ຈີນຄູ່ຄ້າອັນດັບ 1 ຂອງ ລາວ

ໝາກຜົນຈາກຄວາມສໍາເລັດຂອງໂຄງການທາງລົດໄຟລາວ-ຈີນ, ໄດ້ເຮັດໃຫ້ການຄ້າແລະການຂົນສົ່ງທາງລົດໄຟຄຶກຄື້ນເປັນພິເສດ, ຊຶ່ງມາຮອດປັດຈຸບັນແມ່ນມີ 10 ປະເທດກາຍເປັນຄູ່ຄ້າລາຍໃຫຍ່ທີ່ລາວເຮົາສົ່ງອອກແລະນຳເຂົ້າສິນຄ້າຫຼາຍທີ່ສຸດ.ເຊິ່ງໃນນັ້ນ ສປ ຈີນ ແມ່ນຕະຫຼາດທີ່ຮັບຊື້ນສິນຄ້າຈາກລາວຫຼາຍເປັນອັນດັບໜຶ່ງ.

    ມີລາຍງານວ່າ ສະເພາະການຂົນສົ່ງຜ່ານເສັ້ນທາງລົດໄຟ ໃນໄລຍະບໍ່ເຖິງ 2 ເດືອນ ,ກໍສາມາດສ້າງສະຖິຕິຫຼາຍເຖິງ 59.500 ໂຕນ ເທົ່າກັບ 1ຕື້ 68 ລ້ານຢວນ,ຊຶ່ງບໍ່ພຽງແຕ່ສອງປະເທດລາວ-ຈີນເທົ່ານັ້ນ; ແຕ່ຍັງໄດ້ສົ່ງສິນຄ້າໄປອີກ10 ປະເທດທີ່ຢູ່ຕາມແລວທາງ ໜຶ່ງແລວໜຶ່ງເສັ້ນທາງ,ຈຶ່ງຖືເປັນການເພີ່ມພະລັງຂັບເຄື່ອນໃຫ້ກັບການຮ່ວມມືດ້ານເສດຖະກິດການຄ້າລະຫວ່າງຈີນກັບລາວໄດ້ຫຼາຍຂຶ້ນກວ່າທີ່ເຄີຍມີມາ.

ອີງຕາມຂໍ້ມູນຂ່າວສານການຄ້າ, ກະຊວງອຸດສາຫະກຳ ແລະ ການຄ້າ. ລະບຸລາວສົ່ງອອກສິນຄ້າເປັນມູນຄ່າ ປະມານ 7.000 ລ້ານໂດລາສະຫະລັດ ໃນນັ້ນຕະຫຼາດຮັບຊື້ຫຼັກໆປະກອບມີ ສປ ຈີນ 2.221 ລ້ານໂດລາ, ໄທ 2.187 ລ້ານໂດລາ, ຫວຽດນາມ 1.220 ລ້ານໂດລາ, ອອສເຕຣເລຍ 348 ລ້ານໂດລາ ແລະ ສະວິຕເຊີຣ໌ແລນດ໌ 116 ລ້ານໂດລາ.

ສ່ວນປະເທດທີ່ລາວນໍາເຂົ້າສິນຄ້າມາຫຼາຍທີ່ສຸດໄດ້ແກ່ໄທ 3.000 ລ້ານໂດລາສະຫະລັດ, ຈີນ 1.255 ລ້ານໂດລາສະຫະລັດ, ຫວຽດນາມ 499 ລ້ານໂດລາ, ສ ອະເມຣິກາ 250 ລ້ານໂດລາ ແລະ ຍີ່ປຸ່ນ 148 ລ້ານໂດລາ.

ຂະນະທີ່ລາຍງານຂອງດ່ານພາສີຄຸນໝິງກໍໃຫ້ຮູ້ວ່າ: ໃນໄລຍະບຸນກຸດຈີນປີນີ້, ປະລິມານການຂົນສົ່ງສິນຄ້າສາກົນຕາມເສັ້ນທາງລົດໄຟລາວ-ຈີນ (31 ມັງກອນຫາວັນທີ 6 ກຸມພາ) ມີທັງໝົດ 42 ຂະບວນ, ປະລິມານສິນຄ້າທັງໝົດປະມານ 20.300 ໂຕນ, ມູນຄ່າ217 ລ້ານຢວນ.

แชร์