ກຳມະກອນຊີງຊັບ ຖືກຈັບໃນມື້ກໍ່ເຫດ

ຊາຍໜຸ່ມໄວ 25 ປີທີ່ລົງມາຈາກຫຼວງພຣະບາງ ແລະ ຮັບຈ້າງເປັນກຳມະກອນຢູ່ບ້ານດົງໂພນແຮ່ ເມືອງຫາດຊາຍຟອງ ນະຄອນຫຼວງວຽງຈັນ, ແຕ່ຊາຍຄົນນັ້ນ ກັບປະພຶດຜິດສິນຂໍ້ 2 ຈ້ອງໝາຍຊີງເອົາຊັບຄົນອື່ນ. ຊຶ່ງພາຍຫຼັງກໍ່ເຫດກໍຖືກຕໍາຫຼວດຈັບຕົວໄດ້ພ້ອມຂອງກາງສາຍຄໍຄໍານ້ໍາໜັກ 1 ບາດ; ຍາດຊີງຂອງຄົນອື່ນມາເປັນຂອງຕົນ, ກໍຕ້ອງທົນທຸກດັ່ງນັ້ນແລ້ວ!.

ລາຍງານຂ່າວຂອງກຳລັງປ້ອງກັນຄວາມສະຫງົບ ເມື່ອວັນທີ 6 ກຸມພາ 2022 ໃຫ້ຮູ້ວ່າ: ເຈົ້າໜ້າທີ່ພະແນກຕໍາຫຼວດ ປກສ ເມືອງຫາດຊາຍຟອງ, ໄດ້ເປີດເຜີຍຄະດີຊີງຊັບລາຍໜຶ່ງທີ່ເກີດຂຶ້ນເມື່ອວັນທີ 5 ກຸມພາ, ໂດຍອົງການປົກຄອງບ້ານດົງໂພນແຮ່ ໄດ້ຈັບຕົວເປົ້າໝາຍຊີງຊັບພົນລະເມືອງ (ດຶງສາຍຄໍ) ຊື່ທ້າວ ພອນ ອາຍຸ 25 ປີ ອາຊີບກໍາມະກອນ ບ້ານເກີດໜອງແຫ້ວ ເມືອງຫຼວງພຣະບາງ ແຂວງຫຼວງພຣະບາງ, ປັດຈຸບັນພັກເຊົາບ້ານດົງໂພນແຮ່ ແລະ ໄດ້ນໍາຕົວຜູ້ກ່ຽວສົ່ງມອບໃຫ້ເຈົ້າໜ້າທີ່ ປກສ ເມືອງຫາດຊາຍຟອງ.

ຜ່ານການສອບສວນກໍຮູ້ວ່າ: ໃນຕອນເຊົ້າວັນທີ 5 ກຸມພາ 2022, ທ້າວ ພອນ ໄດ້ມາສະໝັກເຮັດວຽກເປັນກໍາມະກອນກໍ່ສ້າງຢູ່ຈຸດກໍ່ສ້າງແຫ່ງໜຶ່ງໃນເຂດບ້ານດົງໂພນແຮ່, ພາຍຫຼັງຜູ້ຮັບເໝົາກໍ່ສ້າງໄດ້ຮັບຜູ້ກ່ຽວເຂົ້າເຮັດວຽກແລ້ວ; ຕໍ່ມາໃນເວລາ 12:00 ໂມງຂອງວັນດຽວກັນ, ທ້າວ ພອນ ໄດ້ຍ່າງໄປຊື້ຢາສູບຢູ່ຮ້ານຂາຍເຄື່ອງຂອງນາງ ແກ້ວ ຢູ່ບ້ານດົງໂພນແຮ່ ແລະ ໃນເວລານັ້ນ ຜູ້ກ່ຽວກໍໄດ້ກໍ່ເຫດດຶງເອົາສາຍຄໍຄໍາ 1 ເສັັ້ນ ນໍ້າໝັກ 1 ບາດ ທີ່ນາງ ແກ້ວ ສວມໃສ່, ຈາກນັັ້ນ ທ້າວ ພອນ ກໍເອົາຕົວຫຼົບໜີ.

ພາຍຫຼັງເກີດເຫດຊີງຊັບ, ນາງ ແກ້ວ ກໍໄດ້ແຈ້ງຕໍ່ອົງການປົກຄອງບ້ານດົງໂພນແຮ່. ຫຼັງຈາກນັ້ນ, ອົງການປົກຄອງບ້ານດົງໂພນແຮ່ ຈິ່ງນຳພາ ປກສ ແລະ ປກຊ ບ້ານລົງແກ້ໄຂເຫດໄດ້ພາຍໃນວັນດຽວ ຊຶ່ງສາມາດຈັບຕົວ ທ້າວ ພອນ ໄດ້ພ້ອມຂອງກາງສາຍຄໍຄໍາ 1 ເສັັ້ນ ນໍ້າໜັກ 1 ບາດ ແລະ ນຳຕົວສົ່ງໃຫ້ເຈົ້າໜ້າທີ່ພະແນກຕໍາຫຼວດ ປກສ ເມືອງຫາດຊາຍຟອງ ດຳເນີນຄະດີ ແລະ ມອບສາຍຄໍຄຳຄືນເຈົ້າຂອງເດີມ.

แชร์