ເສີມທັກສະເຕະບານໃຫ້ 10 ໂຮງຮຽນປະຖົມໃນຫຼວງພຣະບາງ

ສະຫະພັນບານເຕະແຫ່ງຊາດລາວ ຮ່ວມກັບ ສະຫະພັນບານເຕະແຂວງຫຼວງພຣະບາງ, ໄດ້ຈັດກິດຈະກໍາຝຶກທັກສະຂັ້ນພື້ນຖານຂອງກີລາເຕະບານໃຫ້ແກ່ນັກຮຽນຊັ້ນປະຖົມ ທັງຍິງ ແລະ ຊາຍ ພາຍໃນ 10 ໂຮງຮຽນຂອງນະຄອນຫຼວງພຣະບາງ. ເຂົ້າຮ່ວມໃນກິດຈະກຳຊຶ່ງຈັດຂຶ້ນເມື່ອບໍ່ດົນມານີ້, ໂດຍທ່ານ ສົມສະຫວາດ ເລັ່ງສະຫວັດ ປະທານກິຕິມະສັກສະຫະພັນບານເຕາະແຫ່ງຊາດລາວ, ພ້ອມດ້ວຍການນໍາຂອງແຂວງ.

ໂດຍທັງ 10 ໂຮງຮຽນ ໄດ້ສົ່ງເຍົາວະຊົນທີ່ມີພອນສະຫວັນ ແລະ ມັກຮັກໃນກີລາເຕະບານ ມາຮ່ວມຝຶກຊ້ອມສ້າງທັກສະໂຮງຮຽນລະ 10 ຄົນ. ທັງນີ້, ກໍມີຄູຝຶກຈາກສະຫະພັນບານເຕາະແຫ່ງຊາດລາວ ເປັນຜູ້ຝຶກແອບໃຫ້, ໂດຍເນັ້ນໃສ່ເທຄນິຄການເຕະບານເປັນຫຼັກ. ທ່ານ ວົງເພັດ ອຸດົມລິດ ຫົວໜ້າພະແນກສຶກສາທິການ ແລະ ກີລາແຂວງຫຼວງພຣະບາງ, ໄດ້ໃຫ້ສໍາພາດວ່າ “ການຈັດກິດຈະກຳຄັ້ງນີ້, ຈະຊ່ວຍປູກຈິດສຳນຶກໃຫ້ກັບເຍົາວະຊົນຂອງແຂວງຫຼວງພຣະບາງ ຫັນມາໃສ່ໃຈຫຼິ້ນກີລາຫຼາຍຂຶ້ນ; ທັງເປັນການຊຸກຍູ້ສັງຄົມຫັນມາໃຫ້ຄວາມສໍາຄັນຕໍ່ການຫຼິ້ນກີລາ ເພື່ອໃຫ້ທຸກຄົນມີສຸ ຂະພາບແຂງແຮງ ແລະ ປັດສະຈາກໂຣກໄພໄຂ້ເຈັບ”.

ໂອກາດນີ້, ທ່ານ ສົມສະຫວາດ ເລັ່ງສະຫວັດ ກໍໄດ້ມອບບານເຕະ 100 ໜ່ວຍ, ໃຫ້ຄະນະອຳນວຍການ 10 ໂຮງຮຽນ ທີ່ເຂົ້າຮ່ວມກິດຈະກໍາ, ເພື່ອນຳໃຊ້ເຄື່ອນໄຫວກີລາຢູ່ພາຍໃນໂຮງຮຽນ. ຈາກນັ້ນ, ກໍໄດ້ຈັດກິດຈະກໍາເຕະບານເພື່ອມິດຕະພາບລະຫວ່າງ ຄະນະນຳສະຫະພັນບານເຕະແຫ່ງຊາດລາວ ກັບ ນັກກີລາອາວຸໂສຂອງສະຫະພັນບານເຕະແຂວງຫຼວງພຣະບາງ.

ຂອບໃຈຂໍ້ມູນຂ່າວ: ແຂວງຫຼວງພຣະບາງ

• 09/02/2022