ປ່າໄມ້ພາກໃຕ້ລາວຫຼາຍກວ່າ 3,7 ພັນເຮັກຕາ ໄດ້ຮັບການຟື້ນຟູ

ໂຄງການຄຸ້ມຄອງທີ່ດິນ ແລະ ປ່າໄມ້ແຫ່ງຊາດແບບຍືນຍົງຢູ່ໃນລະບົບນິເວດປ່າໂຄກພາກໃຕ້ ສປປ ລາວ ທີ່ດໍາເນີນມາເປັນເວລາ 6 ປີ, ໃນນັ້ນໄດ້ປະກາດເຂດປ່າສະຫງວນແຫ່ງຊາດແຫ່ງໃໝ່ (ເຂດອະນຸຮັກປ່າໂຄກ ໂອງ-ມັ່ງ ແຫ່ງຊາດ) ກວມເອົາເນື້ອທີ່ທັງໝົດ 130.745 ເຮັກຕາ. ຄຽງຄູ່ກັນນັ້ນ, ຍັງສາມາດຟື້ນຟູປ່າໄມ້ໃນພື້ນທີ່ກວ່າ 3.788 ເຮັກຕາ ໂດຍການປູກປ່າທົດແທນໃນເນື້ອທີ່ 768 ເຮັກຕາ ແລະ ຈັດສັນພື້ນທີ່ປ່າຟື້ນຟູແບບທຳມະຊາດ 3.020 ເຮັກຕາ.

ໝາກຜົນດັ່ງກ່າວເປີດເຜີຍໂດຍກະຊວງກະສິກຳ ແລະ ປ່າໄມ້ ແລະ ອົງການສະຫະປະຊາຊາດເພື່ອການພັດທະນາ (UNDP) ຕໍ່ກອງປະຊຸມສະຫຼຸບຜົນໄດ້ຮັບໃນການຈັດຕັ້ງປະຕິບັດກິດຈະກຳຂອງໂຄງການຄຸ້ມຄອງທີ່ດິນ ແລະ ປ່າໄມ້ແຫ່ງຊາດແບບຍືນຍົງ ຢູ່ໃນລະບົບນິເວດປ່າໂຄກພາກໃຕ້ ສປປ ລາວ ປະຈຳປີ 2021 ແລະ ລາຍງານຜົນການປະເມີນໂຄງການຊຶ່ງຈັດຂຶ້ນເມື່ອວັນທີ 3 ກຸມພາ 2022 ທີ່ເມືອງຊົນນະບູລີ ແຂວງສະຫວັນນະເຂດ.

ສຳລັບໂຄງການອະນຸຮັກລະບົບນິເວດປ່າໂຄກ, ໂດຍຜູ້ຈັດຕັ້ງປະຕິບັດໂຄງການໄດ້ພະຍາຍາມຈັດການກັບໄພຄຸກຄາມຢູ່ 2 ໝວດໝູ່ທີ່ສົ່ງຜົນກະທົບຕໍ່ຄວາມຫຼາກຫຼາຍດ້ານຊີວະນາໆພັນ ແລະ ລະບົບນິເວດໃນແຂວງສະຫວັນນະເຂດ, ໂດຍສະເພາະແມ່ນການປ່ຽນແປງ ແລະ ການເສື່ອມໂຊມ ຂອງແຫຼ່ງທີ່ຢູ່ອາໄສ ແລະ ລະບົບນິເວດທາງທຳມະຊາດ ແລະ ການນຳໃຊ້ຊັບພະຍາກອນຊີວະພາບ ທາງທຳມະຊາດແບບເກີນຂະໜາດ.

ໂດຍໂຄງການໄດ້ເນັ້ນໃສ່ການນຳສະເໜີແນວທາງແກ້ໄຂໃນໄລຍະຍາວ ດ້ວຍການອຳນວຍຄວາມສະດວກໃນການປ່ຽນແປງໄປສູ່ການຈັດການທີ່ດິນ ແລະ ປ່າໄມ້ແບບຍືນຍົງໃນພື້ນທີ່ປ່າໂຄກ 5 ຕົວເມືອງຂອງແຂວງສະຫວັນນະເຂດ, ຊຶ່ງມີຜູ້ໄດ້ຮັບຜົນປະໂຫຍດຈາກໂຄງການໂດຍກົງກວ່າ 9.000 ຄົນ, ໂດຍສ່ວນໃຫຍ່ແມ່ນມາຈາກຊຸມຊົນໃນແຕ່ລະບ້ານຊຶ່ງຕັ້ງຢູ່ໃນຂອບເຂດພື້ນທີ່ໂຄງການ ແລະ 43 ຊຸມຊົນ ກໍໄດ້ມີສ່ວນຮ່ວມໃນການວາງແຜນຈັດການພື້ນທີ່ປ່າໄມ້, ວຽກງານລາດຕະເວນໃນເຂດຫວງຫ້າມ ແລະ ຄວາມພະຍາຍາມໃນວຽກງານຟື້ນຟູປ່າໄມ້, ໂຄງການນີ້ຈະສຳເລັດໃນເດືອນພຶດສະພາ 2022.

