ເລຂາທິການໃຫຍ່ ໃຫ້ທິດຊີ້ນຳຫຼວງນໍ້າທາ ເສີມຂະຫຍາຍທ່າແຮງບົ່ມຊ້ອນ ຍູ້ຜະລິດເປັນສິນຄ້າ ພັດທະນາທ່ອງທ່ຽວ

ສະຫາຍ ທອງລຸນ ສີສຸລິດ ເລຂາທິການໃຫຍ່ຄະນະບໍລິຫານງານສູນກາງພັກ ປະທານປະເທດ ແຫ່ງ ສປປ ລາວ, ໃຫ້ທິດຊີ້ນຳຫຼວງນໍ້າທາ ຈົ່ງເສີມຂະຫຍາຍທ່າແຮງບົ່ມຊ້ອນຂອງພູມປະເທດໃນເຂດແຂວງ; ບໍ່ວ່າຈະເປັນແຫຼ່ງນໍ້າ, ສະພາບອາກາດ, ທິວທັດທຳມະຊາດ ແລະ ອື່ນໆ ເພື່ອສົ່ງເສີມການຜະລິດເປັນສິນຄ້າ, ຄຽງຄູ່ກັບການພັດທະນາແຫຼ່ງທ່ອງທ່ຽວ, ແນໃສ່ສ້າງລາຍ ແລະອາຊີບທີ່ໝັ້ນຄົງໃຫ້ແກ່ປະຊາຊົນ.

ທັງນີ້, ສະຫາຍເລຂາທິການໃຫຍ່ໄດ້ພົບປະໂອ້ລົມພະນັກງານການນຳຫຼັກແຫຼ່ງຂອງແຂວງຫຼວງນໍ້າທາ ເມື່ອວັນທີ 8 ມັງກອນ 2022, ທີ່ສະໂມສອນໃຫຍ່ຫ້ອງວ່າການປົກຄອງແຂວງ.ໂອກາດດັ່ງ​ກ່າວ, ສະຫາຍ ຄໍາໄຫຼ ສີປະເສີດ ເລຂາພັກແຂວງ ເຈົ້າແຂວງຫຼວງນໍ້າທາ, ໄດ້ລາຍ​ງານ​ກ່ຽວກັບ​ການ​ພັດ​ທະ​ນາ​ເສດ​ຖະ​ກິດ-ສັງ​ຄົມ​ຂອງ​ແຂວງ ໃນ​ປີ 2021 ຊຶ່ງເສດ​ຖະ​ກິດ​ແຂວງຫຼວງ​ນໍ້າທາຂະຫຍາຍຕົວໃນລະດັບ 3,14%; ມູນຄ່າລວມຍອດຜະລິດຕະພັນພາຍໃນບັນລຸໄດ້ 3.266,8 ຕື້ກີບ, ສະເລ່ຍລາຍຮັບຕໍ່ຫົວຄົນໄດ້ 1.899,09 ໂດລາຕໍ່ຄົນຕໍ່ປີ. ຈັດເກັບລາຍຮັບເຂົ້າງົບປະມານໄດ້ທັງໝົດ 489,77 ຕື້ກີບ ເທົ່າກັບ 104,62% ຂອງແຜນປີ.

ທົ່ວແຂວງມີເນື້ອທີ່ປູກເຂົ້າທັງໝົດ 18.637 ເຮັກ​ຕາ, ນອກນັ້ນ ຊາວກະສິກຳຍັງໄດ້ປູກສາລີຫວານ, ໄມ້ໃຫ້ໝາກ, ພືດສະກຸນຖົ່ວ, ເຜືອກ-ມັນ, ອ້ອຍ, ຢາງພາລາ ແລະ ພືດຜັກຕ່າງໆ. ທັງລ້ຽງສັດໃຫຍ່ເພື່ອສະໜອງຊີ້ນ, ລ້ຽງສັດປີກ ແລະ ລ້ຽງປາ. ສ່ວນການສະໜອງນໍ້າໃຫ້ການຜະລິດກະສິກຳ ແມ່ນມີລະບົບຊົນລະປະທານທັງໝົດ 1.145 ແຫ່ງ, ສາມາດສະໜອງນໍ້າໃນລະດູຝົນໄດ້ 9.590 ເຮັກຕາ ແລະ ລະດູແລ້ງໄດ້ 4.116 ເຮັກຕາ. ໂດຍທາງແຂວງໄດ້ສຸມໃສ່ການພັດທະນາຊົນນະບົດ ແລະ ແກ້ໄຂຄວາມທຸກຍາກ ຕາມ 4 ເນື້ອໃນ 4 ຄາດໝາຍ ຕິດພັນກັບວຽກງານ 3 ສ້າງ; ມາຮອດປັດຈຸບັນ, ທົ່ວແຂວງມີເມືອງພົ້ນທຸກ 2 ເມືອງ (ເມືອງຫຼວງນ້ຳທາ ແລະ ເມືອງສິງ), ບ້ານພົ້ນທຸກ 111 ບ້ານ, ຄອບຄົວພົ້ນທຸກ 33.528 ຄອບຄົວ; ມີບ້ານພັດທະນາ 129 ບ້ານ, ຄອບຄົວພັດທະນາ 26.457 ຄອບຄົວ, ຍັງມີບ້ານທຸກຍາກ 113 ບ້ານ, ຄອບຄົວທຸກຍາກ 6.844 ຄອບຄົວທຽບໃສ່ປີຜ່ານມາຫຼຸດລົງ 3.121 ຄອບຄົວ.

