັບກຳສະພາບແນວຄິດ-ຫາງສຽງສັງຄົມກໍຄືສະພາບແນວຄິດຂອງສະມາຊິກພັກ-ພະນັກງານ ແລະປະຊາຊົນ, ຊັ້ນຄົນຕ່າງໆ ໃນທົ່ວສັງຄົມ.

ພ້ອມດຽວກັນນັ້ນ, ກໍໃຫ້ເອົາໃຈໃສ່ການສ້າງ ແລະ ປັບປຸງຮູບການໂຄສະນາອົບຮົມ ຜ່ານພາຫະນະທີ່ທັນສະໄໝໃຫ້ແຂງແຮງກວ່າເກົ່າ. ເປັນຕົ້ນແມ່ນການນຳໃຊ້ພາຫະນະທາງດ້ານ ວັດທະນະທຳ ແລະ ສື່ສັງຄົມຕ່າງໆ ໃຫ້ແຫຼມຄົມ. ຕົ້ນຕໍແມ່ນການຍົກລະດັບຄຸນນະພາບການຄຸ້ມຄອງ, ຂະຫຍາຍ ແລະ ຍົກລະດັບຮູບແບບຂອງເຄື່ອງມືສື່ຕ່າງໆ ເຊັ່ນ: ໂທລະພາບ, ໜັງສືພິມ, ວິທະຍຸ ໃຫ້ເປັນຮູບແບບອິເລັກໂທຣນິກ ຜ່ານສື່ສັງຄົມອອນໄລນ໌ໃຫ້ຫຼາຍ ; ສ່ວນດ້ານເນື້ອໃນ ກໍໃຫ້ຍົກລະດັບການເຄື່ອນໄຫວທີ່ມີລັກສະນະນຳພາແນວຄິດ, ລັກສະນະຕໍ່ສູ້ ແລະ ລັກສະນະມະຫາຊົນຊຶ່ງຕ້ອງນໍາສະເໜີ ດ້ວຍຄວາມວ່ອງໄວ, ທັນການ ແລະ ຫຼາຍຮູບຫຼາຍທັງສີ, ທັງໃຫ້ມີຄວມຈັບອົກຈັບໃຈ.

แชร์