ເລຂາທິການໃຫຍ່ ຢ້ຽມຢາມການຜະລິດເປັນສິນຄ້າທີ່ຜົ້ງສາລີ

ໃນວາລະທີ່ ທ່ານ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດແຫ່ງ ສປປ ລາວ,  ພ້ອມດ້ວຍພັນລະຍາ ແລະ ຄະນະໄດ້ເດີນທາງໄປຢ້ຽມຢາມ ແລະ ເຮັດວຽກຢູ່ແຂວງຜົ້ງສາລີ, ຊຶ່ງຕ້ອນຮັບໂດຍ ທ່ານ ຄຳຜອຍ ວັນນະສານ ກຳມະການສູນກາງພັກ, ເລຂາພັກແຂວງ ເຈົ້າແຂວງໆຜົ້ງສາລີ, ໜຶ່ງໃນຈຸດໝາຍສຳຄັນກໍແມ່ນການຕິດຕາມຊຸກຍູ້ກຸ່ມການຜະລິດເປັນສິນຄ້າ ເພາະຖືເປັນອີກໜຶ່ງທ່າແຮງສຳຄັນໃນການຂັບເຄື່ອນເສດຖະກິດ-ສັງຄົມຂອງແຂວງ.

ໂດຍທັງຄະນະ ໄດ້ໄປທາງໄປຢ້ຽມຢາມໂຮງງານປຸງແຕ່ງເຫຼົ້າຂຽວ ຢູ່ບ້ານຂຸນສຸກຫຼວງ ເມືອງຜົ້ງສາລີ, ຊຶ່ງເປັນສິນຄ້າທ່າແຮງປະເພດໜຶ່ງທີ່ມີຕົ້ນກຳເນີດ ແລະ ມີຊື່ສຽງທັງເປັນມໍລະດົກຕົກທອດມາຫຼາຍເຊັ່ນຄົນ, ໃນເມື່ອກ່ອນປະຊາຊົນໄດ້ປູກເຂົ້າ ແລະ ສາລີ ມາຜະລິດເປັນເຫຼົ້າ, ດ້ວຍການເຮັດແປ້ງເຫຼົ້າຈາກວັດຖຸດິບທຳມະຊາດ ແລະ ຜະລິດເຫຼົ້າຕາມຄວາມເຂົ້າໃຈເພື່ອຮັບໃຊ້ພາຍໃນຄອບຄົວ ແລະ ເປັນຂອງຝາກຂອງຕ້ອນ. ຢ່າງໃດກໍດີ, ກາງປີ 2016 ກໍມີການກໍ່ສ້າງໂຮງງານດ້ວຍເງິນລົງທຶນທັງໝົດ 900 ລ້ານກີບ ແລະ ສໍາເລັດການກໍ່ສ້າງໃນທ້າຍປີ 2018, ໂຮງງານເລີ່ມຜະລິດເຫຼົ້າຂຽວໃນຕົ້ນເດືອນ 1 ປີ 2020 ແລະ ໄດ້ຮັບການອະນຸຍາດນໍາໃຊ້ກາໝາຍ ໜຶ່ງເມືອງໜຶ່ງຜະລິດຕະພັນແຫ່ງຊາດ ໃນກາງປີດຽວກັນ.

