ແຕ່ງຕັ້ງ ລັດຖະມົນຕີ ຫົວໜ້າ ຫສນຍ ຜູ້ໃໝ່

ພິທີມອບ-ຮັບໜ້າທີ່ລະຫວ່າງ ທ່ານ ຄຳເຈນ ວົງໂພສີ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ (ຜູ້ເກົ່າ) ແລະ ທ່ານ ອາລຸນໄຊ ສູນນະລາດ ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ (ຜູ້ໃໝ່), ຈັດຂຶ້ນເມື່ອວັນທີ 3 ກຸມພາ 2022 ທີ່ຫ້ອງວ່າການສຳນັກງານນາຍົກລັດຖະມົນຕີ (ຫສນຍ), ໂດຍການເຂົ້າຮ່ວມ ແລະ ໂອ້ລົມຂອງ ທ່ານ ກິແກ້ວ ໄຂຄຳພິທູນ ຮອງນາຍົກລັດຖະມົນຕີ, ມີບັນດາຮອງລັດຖະມົນຕີ, ຮອງຫົວໜ້າ ຫສນຍ, ຜູ້ຕາງໜ້າຈາກຄະນະຈັດຕັ້ງສູນກາງພັກ, ຫ້ອງວ່າການສູນກາງພັກ, ພ້ອມດ້ວຍພະນັກງານຫຼັກແຫຼ່ງພາຍໃນ ຫສນຍ.

ເພື່ອສືບຕໍ່ເຮັດໃຫ້ການຈັດຕັ້ງປະຕິບັດວຽກງານຂອງ ຫສນຍ ໄດ້ຮັບຜົນສຳເລັດໃໝ່ໃຫຍ່ຫຼວງກວ່າເກົ່າ, ໂດຍທ່ານຮອງນາຍົກລັດຖະມົນຕີໃນນາມຕາງໜ້າກົມການເມືອງກໍຄືລັດຖະບານ, ໄດ້ໃຫ້ທິດຊີ້ນໍາຫົວໜ້າຫ້ອງວ່າການສໍານັກງານນາຍົກລັດຖະມົນຕີ ຜູ້ໃໝ່ ກໍຄືພະນັກງານ, ສະມາຊິກພັກທົ່ວ ຫສນຍ ຈົ່ງຖືສໍາຄັນການກໍ່ສ້າງພັກປອດໃສ, ເຂັ້ມແຂງ ແລະໜັກແໜ້ນຊຶ່ງວຽກງານກໍ່ສ້າງພັກແມ່ນເປັນຂອດຕັດສິນ, ບ່ອນໃດເຮັດວຽກງານກໍ່ສ້າງພັກໄດ້ດີບ່ອນນັ້ນມີຄວາມສະຫງົບ.

ໃຫ້ເອົາໃຈໃສ່ສ້າງ ແລະ ປັບປຸງແຜນການເຄື່ອນໄຫວວຽກງານຂອງລັດຖະບານ, ຂອງນາຍົກ ແລະຮອງນາຍົກລັດຖະມົນຕີໃນແຕ່ລະໄລຍະໃຫ້ລະອຽດ ແລະ ສອດຄ່ອງກວ່າເກົ່າ, ໂດຍມີການຈັດລຽງບຸລິມະສິດຍຸດທະສາດ,ນິຕິກຳ,ໂຄງການຕ່າງໆ ແລະຫົວຂໍ້ທີ່ເປັນບັນຫາເຄັ່ງຮ້ອນທີ່ຕ້ອງພິຈາລະນາໃຫ້ຊັດເຈນ,ວ່ອງໄວ ແລະ ຮັບປະກັນຄຸນນະພາບ. ພ້ອມນັ້ນ, ກໍຊ່ວຍຊຸກຍູ້ຕິດຕາມການຈັດຕັ້ງປະຕິບັດມະຕິ,ຄໍາສັ່ງ, ແຈ້ງການ ແລະນິຕິກໍາຕ່າງໆຂອງລັດຖະບານທັງຢູ່ສູນກາງ ແລະທ້ອງຖິ່ນໃຫ້ຖືກຕ້ອງ ແລະສອດຄ່ອງ.

ທັງນີ້, ລັດຖະມົນຕີ, ຫົວໜ້າຫ້ອງວ່າການສຳນັກງານນາຍົກລັດຖະມົນຕີ ຜູ້ໃໝ່ ໄດ້ຂຶ້ນຮັບຄຳໂອວາດຂອງທ່ານຮອງນາຍົກລັດຖະມົນຕີ, ພ້ອມທັງກ່າວຮັບໜ້າທີ່ ໂດຍຢືນຢັນຈະສຸມສະຕິປັນຍາ, ເຫື່ອແຮງ, ຄວາມຮູ້ຄວາມສາມາດ ແລະ ປະສົບການຂອງຕົນຮ່ວມກັບຄະນະນໍາ ແລະ ພະນັກງານຫສນຍ, ປະຕິບັດໜ້າທີ່ວຽກງານຕາມພາລະບົດບາດ, ຄວາມຮັບຜິດຊອບ ແລະ ການມອບໝາຍ ໃຫ້ສົມກັບຄວາມເຊື່ອໝັ້ນ ແລະ ໄວ້ວາງໃຈຂອງຂັ້ນເທິງ.

• 04/02/2022