ລາວ-ໄທ ຮ່ວມລາດຕະເວນຕາມລຳແມ່ນໍ້າຂອງ

ນີ້ແມ່ນປະຕິບັດການຂອງໜ່ວຍງານແກ້ໄຂບັນຫາຢາເສບຕິດຕາມຊາຍແດນ ລາວ-ໄທ, ລະຫວ່າງແຂວງບໍ່ແກ້ວ ກັບ ຈັງຫວັດຊຽງຣາຍ. ຊຶ່ງການລາດຕະເວນທາງນໍ້າຮ່ວມກັນຄັ້ງນີ້ຈັດຂຶ້ນທີ່ສຳນັກງານໜ່ວຍເຮືອຮັກສາຄວາມສະຫງົບຮຽບຮ້ອຍຕາມລຳແມ່ນໍ້າຂອງ ຣາຊະອານາຈັກໄທ ເມື່ອວັນທີ 4 ກຸມພາ 2022.

ໂດຍການເປັນປະທານຮ່ວມຂອງ ພົນຈັດຕະວາ ສີພັນ ພຸດທະວົງ ຫົວໜ້າກົມທະຫານຊາຍແດນ, ກົມໃຫຍ່ເສນາທິການກອງທັບປະຊາຊົນລາວຫົວໜ້າຄະນະປະຕິບັດງານເພື່ອແກ້ໄຂບັນຫາຢາເສບຕິດຕາມຊາຍແດນລາວ-ໄທ ແລະ ພົນໂທ ພົງເທບ ແກ້ວໄຊໂຢ ເຈົ້າກົມກິດຈະການຊາຍແດນທະຫານ, ກອງທັບຣາຊະອານາຈັກໄທ ຫົວໜ້າຄະນະປະຕິບັດງານເພື່ອແກ້ໄຂບັນຫາຢາເສບຕິດຕາມຊາຍແດນ ໄທ-ລາວ, ພ້ອມດ້ວຍຄະນະປະຕິບັດງານເພື່ອແກ້ໄຂບັນຫາຢາເສບຕິດຕາມຊາຍແດນລາວ-ໄທ ແລະໜ່ວຍປະສານງານປະຈຳພື້ນທີ່ທັງສອງຝ່າຍ (ລາວ-ໄທ, ໄທ-ລາວ)ເຂົ້າຮ່ວມ.

ທັງນີ້ ປະທານເຈົ້າໜ້າທີ່ຝ່າຍລາວໄດ້ກ່າວວ່າ: ການລາດຕະເວນຮ່ວມທາງນໍ້າ ລາວ-ໄທ ຂອງໜ່ວຍປະສານງານປະຈຳພື້ນທີ່ຊາຍແດນ ລາວ-ໄທ ລະຫວ່າງແຂວງບໍ່ແກ້ວ ແລະ ຈັງຫວັດຊຽງຣາຍ, ພາຍໃຕ້ການຊີ້ນໍາຂອງຜູ້ບັນຊາການກອງກໍາລັງຜາເມືອງ, ກອງທັບພາກທີ 3 ຣາຊະອານາຈັກໄທ ແລະ ຜູ້ບັນຊາການທະຫານແຂວງບໍ່ແກ້ວ ກອງທັບປະຊາຊົນລາວ ໃນຄັ້ງທີ I ນີ້, ຖືເປັນຂີດໝາຍປະຫວັດສາດສຳຄັນທີ່ສະແດງໃຫ້ເຫັນນະໂຍບາຍຂອງລັດຖະບານ ແລະ ຂອງສອງກອງທັບ ລາວ-ໄທ ໃນການແກ້ໄຂບັນຫາຢາເສບຕິດຕາມຊາຍແດນ, ຊຶ່ງເປັນສັນຍະລັກໜຶ່ງທີ່ສະທ້ອນໃຫ້ເຫັນເຖິງການພົວພັນຮ່ວມມືສະໜິດແໜ້ນຂອງເຈົ້າໜ້າທີ່ສອງຝ່າຍ, ແນໃສ່ສ້າງຄວາມວິຕົກກັງວົນ ແລະຢ້ານກົວໃຫ້ແກ່ກຸ່ມຄ້າຂາຍຢາເສບຕິດຕາມພື້ນທີ່, ທັງຢໍ້າໃຫ້ເຫັນການປະຕິບັດກົດໝາຍບ້ານເມືອງກໍຄືກົດໝາຍສາກົນ.

ຢ່າງໃດກໍດີ, ປະຕິບັດການໃນຄັ້ງທຳອິດນີ້ກໍສ່ອງແສງໃຫ້ເຫັນຄວາມເອົາໃຈໃສ່ໃນການສະກັດກັ້ນຂະບວນການຄ້າຢາເສບຕິດຂອງສອງປະເທດກໍສອງກອງທັບ ແລະ ຕຳຫຼວດ ລາວ-ໄທ, ຊຶ່ງສອງຝ່າຍມີຄວາມເຊື່ອໝັ້ນວ່າ: ການຮ່ວມມືຂອງຄະນະປະສານງານພາກເໜືອ ລາວ-ໄທ ທີ່ນັບມື້ກ້າວເຂົ້າສູ່ລວງເລິກ, ຈະສ້າງຄວາມໄວ້ເນື້ອເຊື່ອໃຈເຊິ່ງກັນ ແລະກັນຜ່ານປະຕິບັດການແລກປ່ຽນປະສົບການ,ແລກປ່ຽນຂໍ້ມູນຂ່າວສານຮ່ວມກັນກໍຈະເຮັດໃຫ້ບັນຫາປາກົດການຫຍໍ້ທໍ້ຕາມເຂດຊາຍແດນຫຼຸດໜ້ອຍຖອຍລົງ, ທັງເປັນແບບຢ່າງໃຫ້ແກ່ຄະນະເຈົ້າໜ້າທີ່ອື່ນໆ ໄດ້ນໍາໄປຈັດຕັ້ງປະຕິບັດໃຫ້ເກີດດອກອອກຜົນ.

ຂອບໃຈຂໍ້ມູນຈາກເພຈ: ໜັງສືພິມບໍ່ແກ້ວ

แชร์