ເລຂາທິການໃຫຍ່ ຢ້ຽມຢາມການພັດທະນາ ແລະ ຜະລິດເປັນສິນຄ້າທີ່ຫຼວງນໍ້າທາ

ເມື່ອວັນທີ 7 ກຸມພາ 2022, ທ່ານ ທອງລຸນ ສີສຸລິດ ເລຂາທິການໃຫຍ່ພັກປະຊາຊົນ ປະຕິວັດລາວ, ປະທານປະເທດ ສປປ ລາວ ພ້ອມພັນລະຍາ ແລະ ຄະນະ, ໄດ້ເດີນທາງໄປຢ້ຽມຢາມ ແລະເຮັດວຽກທີ່ແຂວງຫຼວງນໍ້າທາ, ໂດຍໄດ້ຮັບການຕ້ອນຮັບຈາກ ທ່ານ ຄໍາໄຫຼ ສີປະເສີດ ເຈົ້າແຂວງຫຼວງນ້ຳທາ. ໂອກາດດັ່ງກ່າວ, ທັງຄະນະໄດ້ໄປຢ້ຽມຊົມການພັດທະນາເຂດເສດຖະກິດພິເສດບໍ່ເຕັນແດນງາມ ແລະ ຕິດຕາມສະພາບດ່ານບໍ່ເຕັນ, ພ້ອມຢ້ຽມຢາມການຜະລິດກະສິກຳເປັນສິນຄ້າ.

ໂດຍທັງຄະນະໄດ້ໄປຢ້ຽມຢາມການຜະລິດກະສິກໍາປູກພືດເປັນສິນຄ້າຂອງ ບໍລິສັດ ເຖິງເຝີຍ ການຄ້າ ແລະ ສົ່ງເສີມກະສິກຳ, ຊຶ່ງປູກໝາກຖົ່ວເຫຼືອງເປັນສິນຄ້າ ໃນເນື້ອທີ່ 150 ເຮັກຕາ, ສາມາດສ້າງວຽກເຮັດງານທໍາໃຫ້ປະຊາຊົນໃນ 5 ບ້ານ, 186 ຄອບຄົວ. ນອກນັ້ນ, ບໍລິສັດຍັງໄດ້ເຊົ່າດິນປະຊາຊົນເຮັດການຜະລິດເຮັກຕາລະ 5 ລ້ານກີບຕໍ່ປີ. ມາຮອດປະຈຸບັນ, ທຳການປູກຖົ່ວເຫຼືອງກວມແລ້ວ 70% ແລະ ຈະໃຫ້ສຳເລັດໃນເດືອນກຸມພານີ້.

ຕໍ່ມາ, ໄດ້ໄປຢ້ຽມຢາມການລ້ຽງສັດຂອງຄອບຄົວ ເຊີລິວົງ. ຊຶ່ງນອກຈາກການລ້ຽງໝູ ແລະ ສ້າງເຕົາຂ້າສັດຍ່ອຍແລ້ວກໍຍັງໄດ້ລ້ຽງປາ 28 ໜອງ ໃນເນື້ອທີ່ 5,6 ເຮັກຕາ, ໃນແຕ່ລະປີມີການປ່ອຍປານ້ອຍ 5 ແສນໂຕ ແລະ ສົ່ງປາຂາຍໃຫ້ຕະຫຼາດໄດ້ເຖິງ 120 ໂຕນຕໍ່ປີ. ຊຶ່ງນອກຈາກສາມາດຕອບສະໜອງການບໍລິໂພກພາຍໃນເທສະບານເມືອງ ແລະ ແຂວງແລ້ວ, ຍັງສະໜອງໃຫ້ແຂວງອື່ນໆອີກດ້ວຍ.

ການເຄື່ອນໄຫວຢ້ຽມຢາມ ແລະເຮັດວຽກຢູ່ແຂວງຫຼວງນໍ້າທາຂອງທ່ານເລຂາທິການໃຫຍ່ ໃນຄັ້ງນີ້, ແມ່ນເດີນທາງດ້ວຍຂະບວນລົດໄຟ ລາວ-ຈີນ ຈາກສະຖານີນະຄອນຫຼວງວຽງຈັນ ຫາສະຖານີປາຍທາງບໍ່ເຕັນ. ຊຶ່ງໂຄງການກໍ່ສ້າງທາງລົດໄຟ ລາວ-ຈີນ ມີທັງໝົດ 33 ສະຖານີ ໃນນີ້, ມີສະຖານີໂດຍສານ ແລະ ສິນຄ້າລວມຢູ່ນຳກັນ 11 ຈຸດ, ມີຈຸດສະຫຼັບລາງ ແລະ ຈຸດຫຼີກທັງໝົດ 284 ແຫ່ງ; ເສັ້ນທາງລົດໄຟຄວາມໄວສູງ ລາວ-ຈີນ ມີຄວາມຍາວປະມານ 422,4 ກິ ໂລແມັດ, ໃຊ້ເວລາເດີນທາງປະມານ 3 ຊົ່ວໂມງກວ່າ ຈາກສະຖານີນະຄອນຫຼວງວຽງຈັນເຖິງບໍ່ເຕັນ.

แชร์