ສາທາລະນະສຸກທົ່ວໂລກ ຍັງຄົງຖືກກະທົບໜັກຈາກໂຄວິດ

ຜົນການສຳຫຼວດຂອງອົງການອະນາໄມໂລກຊີ້ໃຫ້ເຫັນວ່າ: ລະບົບສາທາລະນະສຸກພື້ນຖານ 92% ໃນ 129 ປະເທດທີ່ມີການເກັບຂໍ້ມູນ, ຍັງຄົງຖືກແຮງຕ້ານທານຢ່າງໜັກຈາກການລະບາດຂອງພະຍາດໂຄວິດ-19.

ອີງຕາມການນຳສະເໜີຂອງສຳນັກຂ່າວຕ່າງປະເທດໃນວັນທີ 8 ກຸມພາ 2022, ຊຶ່ງອ້າງການລາຍງານຂອງອົງການອະນາໄມໂລກ (WHO) ຈາກເມືອງເຈນີວາ ປະເທດສະວິຕເຊີຣ໌ແລນດ໌, ເມື່ອວັນທີ 7 ກຸມພາຜ່ານມາວ່າ: ລະບົບສາທາລະນະສຸກພື້ນຖານ ແລະ ຂະບວນການປິ່ນ ປົວພະຍາດຫຼາຍຂະແໜງ “ຍັງຄົງໄດ້ຮັບຜົນກະທົບຢ່າງໜັກ” ຈາກການລະບາດຂອງພະຍາດໂຄວິດ-19 ລະຫວ່າງເດືອນພະຈິກ-ທັນວາ 2021, ຊຶ່ງເປັນໄລຍະທີ່ເຊື້ອ ໂອມິຄຣອນ ກຳລັງແພ່ກະຈາຍຢ່າງໄວວາ ແລະ ລະບາດຢ່າງຕໍ່ເນື່ອງໃນຫຼາຍປະເທດ, ແຕ່ “ເກືອບບໍ່ມີຄວາມຄືບໜ້າ ຫຼືມີໜ້ອຍທີ່ສຸດ” ດ້ານຂະບວນການປິ່ນປົວເມື່ອທຽບກັບສະຖານະການໃນໄລຍະຕົ້ນປີ2021.

ຜົນການສຳຫຼວດຂອງອົງການອະນາໄມໂລກ, ໂດຍລວບລວມຂໍ້ມູນຈາກ 129 ປະເທດປາກົດວ່າ: 92% ຂອງປະເທດທີ່ເປີດເຜີຍຂໍ້ມູນ, ຍັງມີສະຖານະການໂດຍລວມທີ່ບໍ່ດີຂຶ້ນ;ສະແດງອອກທີ່ 36% ຂອງລະບົບປິ່ນປົວຄົນເຈັບສຸກເສີນມີປະສິດທິພາບຫຼຸດລົງ, ຊຶ່ງເພີ່ມຂຶ້ນຈາກການເກັບຂໍ້ມູນເມື່ອຕົ້ນປີຜ່ານມາທີ່ຢູ່ໃນລະດັບ 29%, ສ່ວນການສຳຫຼວດຄັ້ງທຳອິດເມື່ອປີ2020 ຢູ່ທີ່21%.

ຂະນະທີ່ 59% ຂອງປະເທດທີ່ໃຫ້ຂໍ້ມູນກໍລະບຸວ່າ: ຂະບວນການຜ່າຕັດແບບບໍ່ເລັ່ງດ່ວນເຊັ່ນການຜ່າຕັດສະໂພກ ແລະຫົວເຂົ່າອັນເກີດຈາກຄວາມເສື່ອມສະພາບຊຳເຮື້ອ, ມີຊ່ອງຫວ່າງຂອງການນັດໝາຍທາງແພດຍາວຂຶ້ນ, ອີກທັງ “ການຟື້ນຟູສະມັດຖະພາບ” ແລະ “ການປະຄັບປະຄອງ” ກໍມີໄລຍະເວລາຍາວຂຶ້ນ.

แชร์