ໃນໂອກາດສຳຄັນນີ້, ສະຫາຍ ທອງລຸນ ສີສຸລິດ ໄດ້ໂອ້ລົມໂດຍຍົກໃຫ້ເຫັນປັດໄຈສຳຄັນຕໍ່ການພັດທະນາເສດຖະກິດ-ສັງຄົມຂອງແຂວງ, ຊຶ່ງຕ້ອງໄປຄຽງຄູ່ກັບການຈັດຕັ້ງຜັນຂະຫຍາຍ 2 ວາລະແຫ່ງຊາດ ໃຫ້ລົງເຖິງທ້ອງຖິ່ນຮາກຖານ. ສືບຕໍ່ສຶກສາອົບຮົມການເມືອງແນວຄິດໃຫ້ແກ່ຜູ້ປະກອບການທຸລະກິດ, ປະຊາຊົນບັນດາເຜົ່າ ເພື່ອເສີມຂະຫຍາຍມູນເຊື້ອດຸໝັ່ນຂະຫຍັນພຽນ ເຂົ້າໃນການດຳລົງຊີວິດ ກໍຄືປະຕິບັດສິດ-ພັນທະຂອງຕົນເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດໃຫ້ຫຼາຍຂຶ້ນ, ຂຸດຄົ້ນ ແລະ ນຳໃຊ້ທ່າແຮງບົ່ມຊ້ອນ, ຄວາມອຸດົມ ສົມບູນທາງທຳມະຊາດຂອງແຂວງໃຫ້ເກີດປະໂຫຍດສູງສຸດ; ເປັນຕົ້ນແມ່ນທ່າແຮງດ້ານການທ່ອງ ທ່ຽວ, ພູມອາກາດ, ແຫຼ່ງນໍ້າ ແລະອື່ນໆ ໂດຍຕິດພັນກັບການຜະລິດເປັນສິນຄ້າສົ່ງອອກ, ເພື່ອລຶບລ້າງຄວາມທຸກຍາກຂອງປະຊາຊົນ ແລະສ້າງເສດຖະກິດໃຫ້ເຂັ້ມແຂງຂຶ້ນເລື້ອຍໆ. ຕ້ອງເພີ່ມທະວີສະຕິໃນການດຳລົງຊີວິດຫັນປ່ຽນແນວຄິດຄອງເດີມໄປສູ່ວິຖີຊິວິດແບບໃໝ່ ໂດຍສະເພາະແມ່ນຕ້ານການຟຸມເຟືອຍ ແລະ ຮຽນຮູ້ວິທີປະຢັດ, ຕ້ອງສ້າງສະພາບແວດລ້ອມທີ່ດີເພື່ອການຄ້າ, ການທ່ອງທ່ຽວ ແລະ ການລົງທຶນ.

ໂອກາດນີ້, ສະຫາຍເລຂາທິການໃຫຍ່ ປະທານປະເທດ ກໍໄດ້ນໍາອຸປະກອນການແພດໄປມອບ​ໃຫ້​ແຂວງຫຼວງ​ນໍ້າ​ທາ, ເພື່ອຮັບໃຊ້ເຂົ້າໃນການປ້ອງກັນ, ຕ້ານ ແລະ ສະກັດກັ້ນເຊື້ອພະຍາດໂຄວິດ-19, ນອກ​ນັ້ນຍັງ​ໄດ້​ມອບເຄື່ອງນຸ່ງຫົ່ມຈຳນວນໜຶ່ງ​ໃຫ້ອີກດ້ວຍ.

แชร์