ຫຼວງພຣະບາງ ກຽມຄວາມພ້ອມເປີດບໍລິການທ່ອງທ່ຽວ

ແຂວງຫຼວງພຣະບາງ, ໄດ້ຖືກບັນຈຸເຂົ້າໃນເຂດທ່ອງທ່ຽວສີຂຽວ ເພື່ອການທ່ອງທ່ຽວທີ່ປອດໄພຈາກພະຍາດໂຄວິດ-19 ໃນ ສປປ ລາວ (Green Travel Zone) ຊຶ່ງເປັນ 1 ໃນ 3 ເຂດຂອງໄລຍະທຳອິດໂດຍເລີ່ມແຕ່ວັນທີ 1 ມັງກອນ-30 ມີນາ 2022 ເພື່ອຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ. ໃນດ້ານການກະກຽມຄວາມພ້ອມແມ່ນໄດ້ເປັນເອກະພາບກຳນົດເອົາເຂດການທ່ອງທ່ຽວສີຂຽວຂອງແຂວງຕາມເງື່ອນໄຂທີ່ກຳນົດໄວ້ໃນແຜນຄື: ໜຶ່ງນະຄອນ ແລະ ຕົວເມືອງ (ນະຄອນຫຼວງພຣະບາງ, ເມືອງຈອມເພັດ, ເມືອງປາກອູ ແລະ ເມືອງງອຍ).

ພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ) ແຂວງຫຼວງພຣະບາງ, ໄດ້ລາຍງານກ່ຽວກັບການກະກຽມຄວາມພ້ອມໃນການເປີດການທ່ອງທ່ຽວ ເພື່ອຕ້ອນຮັບນັກທ່ອງທ່ຽວພາຍໃນ ແລະ ຕ່າງປະເທດ. ໃນໂອກາດທີ່ ທ່ານ ໄຊສົມພອນ ພົມວິຫານ ກໍາມະການກົມການເມືອງສູນກາງພັກ, ປະທານສະພາແຫ່ງຊາດ, ພ້ອມດ້ວຍຄະນະ ໄດ້ເຄື່ອນໄຫວຢ້ຽມຢາມແຂວງຫຼວງພຣະບາງເມື່ອວັນທີ 5 ກຸມພາ2022, ໂດຍການຕ້ອນຮັບຂອງ ທ່ານ ວົງສະຫວັນ ເທບພະຈັນ ຮອງເລຂາຄະນະບໍລິຫານງານພັກແຂວງ, ປະທານສະພາປະຊາຊົນແຂວງຫຼວງພຣະບາງ.

ສຳລັບນະຄອນຫຼວງພຣະບາງ ປະກອບມີແຫຼ່ງທ່ອງທຽວພູສີ, ຫໍພິພິທະພັນແຫ່ງຊາດຫຼວງພຣະບາງ, ວັດຊຽງທອງ ແລະ ວັດວາອາຮາມຕ່າງໆ ລວມທັງຕະຫຼາດກາງຄືນ, ຫັດຖະກຳຕໍ່າຫູກທໍໄໝ ບ້ານຜານົມ, ບ້ານຊ່າງຄ້ອງ, ສູນຫັດຖະກໍາ ອອກພົບຕົກ, ສູນວິທະຍາຊົນເຜົ່າ, ແຫຼ່ງທ່ອງທ່ຽວນໍ້າຕົກຕາດກວາງຊີ, ນໍ້າຕົກຕາດແສ້, ບ້ານລ້ອງເລົ່າ, ສວນນໍ້າດົງ, ການລ່ອງເຮືອຊົມທຳມະຊາດ ອາທິດອັດສະດົງຕາມລໍາແມ່ນໍ້າຂອງ-ນໍ້າຄານ ແລະອື່ນໆ. ສ່ວນເມືອງຈອມເພັດ ປະກອບມີເສັ້ນທາງທ່ອງທ່ຽວຊຽງແມນ ວັດຫາດສ້ຽວ, ຫັດຖະກຳປັ້ນໝໍ້ຫຼໍ່ໄຫ ບ້ານຈ່ານເໜືອ ແລະ ນໍ້າຕົກຕາດຮ້ອຍຄົວ. ທາງດ້ານເມືອງປາກອູ ປະກອບມີບ້ານການທ່ອງທ່ຽວແບບອະນຸຮັກປະຊາຊົນມີສ່ວນຮ່ວມ ບ້ານຊ່າງໄຫ, ບ້ານປາກອູ ແລະຖໍ້າຕິ່ງ. ໃນຂະນະທີ່ເມືອງງອຍ ປະກອບມີເຂດໜອງຂຽວ, ບ້ານສົບຮຸນ, ຖໍ້າຜາກວາງ, ຖໍ້າຜາທອກ, ຈຸດຊົມທີວທັດທຳມະຊາດ (ຜາແດງ, ຜາຊົມນາງ...) ແລະ ການລ່ອງເຮືອຊົມທິວທັດທຳມະຊາດຕາມລຳແມ່ນໍ້າອູ.