ຈາກນັ້ນກໍໄດ້ເດີນທາງໄປຢ້ຽມຢາມກຸ່ມການຜະລິດຊາກໍແມນ, ຊຶ່ງສ້າງຕັ້ງຂຶ້ນໃນວັນທີ 26ກຸມພາ 2015 ເບື່ອງຕົ້ນມີຜູ້ສະໝັກໃຈເຂົ້າກຸ່ມ 45 ຄົນ, ປັດຈຸບັນມີສະມາຊິກພາຍໃນກຸ່ມ 6 ຄອບຄົວ 25 ຄົນ ຍິງ 15 ຄົນ, ມີກອງທຶນ 3,3 ລ້ານກີບ ແລະ ໄດ້ຮັບໃບອະນຸຍາດນໍາໃຊ້ກາໝາຍ ໜຶ່ງເມືອງໜຶ່ງຜະລິດຕະພັນ ໃນປີ 2016,  ປັດຈຸບັນມີໂຄງການ Cop ສະໜັບສະໜູນແຫຼ່ງທຶນເຊັ່ນ: ປັບປຸງອາຄານເຮືອນປຸງແຕ່ງຊາ, ຝຶກອົບຮົມດ້ານເທຄນິຄ-ການຕະຫຼາດ ແລະ ໄລຍະຜ່ານມາກຸ່ມຜະລິດຊາກໍແມນ ຍັງໄດ້ຮັບການຢັ້ງຢືນເປັນກຸ່ມຜະລິດຊາກະສິກຳອິນຊີລາວ, ກະສິກຳອິນຊີສາກົນ, ກາໝາຍໂອດ໊ອບ ແລະ ໄດ້ຮັບໃບຢັ້ງຢືນຖິ່ນກຳເນີດ (GI) ໃນປີ 2020, ສຳລັບຕະຫຼາດສົ່ງອອກໂດຍລວມແມ່ນສປ ຈີນ ແລະ ຢຸໂຣປ ລວມທັງອະເມຣິກາ. 

ພ້ອມນັ້ນ ກໍໄດ້ໄປຢ້ຽມຢາມໂຮງງານປຸງແຕ່ງຊາ ແສງຄໍາ ລາວລີ ຢູ່ບ້ານຈ່າພູ, ເມືອງຜົ້ງສາລີ. ຊຶ່ງໃນປີ 2014 ໄດ້ສ້າງເປັນໂຮງຂົ້ວຊາແບບຄອບຄົວ ແລະ ເຫັນວ່າພໍ່ຄ້າຊາວຈີນມີຄວາມສົນໃຈຫຼາຍຂຶ້ນ, ຮອດປີ 2018 ຈິ່ງໄດ້ສ້າງຕັ້ງເປັນໂຮງງານປຸງແຕ່ງຊາແສງຄຳ ລາວລີ, ຊຶ່ງມີຜະລິດຕະພັນຊາແດງ ແລະ ຊາຂຽວ ສະໜອງໃຫ້ຕະຫຼາດ, ປີ 2019 ໄດ້ຮັບການອະນຸຍາດນໍາໃຊ້ກາໝາຍ ໜຶ່ງເມືອງໜຶ່ງຜະລິດຕະພັນແຫ່ງຊາດ, ໄດ້ຮັບໃບຢັ້ງຢືນ GMP ແລະ ໄດ້ເຂົ້າຮ່ວມການແຂ່ງຂັນຊາສາກົນ ທີ່ຮົງກົ່ງ ແລະ ໄດ້ຮັບລາງວັນຊະນະເລີດ ປະເພດຊາທີ່ມີຄຸນນະພາບດີເດັ່ນ. ສ່ວນຕະຫຼາດສົ່ງອອກມີ ໄທ ແລະ ຈີນ, ຊຶ່ງ ສປ ຈີນ ກວມ 90%, ໄທ 5% ແລະ ລາວ 5% ມີ 3 ໂຄງການສະໜັບສະໜູນຄື: ໂຄງການ Cop, ໂຄງການໄບໂອເທຣນ ແລະ ໂຄງການ BAFD.

ໃນໂອກາດດຽວກັນ, ທ່ານ ທອງລຸນ ສີສຸລິດ ພ້ອມດ້ວຍພັນລະຍາ ແລະ ຄະນະ, ກໍໄດ້ໄປຢ້ຽມຊົມ ແລະ ກາບໄຫວ້ພຣະທາດມິ່ງຂວັນພູຟ້າ ຊຶ່ງເປັນພຣະທາດຄູ່ບ້ານຄູ່ເມືອງຂອງຊາວຜົ້ງສາລີ.

แชร์