ອຸດົມໄຊ ພັດທະນາເຂດອຸດສາຫະກຳ ແລະໂລຈິສຕິກ

ແຂວງອຸດົມໄຊ ໄດ້ເຊັນບົດບັນທຶກຄວາມເຂົ້າໃຈ ວ່າດ້ວຍການສໍາຫຼວດ, ເກັບກໍາຂໍ້ມູນ ແລະ ຂອບເຂດພື້ນທີ່ ເພື່ອສຶກສາຄວາມເປັນໄປໄດ້ເບື້ອງຕົ້ນໃນການພັດທະນາເຂດອຸດສາຫະກຳ ແລະ ສູນໂລຈິສຕິກ ເມືອງໄຊ ແລະ ເມືອງນາໝໍ້.

ວາລະລົງນາມຈັດຂຶ້ນເມື່ອວັນທີ 7 ກຸມພາ 2022, ລະຫວ່າງ ທ່ານ ຄຳຈັນ ລາວຈືເບັງ ຮອງຫົວໜ້າພະແນກແຜນການ ແລະ ການລົງທຶນແຂວງອຸດົມໄຊ ກັບ ທ່ານ ອຸເດດ ສຸວັນນະວົງ ປະທານສະພາການຄ້າ ແລະ ອຸດສາຫະກຳແຫ່ງຊາດລາວ, ເຂົ້າຮ່ວມເປັນສັກຂີພິຍານໂດຍ ທ່ານ ຄຳແພງ ໄຊສົມແພງ ລັດຖະມົນຕີກະຊວງອຸດສາຫະກຳ ແລະ ການຄ້າ ແລະ ທ່ານ ອ່ອນແກ້ວ ອຸ່ນອາລົມ ຮອງເຈົ້າແຂວງອຸດົມໄຊ.

ພາຍຫຼັງສຳເລັດການລົງນາມບົດບັນທຶກຄວາມເຂົ້າໃຈ, ທຸກຝ່າຍທີ່ກ່ຽວຂ້ອງກໍຈະໄດ້ເຄື່ອນໄຫວຈັດຕັ້ງປະຕິບັດຕາມພາລະບົດບາດ. ຊຶ່ງຂອບເຂດ ແລະ ເປົ້າໝາຍທີ່ຈະສຶກສາ, ສຳຫຼວດ ໃນການກຳນົດເປັນເຂດອຸດສາຫະກຳ ແລະ ສູນໂລຈິສຕິກ ຢູ່ເມືອງໄຊ ແມ່ນຢູ່ເຂດຫຼັກ 17 ບ້ານນາຮ້ວງ ແລະ ເຂດຫຼັກ 22 ລຽບຕາມເສັ້ນທາງ 13 ເໜືອ ທາງໄປເມືອງນາໝໍ້; ສ່ວນຢູ່ເມືອງນາໝໍ້ ແມ່ນຈຸດບ້ານນາສະຫວ່າງ ແລະ ບ້ານຂວາງຄຳ. ຢ່າງໃດກໍດີ, ຫາກໂຄງການນີ້ສຳເລັດຕາມແຜນ ກໍຈະສ້າງວຽກເຮັດງານທໍາໃຫ້ປະຊາຊົນໄດ້ມີອາຊີບທີ່ໝັ້ນຄົງ ແລະ ປະກອບສ່ວນເຮັດໃຫ້ເສດຖະກິດຂອງແຂວງມີບາດກ້າວຂະຫຍາຍຕົວ.

ໃນວາລະດຽວກັນ, ຍັງໄດ້ມີການລົງນາມບົດບັນທຶກຄວາມເຂົ້າໃຈ ວ່າດ້ວຍການສຳຫຼວດ, ເກັບກຳຂໍ້ມູນ, ກຳນົດພື້ນທີ່ເພື່ອສຶກສາຄວາມເປັນໄປໄດ້ໃນການພັດທະນາເຂດນິຄົມອຸດສາຫະກຳ ແລະ ສູນໂລຈິສຕິກ ຢູ່ 2 ເມືອງ ຂອງແຂວງອຸດົມໄຊ ແລະ ມີການລົງນາມລະຫວ່າງ ພະແນກອຸດສາຫະກໍາ ແລະ ການຄ້າ ແຂວງອຸດົມໄຊ ແລະ ສະພາການຄ້າ ແລະ ອຸດສາຫະກຳ ແຂວງອຸດົມໄຊ ວ່າດ້ວຍການມອບ-ຮັບສູນພັດທະນາຜະລິດຕະພັນ ແລະ ສົ່ງເສີມການຕະຫຼາດ, ໂດຍມອບໃຫ້ສະພາການຄ້າ ແລະ ອຸດສາຫະກຳແຂວງ ເປັນຜູ້ຮັບຜິດຊອບເຄື່ອນໄຫວ ແລະ ນຳໃຊ້ຕໍ່ໄປ.

• 09/02/2022