ຕາຍລາຍວັນເພາະໂຄວິດໃນຍີ່ປຸ່ນພຸ່ງສູງສຸດ

ມື້ວານນີ້, ມີການເປີດເຜີຍລາຍງາຍຕົວເລກການຕາຍລາຍວັນອັນເນື່ອງມາຈາກເຊື້ອພະຍາດໂຄວິດ-19 ໃນຮອບ 24 ຊົ່ວໂມງຜ່ານມາ,ຊຶ່ງຂ້າຊີວິດຊາວຍີ່ປຸ່ນໄປເຖິງ 155 ລາຍ ແລະ ນັບເປັນສະຖິຕິຕາຍລາຍວັນສູງສຸດນັບຕັ້ງແຕ່ເກີດສະພາບລະບາດຮອບທຳອິດເມື່ອຕົ້ນປີ 2020.

ອີງຕາມລາຍງານຂອງສຳນັກຂ່າວຕ່າງປະເທດ ເມື່ອວັນທີ 8 ກຸມພາ 2022, ຊຶ່ງອ້າງການສະເໜີຂອງສະຖານີໂທລະພາບ ເອັນເອຊເຄ ແລະ ສຳນັກຂ່າວກຽວໂດ, ໂດຍລະບຸສະຖິຕິຜູ້ປ່ວຍດ້ວຍພະຍາດໂຄວິດ-19 ສະສົມໃນຍີ່ປຸ່ນມີປະມານ 3,48 ລ້ານຄົນ ແລະ ຕົວເລກຜູ້ເສຍຊີວິດສະສົມຢ່າງໜ້ອຍ 19.625 ລາຍ.

ຢ່າງໃດກໍຕາມ, ສະຖິຕິການຕາຍລາຍວັນອັນເນື່ອງມາຈາກໂຄວິດ-19 ທີ່ທະລຸເຖິງ 155ລາຍ, ຊຶ່ງຢືນຢັນຕົວເລກເມື່ອວັນທີ 8 ກຸມພາ, ໄດ້ຊ້ຳເຕີມຄວາມຕຶງຄຽດຂອງລະບົບສາທາລະນະສຸກຍີ່ປຸ່ນ. ຂະນະທີ່ນະຄອນໂຕກຽວ ແລະ ອີກ 12 ແຂວງ (ໄຊຕາມະ, ຊິບະ, ຄານາງາວະ, ກຸນມະ, ນິງາຕະ, ໄອຈິ, ກິຟຸ, ມິເອະ, ຄາງາວະ, ນາງາຊະກິ, ຄຸມາໂມໂຕະ ແລະ ມິຢາຊາກິ) ຊຶ່ງຕົກຢູ່ພາຍໃຕ້ມາດຕະການເຄິ່ງສຸກເສີນເພື່ອຕັດວົງຈອນໂຄວິດ-19 ຮອບຫຼ້າສຸດຕັ້ງແຕ່ວັນທີ 9 ມັງ ກອນເປັນຕົ້ນມາ ແລະ ມາດຕະການກໍຈະຄົບກຳນົດໃນທ້າຍອາທິດນີ້; ໂດຍທັງ 12 ແຂວງກໍໄດ້ພ້ອມໃຈກັນຍື່ນຄຳຮ້ອງເຖິງນາຍົກລັດຖະມົນຕີ ຟຸມິອະ ຄິຊິດະ, ຂະຫຍາຍໄລຍະເວລາຂອງມາດຕະການດັ່ງກ່າວອອກໄປອີກ.

ທັງນີ້, ມາດຕະການພາຍໃຕ້ສະຖານະການເຄິ່ງສຸກເສີນ ຫຼື ພາວະສຸກເສີນບາງສ່ວນນັ້ນ,ອຳນາດທັງໝົດຍັງຄົງຢູ່ທີ່ຄະນະປົກຄອງທ້ອງຖິ່ນໃນການປະຕິບັດມາດຕະການຄວບຄຸມທາງສັງຄົມ, ຊຶ່ງລວມເຖິງໄລຍະເວລາເຮັດວຽກຂອງຫົວໜ່ວຍທຸລະກິດຕ່າງໆທີ່ຖືເປັນພື້ນທີ່ສ່ຽງ,ໂດຍສະເພາະກໍແມ່ນຮ້ານອາຫານ ແລະສະຖານບັນເທີງໃນຍາມຄ່ຳຄືນ.

แชร์