ໄຂກອງປະຊຸມໂຄສະນາອົບຮົມ ທົ່ວປະເທດ

ໃນວັນທີ 9 ກຸມພາ 2022, ຄະນະໂຄສະນາອົບຮົມສູນກາງພັກໄດ້ຈັດກອງປະຊຸມສະຫຼຸບວຽກງານໂຄສະນາອົບຮົມທົ່ວປະເທດ ປະຈໍາປີ 2020 -2021 ແລະ ທິດທາງວຽກງານຈຸດສຸມ ປະຈໍາປີ 2022, ໂດຍເປັນປະທານຂອງ ສະຫາຍ ຄໍາພັນ ເຜີຍຍະວົງ ເລຂາທິການສູນກາງພັກ, ເລຂາຄະນະພັກ, ຫົວໜ້າຄະນະໂຄສະນາອົບຮົມສູນກາງພັກ, ມີບັນດາຄະນະພັກຈາກກະຊວງ ແລະອົງການຈາກສູນກາງພັກ, ພ້ອມດ້ວຍຫົວໜ້າຄະນະໂຄສະນາອົບຮົມບັນດາແຂວງເຂົ້າຮ່ວມຜ່ານລະບົບທາງໄກ.

ໃນວາລະກອງປະຊຸມ, ສະຫາຍ ນາງ ວິລະວອນ ພັນທະວົງ ຮອງຫົວໜ້າຄະນະໂຄສະນາອົບຮົມສູນກາງພັກ, ໄດ້ຜ່ານບົດສະຫຼຸບຕີລາຄາວຽກງານໂຄສະນາອົບຮົມປະຈຳປີ 2020-2021 ແລະ ທິດທາງໜ້າວຽກຈຸດສຸມປີ 2022; ຊຶ່ງໃນໄລຍະ 2 ປີຜ່ານມາ, ວຽກງານໂຄສະນາອົບຮົມຍັງສືບຕໍ່ຮັກສາໄດ້ບົດບາດສໍາຄັນ ແລະ ເປັນໃຈກາງໃນການເຄື່ອນໄຫວວຽກງານການເມືອງ-ແນວຄິດຂອງທົ່ວພັກ, ປະກອບສ່ວນສໍາຄັນໃນການຜັນຂະຫຍາຍແນວທາງ, ແຜນນະໂຍບາຍຂອງພັກ, ນະໂຍບາຍ ແລະ ນິຕິກໍາຂອງລັດ ເຂົ້າສູ່ຊີວິດສັງຄົມຢ່າງກວ້າງຂວາງ, ເຮັດໃຫ້ຖັນແຖວພະນັກງານ-ສະມາຊິກພັກ,ປະຊາຊົນບັນດາເຜົ່າສ່ວນໃຫຍ່ມີຄວາມຮັບຮູ້ເຂົ້າໃຈແນວທາງຂອງພັກ, ລະບຽບກົດໝາຍຂອງລັດ, ເຄື່ອນໄຫວດໍາລົງຊີວິດຕາມລັດຖະທໍາມະນູນ ແລະ ກົດໝາຍ, ເປັນເຈົ້າການປັບປຸງຍົກລະດັບຊີວິດການເປັນຢູ່ຂອງຕົນໃຫ້ດີຂຶ້ນ, ເຂົ້າຮ່ວມປະກອບສ່ວນໃນການປົກປັກຮັກສາ ແລະສ້າງສາພັດທະນາປະເທດຊາດຢ່າງຕັ້ງໜ້າ.

ສຳລັບທິດທາງ, ໜ້າທີ່ວຽກງານຈຸດສຸມໃນປີ 2022. ແມ່ນສືບຕໍ່ຍຶດໝັ້ນທັດສະນະພື້ນຖານຂອງພັກ, ກ່ຽວກັບການສ້າງການຫັນປ່ຽນໃໝ່ທາງດ້ານແນວຄິດ, ຈິນຕະນາການ, ຍົກລະດັບຄຸນນະພາບວຽກງານການເມືອງ-ແນວຄິດ ແລະ ທິດສະດີຂອງພັກ. ເຮັດໃຫ້ຖັນແຖວພະນັກງານການນຳຂັ້ນຍຸດທະສາດ, ພະນັກງານຫຼັກແຫຼ່ງແຕ່ລະຂັ້ນຕ້ອງໄດ້ຮັບການປະກອບຄວາມຮູ້ລັດທິມາກ-ເລນິນ, ແນວຄິດໄກສອນ ພົມວິຫານ ແລະ ເຊື່ອມຊຶມ, ກຳແໜ້ນມະຕິກອງປະຊຸມໃຫຍ່ຄັ້ງທີ XI ຂອງພັກ, ແຜນພັດທະນາເສດຖະກິດ-ສັງຄົມແຫ່ງຊາດ 5 ປີຄັ້ງທີ IX ຂອງລັດ ໃຫ້ເລິກເຊິ່ງ ແລະ ທົ່ວເຖິງ.

ໃນໂອກາດນີ້, ບັນດາແຂກທີ່ເຂົ້າຮ່ວມປະຊຸມກໍໄດ້ປະກອບຄໍາຄິດ, ຄຳເຫັນໃສ່ບົດສະຫຼຸບປະຈຳປີ 2020-2021 ແລະ ທິດທາງໜ້າວຽກຈຸດສຸມປີ 2022 ຂອງວຽກງານໂຄສະນາອົບຮົມທົ່ວປະເທດ, ເພື່ອເຮັດໃຫ້ວຽກງານໂຄສະນາກໍຄືວຽກງານການເມືອງ-ແນວຄິດ ຊຶ່ງເປັນປັດໄຈພື້ນຖານຂອງການພັດທະນາປະເທດໄດ້ຮັບການເສີມຂະຫຍາຍສູ່ສັງຄົມກວ້າງຂວາງຍິ່ງໆຂຶ້ນ, ແນໃສ່ສ້າງທັດສະນະທີ່ດີໃຫ້ແກ່ພະນັກງານ-ລັດຖະກອນ ໄດ້ມີຄວາມຮັບຜິດຊອບສູງເພື່ອເຮັດຫຼ້ອນໜ້າທີ່ທີ່ການຈັດຕັ້ງມອບໝາຍໃຫ້.

แชร์