ຮອງນາຍົກລັດຖະມົນຕີ ເຄື່ອນໄຫວຊີ້ນຳ ບໍລິສັດທາງລົດໄຟ ລາວ-ຈີນ

ທ່ານ ສອນໄຊ ສີພັນດອນ ຮອງນາຍົກລັດຖະມົນຕີ, ຫົວໜ້າຄະນະຊີ້ນໍາໂຄງການກໍ່ສ້າງທາງລົດໄຟລາວ-ຈີນ, ພ້ອມຄະນະ ໄດ້ເຄື່ອນໄຫວກວດກາ ແລະ ຊີ້ນໍາວຽກງານບໍລິສັດທາງລົດໄຟລາວ-ຈີນ ຈໍາກັດ ແລະ ຢ້ຽມຢາມໂຄງການກໍ່ສ້າງໂຮງຮຽນເທຄນິຄທາງລົດໄຟ(ຫຼັກ16), ສະຖານີຂົນສົ່ງສິນຄ້າວຽງຈັນໃຕ້ ແລະ ເຂດທ່າບົກທ່ານາແລ້ງ. ໃຫ້ການຕ້ອນຮັບໂດຍ ທ່ານ ຢວນ ໝິງ ຮາວ ຜູ້ອໍານວຍການບໍລິສັດລົດໄຟລາວ-ຈີນ ຈໍາກັດ, ຮ່ວມໃນຄະນະຄັ້ງນີ້ມີບັນດາຮອງລັດຖະມົນຕີ, ທ່ານ ພູຂົງ ບັນນະວົງ ຮອງເຈົ້າຄອງນະຄອນຫຼວງວຽງຈັນ, ພ້ອມດ້ວຍຄະນະຮັບຜິດຊອບໂຄງການກໍ່ສ້າງທາງລົດໄຟລາວ-ຈີນ ຊ່ວງນະຄອນຫຼວງວຽງຈັນ ແລະ ພະແນກການກ່ຽວຂ້ອງ.

ທັງນີ້, ຜູ້ອໍານວຍການບໍລິສັດລົດໄຟລາວ-ຈີນ ຈໍາກັດ ໄດ້ລາຍງານໃຫ້ຄະນະຊາບວ່າ: ທາງລົດໄຟລາວ-ຈີນ ຊ່ວງບໍ່ເຕັນຫານະຄອນຫຼວງວຽງຈັນ ປະກອບມີ 10 ສະຖານີຂົນສົ່ງໂດຍສານ, ໄດ້ເປີດນຳໃຊ້ແລ້ວ 7 ສະຖານີຄື: ສະຖານີນະຄອນຫຼວງວຽງຈັນ, ໂພນໂຮງ, ວັງວຽງ, ຫຼວງພຣະບາງ, ເມືອງໄຊ, ນາເຕີຍ ແລະ ບໍ່ເຕັນ, ສ່ວນສະຖານີຂົນສົ່ງສິນຄ້າປະກອບມີ 7 ແຫ່ງ. ໃນນີ້, ໄດ້ເປີດໃຫ້ບໍລິການຂົນສົ່ງສິນຄ້າແລ້ວ 3 ສະຖານີຄື: ວຽງຈັນໃຕ້, ວັງວຽງ ແລະ ນາເຕີຍ ຊຶ່ງໃນປັດຈຸບັນ ໄດ້ດຳເນີນກິດຈະການຂົນສົ່ງຄອນເທນເນີຣ໌.

ດ້ານການຂົນສົ່ງໂດຍສານແຕ່ມື້ເປີດໃຫ້ບໍລິການເຖິງວັນທີ 7 ກຸມພາ 2022, ໄດ້ແລ່ນລົດທັງໝົດ 119 ຄູ່, ຂົນສົ່ງຜູ້ໂດຍສານ 113.827 ຄົນ, ສະເລ່ຍ 1.721 ຄົນຕໍ່ວັນ, ມີລາຍຮັບປະມານ 12,98 ລ້ານຢວນ. ສ່ວນການຂົນສົ່ງສິນຄ້າໄດ້ແລ່ນລົດທັງໝົດ 130,5 ຄູ່, ປະລິມານສິນຄ້າສະສົມທີ່ຂົນສົ່ງ 139.422,65 ໂຕນ, ສະເລ່ຍ 2.112 ໂຕນຕໍ່ວັນ. ສະຖານີຊາຍແດນສົ່ງອອກ 129 ຂະ ບວນ 3.619 ລົດຫາງລາກ ຂາເຂົ້າ 136 ຂະບວນ 3.878 ລົດຫາງລາກ, ສະເລ່ຍລາຍຮັບ 48,84 ລ້ານຢວນ.

