ບາຫຼີ ເປີດດອນຕ້ອນຮັບນັກທ່ອງທ່ຽວ

ນັບເປັນເວລາເກືອບ 2 ປີ ທີ່ເກາະດອນບາຫຼີໄດ້ປິດຕົວລົງເນື່ອງຈາກຜົນກະທົບຂອງການລະບາດພະຍາດໂຄວິດ-19, ຫຼ້າສຸດ ເມື່ອວັນທີ 3 ກຸມພາ 2022 ຜ່ານມາ ເກາະດອນບາຫຼີ ກໍໄດ້ເປີດຮັບນັກທ່ອງທ່ຽວຕ່າງຊາດ, ຊຶ່ງນັບເປັນແຂກຕ່າງດ້າວທ້າວຕ່າງແດນກຸ່ມທຳອິດທີ່ໄດ້ເຂົ້າໄປໃນແຫຼ່ງທ່ອງທ່ຽວທີ່ມີຊື່ສຽງຂອງອິນໂດນີເຊຍ.

ທ່ານ ອິດະ ອາຢຸ ອິນດາຫ໌ ຢັສຕິຄາຣິນິ ເຈົ້າໜ້າທີ່ສຳນັກງານທ່ອງທ່ຽວດອນບາຫຼີ, ໃຫ້ຮູ້ວ່າ: ຖ້ຽວບິນສາຍການບິນ ກາຣູດ້າ ອິນໂດນີເຊຍ ຈາກໂຕກຽວ ປະເທດຍີ່ປຸ່ນ ໄດ້ເດີນທາງເຖິງດອນບາຫຼີເມື່ອຕອນບ່າຍວັນທີ 3 ກຸມພາ, ໂດຍມີນັກທ່ອງທ່ຽວຕ່າງປະເທດ 6 ຄົນ ແລະ ນັກທ່ອງທ່ຽວອິນໂດນີເຊຍ 6 ຄົນ ທີ່ເດີນທາງມາພ້ອມຖ້ຽວບິນດັ່ງກ່າວ.

ທັງນີ້, ອິນໂດນີເຊຍ ໄດ້ເລີ່ມເປີດຮັບນັກທ່ອງທ່ຽວຕ່າງປະເທດອີກຄັ້ງເພື່ອຊຸກຍູ້ພາກການທ່ອງທ່ຽວຂອງບາຫຼີ, ທີ່ຄິດເປັນ 54% ຂອງເສດຖະກິດອິນໂດນີເຊຍ, ຊຶ່ງເມື່ອປີ 2019 ມີນັກທ່ອງທ່ຽວຕ່າງຊາດເດີນທາງເຂົ້າໄປຢ້ຽມຢາມບາຫຼີ 6,2 ລ້ານຄົນ; ສ່ວນໃນປີ 2021 ມີນັກທ່ອງທ່ຽວຕ່າງຊາດເດີນທາງເຂົ້າໄປຢ້ຽມຢາມອິນໂດນີເຊຍພຽງ 1,6 ລ້ານຄົນ, ຊຶ່ງຫຼຸດລົງ61,57% ເມື່ອທຽບໃສ່ປີ 2020.

ຢ່າງໃດກໍດີ, ອິນໂດນີເຊຍ ຍັງຮັກສາຂໍ້ກຳນົດ ແລະ ລະບຽບກັກຕົວທີ່ເຂັ້ມງວດກວ່າປະເທດອື່ນໆໃນພູມີພາກອາຊຽນ, ຂະນະທີ່ປະເທດໄທກໍໄດ້ເປີດຮັບນັກທ່ອງທ່ຽວທີ່ສັກວັຄຊີນປ້ອງກັນໂຄວິດຄົບແລ້ວໂດຍບໍ່ຕ້ອງກັກຕົວ,ຊຶ່ງນະໂຍບາຍດັ່ງກ່າວແມ່ນປະຕິບັດມາແຕ່ວັນທີ 1ກຸມພາ2022. ທາງດ້ານຟິລິປປິນສ໌ ກໍປະຕິບັດເຊັ່ນດຽວກັນກັບປະເທດໄທ ຊຶ່ງຈະເລີ່ມໃນວັນທີ10 ກຸມ ພາ 2022 ເປັນຕົ້ນໄປ. ໃນຂະນະທີ່ ສປປ ລາວ ກໍໄດ້ເປີດຮັບນັກທ່ອງທ່ຽວຕ່າງປະເທດແບບໝູ່ຄະນະສູ່ແຫຼງທ່ອງທ່ຽວສີຂຽວ,ໂດຍມາດຕະການຫຼ້າສຸດແມ່ນປະຕິບັດນັບແຕ່ວັນທີ 4ກຸມພາ 2022 ເປັນຕົ້ນມາ,ຊຶ່ງອະນຸຍາດໃຫ້ຮັກທ່ອງທ່ຽວກັກຕົວໃນໄລຍະລໍຜົນກວດໂຄວິດ 48ຊົ່ວໂມງ (2 ວັນ) ຊຶ່ງຖ້າຫາກຜົນອອກມາເປັນລົບກໍສາມາດເດິນທາງທ່ອງທ່ຽວໃນເຂດສີຂຽວທີ່ລ້ວນເປັນແຫຼ່ງທີ່ມີຊື່ສຽງ ແລະມີມາດຕະການຄວບຄຸມໂຄວິດຕາມທີ່ລັດຖະບານວາງອອກ.

แชร์