ອຄ ເລັ່ງສົ່ງເສີມອຸດສາຫະກໍາປຸງແຕ່ງ ຊຸກຍູ້ຕະຫຼາດພາຍໃນ ແລະສົ່ງອອກ

ນີ້ແມ່ນໜຶ່ງໃນແຜນວຽກທີ່ກະຊວງອຸດສາຫະກໍາ ແລະ ການຄ້າ (ອຄ) ຈັດເປັນໜຶ່ງໃນບຸລິມະສິດ, ເພື່ອຜັນຂະຫຍາຍແຈ້ງການຫ້ອງວ່າການສໍານັກງານນາຍົກລັດຖະມົນຕີ ກ່ຽວກັບການຊຸກຍູ້ສົ່ງເສີມອຸດສາຫະກໍາປຸງແຕ່ງເພື່ອສະໜອງໃຫ້ແກ່ການຊົມໃຊ້ພາຍໃນ ແລະເປັນສິນຄ້າສົ່ງອອກ.

ເພື່ອໃຫ້ແຜນງານດັ່ງກ່າວເປັນຮູບປະທຳໂດຍໄວ, ດັ່ງນັ້ນ ກະຊວງ ອຄ ຈິ່ງໄດ້ຈັດກອງປະຊຸມຫາລືໂດຍທ່ານ ຄໍາແພງ ໄຊສົມແພງ ລັດຖະມົນຕີກະຊວງອຸດສາຫະກໍາ ແລະ ການຄ້າ, ພ້ອມດ້ວຍທ່ານ ທອງພັດ ວົງມະນີ ຮອງລັດຖະມົນຕີກະຊວງກະສິກໍາ ແລະ ປ່າໄມ້, ໄດ້ເປັນປະທານຮ່ວມໃນການຫາລື. ທັງນີ້, ລັດຖະມົນຕີ ອຄ ກໍໄດ້ຍົກໃຫ້ເຫັນແຜນພັດທະນາອຸດສາຫະກໍາປຸງແຕ່ງ ແລະ ຫັດຖະກໍາ (ປີ 2021-2025) ຊຶ່ງກໍານົດການສົ່ງເສີມພັດທະນາ 8 ອຸດສາຫະກຳ, ໂດຍອີງໃສ່ສະພາບປັດຈຸບັນແມ່ນເຫັນວ່າ: ອຸດສາຫະກໍາປຸງແຕ່ງຜະລິດຕະພັນຈາກກະສິກໍາມີຄວາມຈໍາເປັນ ແລະ ເປັນໜຶ່ງໃນຂົງເຂດສຳຄັນທີ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມ ແລະ ສາມາດສ້າງລາຍຮັບແກ່ປະຊາຊົນໃຫ້ນັບມື້ນັບສູງຂຶ້ນ, ທັງເປັນການສົ່ງເສີມການຜະລິດພາຍໃນເພື່ອທົດແທນການນຳເຂົ້າ.

ຢ່າງກໍຕາມ, ການພັດທະນາອຸດສາຫະກໍາປຸງແຕ່ງຜະລິດຕະພັນຈາກກະສິກໍາຂອງລາວກໍປະສົບບັນຫາ ແລະ ສິ່ງທ້າທາຍຫຼາຍດ້ານ, ດັ່ງນັ້ນໃນການຫາລືຄັ້ງນີ້ຈິ່ງເນັ້ນໃສ່ຊ່ອງທາງການປະຕິບັດໄປໃນລວງດຽວກັນ, ທັງໃຫ້ສອດຄ່ອງກັບຄວາມຮຽກຮ້ອງຕ້ອງການຕົວຈິງຂອງສັງຄົມ, ຄຽງຄູ່ກັບການຍົກລະດັບຄຸນນະພາບຜະລິດຕະພັນ ຈິ່ງຈະສາມາດຕອບໂຈດຜູ້ບໍລິໂພກກໍຄືລູກຄ້າ,ກ້າວໄປສູ່ການຕີຕະຫຼາດທັງພາຍໃນ ແລະຕ່າງປະເທດ.

ເພື່ອເຮັດໃຫ້ວຽກງານສົ່ງເສີມອຸດສາຫະກຳປຸງແຕ່ງ ບັນລຸຄວາມສຳເລັດໄດ້ນັ້ນ, ທ່ານ ບົວວັນ ວິລະວົງ ຫົວໜ້າກົມອຸດສາຫະກໍາ ແລະ ຫັດຖະກໍາ ກະຊວງ ອຄ, ກໍໄດ້ຍົກໃຫ້ເຫັນເປົ້າໝາຍລວມຂອງແຜນພັດທະນາອຸດສາຫະກໍາປຸງແຕ່ງ ແລະ ຫັດຖະກໍາທີ່ເປັນທ່າແຮງ, ແຕ່ຕ້ອງສ້າງໄດ້ຜະລິດຕະພັນທີ່ທັນສະໄໝ ແລະ ເປັນມິດກັບສິ່ງແວດລ້ອມ; ຄຽງຄູ່ກັບການສະຫງວນ, ອະນຸຮັກ,ປົກປັກຮັກສາພູມປັນຍາຫັດຖະກໍາ ແລະ ມູນເຊື້ອວັດທະນະທໍາຫັດຖະກໍາ ໂດຍແນໃສ່ພັດທະນາ 8 ກຸ່ມຄື: ກຸ່ມອຸດສາຫະກໍາປຸງແຕ່ງ ແລະ ເຄື່ອງດື່ມ; ກຸ່ມອຸດສາຫະກໍາຕັດຫຍິບ ແລະ ເກີບ; ກຸ່ມອຸດສາຫະກໍາວັດສະດຸກໍ່ສ້າງ; ກຸ່ມອຸດສາຫະກໍາຜະລິດຈາກກະສິກໍາ ແລະ ປ່າໄມ້; ອຸດສາຫະກໍາປຸງແຕ່ງແຮ່ທາດໂລຫະ ແລະ ເຄມີອຸດສາຫະກໍາ; ກຸ່ມອຸດສາຫະກໍາເຄື່ອງໃຊ້ໄຟຟ້າ ແລະ ຊິ້ນສ່ວນອິເລັກໂທຣນິກ; ອຸດສາຫະກໍາພາຫະ ແລະ ກົນຈັກຮັບໃຊ້ກະສິກໍາ; ອຸດສາຫະກໍາສິ່ງພິມ ແລະ ເຄື່ອງຫຸ້ມຫໍ່. ຊຶ່ງປັດໄຈສຳຄັນກໍຄື ການສະໜອງວັດຖຸດິບທີ່ຕ້ອງຮັບປະກັນໄດ້ທັງປະລິມານ ແລະ ຄຸນນະພາບ ເພື່ອປ້ອນໃຫ້ຂະແໜງ ການຜະລິດ ຈິ່ງຈະສາມາດຫັນເປັນອຸດສາຫະກໍາຢ່າງແທ້ຈິງ.

แชร์