ສ່ວນການດຳເນີນງານທີ່ກ່ຽວຂ້ອງ, ໜຶ່ງໃນນັ້ນແມ່ນໄດ້ສະເໜີກ່ຽວກັບການຊົດເຊີຍການຍົກຍ້າຍ ຫຼື ເວນຄືນທີ່ດິນປະຕິບັດບໍ່ຄົບຖ້ວນ ກຳມະສິດທີ່ດິນບາງສ່ວນບໍ່ມີການກໍານົດແຈ້ງເຖິງບັນຫາ,ການເປີດຮັບສະໝັກພະນັກງານ, ການຝຶກອົບຮົມໃຫ້ແກ່ແຮງງານລາວ, ການວາງແຜນພັດ ທະນາລຽບຕາມເສັ້ນທາງລົດໄຟ, ການສ້າງຮ້ານຊັບພະສິນຄ້າ, ການພັດທະນາກວມລວມໃນສະຖານີລົດໄຟ ເພື່ອດໍາເນີນກິດຈະການບໍລິການລູກຄ້າທີ່ຝ່າຍລັດຖະບານລາວໃຫ້ຄວາມຮ່ວມມື ແລະ ສະໜັບສະໜູນ, ການເພີ່ມທະວີແກ້ໄຂບັນຫາການໂຄສະນາທາງລົບຕໍ່ໂຄງການ ແລະ ມາດຕະການຊ່ວຍ ເຫຼືອອື່ນໆ. ຊຶ່ງໃນວາລະດຽວກັນ, ພາກສ່ວນກ່ຽວຂ້ອງ ກໍໄດ້ປະກອບຄຳຄິດເຫັນ ເພື່ອເຮັດໃຫ້ການປະຕິບັດໜ້າທີ່ຂອງບໍລິສັດທາງລົດໄຟລາວ-ຈີນ ມີຄວາມເໝາະສົມ ແລະ ສອດຄ່ອງກັບສະພາບຄວາມເປັນຈິງພາຍໃນປະເທດ. ໂດຍສະເພາະກໍແມ່ນການຄຸ້ມຄອງຄວາມປອດໄພ, ການພັດທະນາບຸກຄະລາກອນຄົນລາວ ເພື່ອມາເຮັດວຽກໃນໂຄງການທາງລົດໄຟຫຼາຍຂຶ້ນ, ການໄກ່ເກ່ຍ ແລະ ຊົດເຊີຍທີ່ດິນຕ່າງໆໃນ 4 ຕົວເມືອງຂອງນະຄອນຫຼວງວຽງຈັນ ທີ່ໄດ້ຮັບຜົນກະທົບຈາກການກໍ່ສ້າງທາງລົດໄຟລາວ-ຈີນ.

ໂອກາດນີ້, ຮອງນາຍົກລັດຖະມົນຕີ ໄດ້ກ່າວຊົມເຊີຍຄະນະຮັບຜິດຊອບກໍ່ສ້າງທາງລົດ ໄຟລາວ-ຈີນ, ທີ່ໄດ້ປະຕິບັດໜ້າທີ່ຢ່າງຕັ້ງໜ້າ. ຢ່າງໃດກໍດີ, ທ່ານໄດ້ເນັ້ນໃຫ້ຄະນະຮັບຜິດຊອບ ຈົ່ງສືບຕໍ່ເອົາໃຈໃສ່ແກ້ໄຂບັນຫາຄົງຄ້າງ, ໂດຍສະເພາະແມ່ນບັນຫາຊົດເຊີຍທີ່ດິນຂອງປະຊາຊົນໃນ 4 ເມືອງທີ່ໂຄງການທາງລົດໄຟຕັດຜ່ານ, ໃນນັ້ນ ຍັງມີ 304 ຕອນບໍ່ທັນໄດ້ຮັບການຊົດເຊີຍ. ອີງທັງທາງເຊື່ອມຕໍ່ຫາເສັ້ນທາງສະໜາມກີລາ ເຂົ້າໄປຫາສະຖານີລົດໄຟນະຄອນຫຼວງກໍຍັງຄ້າງຄາ, ທັງໃຫ້ເອົາ ໃຈໃສ່ກວດຄືນສະຖານນີຂົນສົ່ງສິນຄ້າໃຫ້ໄດ້ມາດຕະຖານ ເພື່ອລະບາຍສິນຄ້າ ແລະ ປຸກລະດົມຂົນຂວາຍປະຊາຊົນໃຫ້ມີຄວາມເຂົ້າໃຈເສຍສະຫຼະປະກອບສ່ວນເຂົ້າໃນຂະບວນການກໍ່ສ້າງໂຄງການດັ່ງກ່າວ. ດ້ານວຽກງານປິ່ນອ້ອມ, ກໍໃຫ້ມີການປຶກສາຫາລືຕື່ມກັບພາກສ່ວນກ່ຽວຂ້ອງ ເພື່ອໃຫ້ມີເຂດພັດທະນາໃໝ່, ແນໃສ່ສ້າງວຽກເຮັດງານທໍາ ແລະ ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ. ພ້ອມເນັ້ນໃຫ້ບໍລິສັດທາງລົດໄຟລາວ-ຈີນ ເອົາໃຈໃສ່ສ້າງເງື່ອນໄຂອໍານວຍຄວາມສະດວກ,ສະໜອງງົບປະມານໃຫ້ກຳລັງ ປກສ-ປກຊ ທີ່ປະຕິບັດໜ້າທີ່ເວນຍາມຮັກສາຄວາມປອດໄພຕາມແລວທາງລົດໄຟລາວ-ຈີນ.

แชร์