ປະຊາກອນຂອງພູມີພາກແຫຼມແອຟຣິກາ ກຳລັງຫິວໂຫຍຮຸນແຮງ

ໜ່ວຍງານດ້ານອາຫານຂອງສະຫະປະຊາຊາດ, ສະແດງຄວາມກັງວົນຕໍ່ພາວະຂາດແຄນອາຫານຢ່າງໜັກໃນພູມີພາກແຫຼມແອຟຣິກາ ຫຼື ແອຟຣິກາຕາເວັນອອກສຽງເໜືອ, ຊຶ່ງປະຊາກອນໃນພື້ນທີ່ຫຼາຍກວ່າ 13 ລ້ານຄົນ ພວມທົນທຸກທໍລະມານກັບສະພາບອຶດຫິວອາຫານໃນລະດັບຮຸນແຮງ.

ລາຍງານຂອງສຳນັກຂ່າວຕ່າງປະເທດ ໃນວັນທີ 9 ກຸມພາ 2022, ຊຶ່ງອ້າງຂໍ້ມູນຈາກໂຄງການອາຫານໂລກ (WFP) ທີ່ເມືອງເຈນີວາ ປະເທດສະວິຕເຊີຣ໌ແລນດ໌. ທັງນີ້, ມີການອະທິບາຍລາຍລະອຽດເທິງລົດບັນທຸກອາຫານ ແລະ ພາບຂອງປະຊາຊົນໃນເມືອງວາເຈຍຣ໌,ທາງຕາເວັນອອກສຽງເໜືອຂອງປະເທດເຄນຢາ.

ຢ່າງໃດກໍຕາມ, ວິກິດໄພແລ້ງຕິດຕໍ່ກັນ 3 ລະດູການ ສົ່ງຜົນໃຫ້ສະພາບອາກາດໃນພູມີພາກນີ້ແຫ້ງແລ້ງສຸດໆໃນຮອບ 4 ທົດສະວັດ; ຊໍ້າຮ້າຍເຂົ້າໄປຕື່ມກໍຄື ປະລິມານນໍ້າຝົນໃນປີນີ້ຍັງຄົງມີທ່າອຽງຫຼຸດຕໍ່າກວ່າມາດຕະຖານ. ໃນນັ້ນ, ປະເທດທີ່ໄດ້ຮັບຜົນກະທົບໜັກສຸດກໍຄື ໂຊມາເລຍ ຊຶ່ງໃນລະຫວ່າງປີ 2010-2012 ປະຊາກອນໂຊມາເລຍໄດ້ຮັບຄວາມເດືອດຮ້ອນຮຸນແຮງຈາກໄພອຶດຫິວປະມານ 2,5 ແສນຄົນ, ທີ່ໜ້າສົງສານກໍຄືເຄິ່ງໜຶ່ງຂອງຈຳນວນຜູ້ທຸກຍາກຫິວໂຫຍເຫຼົ່ານັ້ນແມ່ນເດັກນ້ອຍ.

ທາງດ້ານກອງທຶນເພື່ອເດັກແຫ່ງສະຫະປະຊາຊາດ (ຢູນິເຊຟ) ກໍມີລາຍງານເພີ່ມເຕີມວ່າ: ປະຊາກອນໄວເດັກປະມານ 5,5 ລ້ານຄົນໃນໂຊມາເລຍ, ເຄນຢາ ແລະ ເອທິໂອເປຍ ກຳລັງປະສົບກັບພາວະຂາດແຄນອາຫານຢ່າງໜັກຈົນອາດເຖິງຂັ້ນອັນຕະລາຍ; ຫາກເດັກຢູ່ລອດກໍຈະມີຜົນກະທົບດ້ານລົບຕໍ່ພັດທະນາການໃນໄລຍະຍາວ. ດັ່ງນັ້ນ, ຢູນິເຊຟ ຈິ່ງອອກມາຮຽກຮ້ອງໃຫ້ທຸກພາກສ່ວນຈົ່ງຮ່ວມກັນດຳເນີນການເພື່ອຫຼີກເວັ້ນພາວະດັ່ງກ່າວໃຫ້ໄດ້ຫຼາຍທີ່ສຸດ.

แชร์