ປກສ ນະຄອນໄກສອນ ຈັບສອງຜູ້ຄ້າຢາບ້າ ພ້ອມຂອງກາງຫຼາຍກວ່າ 3.800 ເມັດ

ເມື່ອວັນທີ 2 ກຸມພາ 2022, ເຈົ້າໜ້າທີ່ໜ່ວຍງານສະກັດກັ້ນ-ຕ້ານຢາເສບຕິດ ປກສ ນະຄອນໄກສອນ ພົມວິຫານ ແຂວງສະຫວັນນະເຂດ, ໄດ້ກັກຕົວເປົ້າໝາຍຄ້າຂາຍເສບຕິດ (ຢາບ້າ) ໄດ້ 2 ຄົນຊື່ ທ້າວ ອັກສອນປະດິດ (ໂອ້) ອາຍຸ 29 ປີ ຫວ່າງງານ ແລະ ທ້າວ ໂຊກທະວີ (ຈິມມີ້) ອາຍຸ 25 ປີ ຫວ່າງງານ, ທັງສອງຢູ່ບ້ານໂພໄຊ ນະຄອນໄກສອນ ພົມວິຫານ.

ລາຍງານຂ່າວຂອງກຳລັງ ປກສ ເມື່ອວັນທີ 8 ກຸມພາ 2022 ໃຫ້ຮູ້ວ່າ: ທ້າວ ໂອ້ ຖືກກັກຕົວຢູ່ຮ້ານຕັດຜົມແຫ່ງໜຶ່ງໃນເຂດບ້ານທ່າເມືອງ ນະຄອນໄກສອນ ພົມວິຫານ, ຊຶ່ງການກວດຄົ້ນພາຫະນະລົດຈັກເວບ 100 ສີຂຽວຫົວເປັດ ປ້າຍທະບຽບ ຍນ 8943 ສະຫວັນນະເຂດ ພົບເຫັນຢາບ້າ 10 ຖົງ ເທົ່າກັບ 1.868 ເມັດ ຢູ່ໃນເບາະລົດຈັກ. ຈາກນັ້ນ, ຕຳຫຼວດຈິ່ງໄດ້ນຳຕົວທ້າວ ໂອ້ ໄປເຮືອນຂອງຜູ້ກ່ຽວຢູ່ສວນບ້ານສະໜາມໄຊ ແລະ ກວດພົບຢາບ້າອີກ 1 ເມັດ ຢູ່ໃນຫ້ອງນອນ. ສ່ວນທ້າວ ຈິມມີ້ຖືກກັກຕົວຢູ່ເຮືອນຜູ້ກ່ຽວ, ຜ່ານການກວດຄົ້ນເຄຫະສະຖານ ພົບຢາບ້າ 1 ມັດ ເທົ່າກັບ 2.000 ເມັດຊຸກເຊື່ອງໄວ້ຢູ່ພື້ນເຮືອນໃນຫ້ອງນອນ.

ໂດຍເຈົ້າໜ້າທີ່ໄດ້ນຳຕົວພວກກ່ຽວພ້ອມຂອງກາງຢາບ້າ 1 ມັດ ກັບ 10 ຖົງ ເທົ່າກັບ 3,869 ເມັດ ແລະລົດຈັກ 1 ຄັນ, ໂທລະສັບ 2 ໜ່ວຍ ໄປສອບສວນ ແລະ ດຳເນີນຄະດີຕາມລະບຽບກົດໝາຍ.

แชร์