ໃນສ່ວນຂອງການກຽມຄວາມພ້ອມ, ໂດຍໄດ້ສັກວັຄຊີນໃຫ້ແກ່ປະຊາຊົນໃນນະຄອນຫຼວງພຣະບາງ ແລະ ເມືອງເປົ້າໝາຍ ເພື່ອໃຫ້ຜ່ານຕາມເງື່ອນໄຂທີ່ໄດ້ກຳນົດໄວ້ຄື: ປະຊາກອນຕ້ອງໄດ້ຮັບການສັກຢາວັກຊີນປ້ອງກັນໂຄວິດ-19 ຄົບໂດສ ຢ່າງໜ້ອຍຕ້ອງໄດ້ 70% ຂຶ້ນໄປ; ໃນນີ້ ປະຊາກອນນະຄອນຫຼວງພຣະບາງ ແມ່ນໄດ້ຮັບວັຄຊີນຄົບໂດສແລ້ວເຖິງ 83% ແລະ ເມືອງອື່ນໆທີ່ຢູ່ໃນເປົ້າໝາຍ ກໍຜ່ານຕາມເກນມາດຕະຖານ ທີ່ລັດຖະບານໄດ້ກຳນົດ.

ພ້ອມນັ້ນ, ບັນດາຫົວໜ່ວຍທຸລະກິດທ່ອງທ່ຽວ ກໍມີຄວາມພ້ອມຕ້ອນຮັບນັກທ່ອງທ່ຽວ ໂດຍທຸລະກິດໂຮງແຮມ 33 ແຫ່ງ, ຮ້ານອາຫານ ແລະ ກິນດື່ມ 33 ຮ້ານ, ບໍລິສັດທ່ອງທ່ຽວ 30 ບໍລິສັດ, ການບໍລິການລົດຕູ້ນ້ອຍ 16 ບໍລິສັດ; ໃນນີ້, ມີລົດຕູ້ນ້ອຍບໍລິການທ່ອງທ່ຽວ 463 ຄັນ, ມີເຮືອບໍລິການນຳທ່ຽວ 26 ລຳ, ມີພະນັກງານນຳທ່ຽວ 180 ຄົນ ຊຶ່ງສາມາດສື່ສານໄດ້ 8 ພາສາ (ພາສາອັງກິດ 65 ຄົນ, ຝຣັ່ງ 24 ຄົນ, ເຢຍຣະມັນ 9 ຄົນ, ຈີນ 34 ຄົນ, ໄທ 33 ຄົນ, ອິຕາລີ 4 ຄົນ, ຣັສເຊຍ 2 ຄົນ ແລະ ພາສາຍີ່ປຸ່ນ 10 ຄົນ). ໂດຍພະແນກ ຖວທ ແຂວງ ໄດ້ເລັ່ງໃສ່ຈັດຕັ້ງປະຕິບັດມາດຕະຖານການທ່ອງທ່ຽວປອດໄພ Lao safe ຄື: 5 ມາດຕະຖານ ແລະ 1 ຄຳແນະນຳເພື່ອຊຸກຍູ້ໃຫ້ຜູ້ປະກອບການປະຕິບັດຕາມມາດຕະຖານເພື່ອຕ້ອນຮັບນັກທ່ອງທ່ຽວແບບປອດໄພ.

ຢ່າງໃດກໍດີ, ໃນປີ 2022 ນີ້ ແຫຼ່ງທ່ອງທ່ຽວນໍ້າຕົກຕາດກວາງຊີ ກໍໄດ້ຖືກຮັບຮອງເປັນແຫຼ່ງທ່ອງທ່ຽວທີ່ຍືນຍົງຂອງອາຊຽນ. ຊຶ່ງໃນແຕ່ລະປີ ແມ່ນມີນັກທ່ອງທ່ຽວພາຍໃນ ແລະ ຕ່າງ ປະເທດເຂົ້າໄປທ່ຽວຊົມຢ່າງຫຼວງຫຼາຍ, ນັບສະເພາະໃນເດືອນມັງກອນຜ່ານມາ ມີນັກທ່ອງທ່ຽວເຂົ້າໄປທ່ຽວຕາດເຖິງ 22.852 ຄົນ ໃນນັ້ນ, ຕ່າງປະເທດ 20.558 ຄົນ.

ໃນໂອກາດນີ້, ທັງຄະນະກໍໄດ້ໄປຢ້ຽມຊົມຕາດກວາງຊີ ແລະອຸທິຍານສວນດອກໄມ້ໃນປ່າໃຫ່ຍທີ່ນຳ້ຕົກຕາດຮ້ອຍຄົວອີກດ້ວຍ.

แชร์