ລາວ ຜ່ອນມາດຕະການກັນໂຄວິດ ປິດສະຖານບັນເທີງ ຫຼຸດເວລາກັກຕົວ

 

            ໂດຍທ່ານນາງ ທິບພະກອນ ຈັນທະວົງສາ, ຮອງລັດຖະມົນຕີ ຮອງຫົວໜ້າຫ້ອງວ່າການສຳນັກງານນາຍົກລັດຖະມົນຕີ ຮອງຫົວໜ້າຄະນະສະເພາະກິດ ໄດ້ຖະແຫຼງ ເມື່ອວັນ 3 ກຸມພາ 2022 ວ່າ: ປັດຈຸບັນ ອັດຕາການສັກວັຄຊີນປ້ອງກັນໂຄວິດຂອງ ສປປ ລາວ ກໍຄືບັນດາປະເທດທົ່ວໂລກ ແມ່ນຢູ່ໃນລະດັບສູງ, ບວກໃສ່ເທຄໂນໂລຢີດ້ານການແພດທີ່ທັນສະໄໝ ແລະ ການກວດຫາເຊື້ອໄດ້ໄວຂຶ້ນ, ຈຳນວນຄົນເຈັບເຂົ້າໂຮງໝໍກໍຫຼຸດລົງ ຊຶ່ງເປັນສັນຍານບອກວ່າ ຂະແໜງສາທາລະນະສຸກສາມາດຄວບຄຸມສະຖານະການໄດ້ ແລະ ນັ້ນກໍຖືວ່າໂຄວິດຈະກາຍເປັນພະຍາດປະຈຳຖິ່ນ ຫຼື ພະຍາດຕາມລະດູ ຄືກັບໄຂ້ຫວັດ, ດັ່ງນັ້ນ ລັດຖະບານຫຼາຍປະ ເທດ ລວມທັງ ສປປ ລາວ ຈິ່ງພະຍາຍາມຫຼຸດຜ່ອນມາດຕະການເພື່ອຟື້ນຟູເສດຖະກິດ ໂດຍໃຫ້ຄວາມສຳຄັນຕໍ່ການສັກວັຄຊີນເພື່ອສ້າງພູມຄຸ້ມກັນໃຫ້ປະຊາຊົນ.

            ມາດຕະການຜ່ອນຄາຍອັນດັບຕົ້ນແມ່ນ ເຫັນດີໃຫ້ມີການຜ່ອນຜັນໄລຍະເວລາການຈໍາກັດບໍລິເວນຕໍ່ແຕ່ລະເປົ້າໝາຍຜູ້ທີ່ຈະເດີນທາງເຂົ້າມາ ສປປ ລາວ ເຊັ່ນ ຄະນະຜູ້ແທນ ຫຼື ທີມງານວິຊາການທຸກລະດັບ ທີ່ໄປເຄື່ອນໄຫວເຮັດວຽກ ລວມທັງໄປສໍາມະນາຢູ່ຕ່າງປະເທດ ແລະ ພົນລະເມືອງລາວທີ່ກັບມາຈາກຕ່າງປະເທດ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງເພື່ອກວດຫາເຊື້ອພະຍາດ COVID-19 ດ້ວຍເຄື່ອງກວດ RT-PCR, ເຂົ້າພັກກັກກັນຕົວຢູ່ສະຖານທີ່ ທີ່ຄະນະສະເພາະກິດກຳນົດໄວ້ ເພື່ອລໍຖ້າຜົນກວດບໍ່ເກີນ 48 ຊົ່ວໂມງ ແລະ ຖ້າຜົນກວດບໍ່ພົບເຊື້ອກໍຕ້ອງ ສືບຕໍ່ຈໍາກັດບໍລິເວນຢູ່ສະຖານທີ່ພັກເຊົາຂອງຕົນໃຫ້ຄົບ 7 ວັນ ພ້ອມທັງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອຢ່າງເຂັ້ມງວດ; ຊຶ່ງຂໍ້ກໍານົດດັ່ງກ່າວນັ້ນ ແມ່ນໃຫ້ປະຕິບັດທັງນັກການທູດ, ນັກລົງທຶນຕ່າງປະເທດທີ່ເຂົ້າມາໃນລາວ, ນັກສຶກສາ ແລະ ແຮງງານຕ່າງປະເທດ.

            ສຳລັບນັກທ່ອງທ່ຽວເປັນກຸ່ມ ທີ່ຈະເດີນທາງເຂົ້າມາລາວ ພາຍໃຕ້ໂຄງການເສັ້ນທາງທ່ອງທ່ຽວສີຂຽວ, ເມື່ອມາເຖິງ ສປປ ລາວ ຕ້ອງໄດ້ເກັບຕົວຢ່າງ ເພື່ອກວດຫາເຊື້ອພະຍາດ COVID-19 ດ້ວຍເຄື່ອງກວດ RT-PCR, ເຂົ້າພັກຢູ່ໂຮງແຮມ ທີ່ຄະນະສະເພາະກິດໄດ້ກຳນົດໄວ້ ເພື່ອລໍຖ້າຜົນກວດບໍ່ເກີນ 48 ຊົ່ວໂມງ ແລະ ຖ້າຜົນກວດບໍ່ພົບເຊື້ອ ຈຶ່ງອະນຸຍາດ ໃຫ້ອອກໄປເຄື່ອນໄຫວກິດຈະກຳຕາມແຜນທ່ອງທ່ຽວ ແຕ່ຕ້ອງໃສ່ອຸປະກອນຕິດຕາມທາງການແພດ, ພ້ອມທັງປະຕິບັດມາດຕະການປ້ອງກັນ ແລະ ຄວບຄຸມການຕິດເຊື້ອຢ່າງເຂັ້ມງວດ.

ເຫັນດີໃຫ້ເປີດກີລາໃນຮົ່ມ ແລະ ກາງແຈ້ງທຸກປະເພດ, ແຕ່ໃຫ້ເຈົ້າຂອງສະຖານທີ່ມີມາດຕະການປ້ອງກັນ ແລະ ຄວບຄຸມຢ່າງເຂັ້ມງວດ. ໃຫ້ອົງການປົກຄອງທ້ອງຖິ່ນທຸກຂັ້ນອະນຸຍາດ ແລະ ອໍານວຍຄວາມສະດວກ ໃຫ້ແກ່ບໍລິການລົດໂດຍສານ, ຜູ້ໂດຍສານ, ຜູ້ເດີນທາງດ້ວຍພາຫະນະໄປ-ມາລະຫວ່າງແຂວງຕໍ່ແຂວງ, ເມືອງຕໍ່ເມືອງໄດ້ຢ່າງປົກກະຕິ, ແຕ່ພະນັກງານຂັບລົດ ແລະ ຜູ້ ໂດຍສານຕ້ອງໄດ້ຮັບການສັກວັຄຊີນຄົບໂດສ. ທີ່ສຳຄັນແມ່ນປິດຮ້ານບັນເທີງ ແລະ ຮ້ານຄາຣາໂອເກະ.

 

แชร์