ທ່ານ ບຸນປອນ ແສງທອງ ຮັກສາການຫົວໜ້າກົມປ່າໄມ້, ໄດ້ກ່າວວ່າ “ສິ່ງທີ່ທາງໂຄງການອະນຸຮັກລະບົບນິເວດປ່າໂຄກ ໄດ້ຈັດຕັ້ງປະຕິບັດສຳເລັດປະກອບມີ: ກິດຈະກໍາແນວທາງປະຕິບັດທີ່ເປັນລະດັບສາກົນເຊັ່ນ ສັນຍາອະນຸຮັກຊຸມຊົນ, ຊຶ່ງເປັນສິ່ງທີ່ຍັງບໍ່ເຄີຍມີມາກ່ອນໃນແຂວງສະຫວັນນະເຂດ, ໂດຍທຸກຄົນໄດ້ມີສ່ວນຮ່ວມທັງໃນລະດັບຂັ້ນເມືອງ ແລະ ຊຸມຊົນ ຜ່ານການຮຽນຮູ້ຢ່າງຫຼວງຫຼາຍ ເຮັດໃຫ້ສາມາດປົກປັກຮັກສາປ່າໄມ້ໄດ້ດີຂຶ້ນ. ແຕ່ເພື່ອໃຫ້ສາມາດສືບຕໍ່ແນວທາງທີ່ໂຄງການອະນຸຮັກລະບົບນິເວດປ່າໂຄກໄດ້ສ້າງຂຶ້ນມາ, ກໍຈຳເປັນຕ້ອງໄດ້ມີງົບປະມານທາງດ້ານການເງິນ”.

ຂະນະທີ່ ທ່ານ ນາງ ແຄດເທີຣິນ ເຟືອງ (Catherine Phuong) ຮອງຜູ້ຕາງໜ້າອົງການ UNDP ປະຈຳລາວ, ກໍໄດ້ກ່າວວ່າ “ໃນໄລຍະ 6 ປີຜ່ານມາ, ໂຄງການອະນຸຮັກລະບົບນິເວດປ່າໂຄກ ໄດ້ໃຫ້ການສະໜັບສະໜູນລັດຖະບານ ສປປ ລາວ ໃນດ້ານຈັດການຄຸ້ມຄອງເຂດພື້ນທີ່ປ່າສະຫງວນພາຍໃນພື້ນທີ່ປ່າໂຄກ. ໂດຍການພັດທະນານະໂຍບາຍ, ກົດລະບຽບ ແລະ ກົນໄກການປະສານທີ່ຊັດເຈນ. ປັດຈຸບັນ, ຊັບພະຍາກອນທີ່ດິນ ແລະ ປ່າໄມ້ໃນເຂດເມືອງຊົນນະບູລີ, ພະລານໄຊ, ພີນ, ສອງຄອນ ແລະ ເມືອງທ່າປາງທອງລ້ວນໄດ້ຮັບການຈັດການທີ່ດີຂຶ້ນ ຊຶ່ງເປັນຜົນມາຈາກໂຄງການດັ່ງກ່າວ.

ໃນວາລະດຽວກັນ, ຜູ້ເຂົ້າຮ່ວມປະຊຸມກໍໄດ້ເຂົ້າຮ່ວມພິທີມອບ-ຮັບຕະຫຼາດຊຸມຊົນ ແກ້ວຄຳດີ ທີ່ສ້າງຂຶ້ນໂດຍໂຄງການອະນຸຮັກລະບົບນິເວດປ່າໂຄກ, ຕະຫຼາດແຫ່ງນີ້ຕັ້ງຢູ່ໃກ້ກັບເຂດອະນຸຮັກປ່າໂຄກໂອງ-ມັ່ງ ແຫ່ງຊາດ, ໄດ້ຮັບໃຊ້ 10 ໝູ່ບ້ານພາຍໃນ ແລະ ອ້ອມຂ້າງເຂດອະນຸຮັກ ທີ່ເຂົ້າມາຂາຍຜົນຜະລິດກະສິກຳທ້ອງຖິ່ນ ແລະ ຜະລິດຕະພັນຈາກການເກັບເຄື່ອງປ່າຂອງດົງແບບຍືນຍົງ, ຊຶ່ງເປັນການຊ່ວຍຫຼຸດຜ່ອນຄວາມກົດດັນຈາກການຕັດໄມ້ແບບຜິດກົດໝາຍ ແລະ ການຫັນປ່ຽນພື້ນທີ່ປ່າໄມ້ເປັນພື້ນທີ່ກະສິກຳແບບບໍ່ຍືນຍົງ.

แชร์