ສຶກສາ ຮັບຮອງປຶ້ມແບບຮຽນ ແລະຄູ່ມືຄູຂັ້ນ ປ4 ສະບັບປັບປຸງ

ກະຊວງສຶກສາທິການ ແລະ ກີລາ, ໄດ້ຮັບຮອງເອົາຫຼັກສູດຂັ້ນ ປ4 ສະບັບປັບປຸງໃໝ່, ຊຶ່ງໄດ້ແຈກຢາຍໃຫ້ໂຮງຮຽນຊັ້ນປະຖົມສຶກສາທົ່ວປະເທດ ໃນສົກຮຽນປີ 2022-2023 ຈໍານວນ 546.000 ຫົວ ແລະ ປຶ້ມຄູ່ມືຄູ ຈໍານວນ 42.600 ຫົວ ປະກອບມີ: ວິຊາພາສາລາວ, ພາສາອັງກິດ, ວິຊາວິທະຍາສາດ ແລະ ສິ່ງແວດລ້ອມ; ລວມທັງຊຸດອຸປະກອນຊ່ວຍເຫຼືອຄູ 14.000 ຫົວ ພ້ອມດ້ວຍໄຟລ໌ເອກະສານທີ່ບັນຈຸໃນ USBs, ແຜ່ນພັບ ແລະ ໂປສເຕີຣ໌ ໂດຍໄດ້ຮັບການສະໜັບສະໜູນຈາກລັດຖະບານອອສເຕຣເລຍ.

ການຮັບຮອງຢ່າງເປັນທາງການມີຂຶ້ນເມື່ອວັນທີ 7 ກຸມພາ 2022 , ໂດຍສະຖາບັນຄົ້ນຄວ້າວິທະຍາສາດການສຶກສາ (ສວສ), ກະຊວງສຶກສາທິການ ແລະ ກີລາ ຮ່ວມກັບ ສະຖານທູດອອສເຕຣເລຍ ປະຈຳ ສປປ ລາວ, ໃນວາລະປະຊຸມຄະນະກໍາມະການກວດຜ່ານ ແລະ ຮັບຮອງຫຼັກສູດຊັ້ນປະຖົມສຶກສາ ຂັ້ນ ປ4 ປັບປຸງໃໝ່ ຊຶ່ງຈັດຂຶ້ນໃນຮູບແບບທາງໄກ ແລະ ແບບເຊິ່ງໜ້າ, ໂດຍການເປັນປະທານຂອງ ທ່ານ ອ່ອນແກ້ວ ນວນນະວົງ ຜູ້ອຳນວຍການ ສວສ ແລະ ທ່ານ ນາງ ອານ່າ ໄດສັນ ເລຂາເອກ ສະຖານທູດອອສເຕຣເລຍ ປະຈຳ ສປປ ລາວ.

ນີ້ແມ່ນໜຶ່ງໃນໝາກຜົນຂອງການຮ່ວມມືລະຫວ່າງ ລັດຖະບານອອສເຕຣເລຍ ກັບສະຖາບັນຄົ້ນຄວ້າວິທະຍາສາດການສຶກສາ, ກະຊວງສຶກສາທິການ ແລະ ກີລາ ໃນການພັດທະນາຫຼັກສູດສະບັບປັບປຸງໃໝ່ ເພື່ອຊ່ວຍເພີ່ມຄວາມອາດສາມາດດ້ານການສອນການຮຽນໃນຂັ້ນ ປ4, ແນໃສ່ຕອບສະໜອງການປ່ຽນແປງຂອງສະຕະວັດທີ 21 ແລະ ປັບປຸງຜົນການຮຽນຂອງນັກຮຽນລາວ ໃຫ້ທຽບເທົ່າກັບພາກພື້ນອາຊຽນ.

ຢ່າງໃດກໍດີ, ການຈັດຕັ້ງປະຕິບັດຫຼັກສູດຊັ້ນປະຖົມສຶກສາ ສະບັບປັບປຸງໃໝ່ , ໄດ້ເລີ່ມມາແຕ່ເດືອນກັນຍາ 2019 ສຳລັບຂັ້ນ ປ1 ແລະ ໄດ້ສືບຕໍ່ພັດທະນາໄປແຕ່ລະຂັ້ນໃນທຸກໆປີ; ສໍາລັບສື່ການຮຽນການສອນໃໝ່ນີ້, ຖືກອອກແບບເພື່ອສົ່ງເສີມການຮຽນ-ການສອນ ທີ່ເນັ້ນໃຫ້ນັກຮຽນໄດ້ປະຕິບັດຕົວຈິງຊຶ່ງໄດ້ພັດທະນາໃຫ້ສອດຄ່ອງກັບສື່ການຮຽນ-ການສອນຂອງທຸກຂັ້ນທີ່ຜ່ານມາ,ໂດຍໄດ້ອອກແບບ ແລະ ຂະຫຍາຍເນື້ອໃນບົດຮຽນຂັ້ນ ປ3 ໂດຍເສີມສ້າງຄວາມຮູ້ ແລະ ທັກສະທີ່ມີຢູ່ແລ້ວ ເພື່ອສົ່ງເສີມຄວາມຄືບໜ້າດ້ານການຮຽນຂອງນັກຮຽນໃຫ້ບັນລຸໃນແຕ່ລະວິຊາ ຈາກຂັ້ນໜຶ່ງເຖິງຂັ້ນ ຕໍ່ໆໄປ.

แชร์