ໝາກຜົນຂອງການພັດທະນາແຂວງບໍ່ແກ້ວ ໃນປີ 2021

ໃນປີຜ່ານມາ, ເຖິງແມ່ນວ່າແຂວງບໍ່ແກ້ວຈະປະສົບກັບຫຼາຍບັນຫາທ້າທາຍ, ແຕ່ດ້ວຍຄວາມເອົາໃຈໃສ່ບຸກບືນຢ່າງຕັ້ງໜ້າຂອງຄະນະນຳແຂວງ ແລະ ແຮງສະໜັບສະໜູນຂອງບັນດາພະແນກການ, ບວກກັບພະລັງສາມັກຄີຂອງພໍ່ແມ່ປະຊາຊົນພາຍໃນແຂວງ ຈິ່ງເຮັດໃຫ້ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 5 ປີ ຄັ້ງທີ IX ຂອງລັດຖະບານ ກໍຄືຂອງແຂວງ ປະສົບຄວາມສຳເລັດຫຼາຍດ້ານ, ເຮັດໃຫ້ແຂວງບໍ່ແກ້ວສືບຕໍ່ມີສະຖຽນລະພາບທາງດ້ານການເມືອງ ແລະ ສັງຄົມມີຄວາມສະຫງົບໂດຍພື້ນຖານ.

ທ່ານ ບົວຄົງ ນາມມະວົງ ກຳມະການສູນກາງພັກ ເລຂາພັກແຂວງ ເຈົ້າແຂວງບໍ່ແກ້ວ, ໄດ້ລາຍງານກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດປະຈໍາປີ 2021 ຕໍ່ກອງປະຊຸມສະໄໝສາມັນເທື່ອທີ 2 ຂອງສະພາປະຊາຊົນແຂວງຊຸດທີ II ຊຶ່ງຈັດຂຶ້ນເມື່ອວັນທີ 2 ກຸມພາ 2022 ວ່າ: ໄດ້ເອົາໃຈໃສ່ຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຂອງແຂວງ ເຮັດໃຫ້ລວມຍອດຜະລິດຕະພັນພາຍໃນບັນລຸໄດ້ 3.429,61 ຕື້ກີບ, ເສດຖະກິດຂະຫຍາຍຕົວຢູ່ໃນລະດັບ 3,2% ທຽບໃສ່ແຜນການຫຼຸດຄາດໝາຍ 1,8%, ລາຍຮັບສະເລ່ຍຕໍ່ຫົວຄົນໄດ້ 1.545,94 ໂດລາສະຫະລັດຕໍ່ຄົນຕໍ່ປີ. ປະຕິບັດການລົງທຶນຂອງລັດທີ່ສະພາແຫ່ງຊາດຮັບຮອງທັງໝົດ 114 ໂຄງການ ມູນຄ່າ 15.821,14 ລ້ານກີບ, ໃນນັ້ນ ສໍາເລັດ 96 ໂຄງການ ມູນຄ່າ 7.844,31 ລ້ານກີບ ກໍາລັງຈັດຕັ້ງປະຕິບັດ 15 ໂຄງການ. ດ້ານລາຍຮັບປະຕິບັດໄດ້ 336,25 ຕື້ກີບ ເທົ່າກັບ 82%, ດ້ານລາຍຈ່າຍທົ່ວແຂວງປະຕິບັດໄດ້ 285,48 ຕື້ກີບ, ເທົ່າກັບ 98,26% ຂອງແຜນການປີ.

ໂດຍຄະນະນຳແຂວງ ໄດ້ນຳພາບັນດາຂະແໜງການຊຸກຍູ້ຊາວກະສິກອນຜະລິດເຂົ້ານາປີ, ນາແຊງ, ປູກເຂົ້າໄຮ່, ຊຸກຍູ້ການປູກພືດສະບຽງອາຫານລະດູຝົນ ແລະ ລະດູແລ້ງ ຕິດພັນກັບການລ້ຽງ ສັດນ້ອຍ, ສັດໃຫຍ່ ແລະ ສົ່ງເສີມການລ້ຽງແບ້-ໝູ ແລະ ອື່ນໆ. ຊຸກຍູ້ສົ່ງເສີມວິສາຫະກິດຂະໜາດນ້ອຍ, ຂະໜາດກາງ ໃຫ້ມີຈໍານວນເພີ່ມຂຶ້ນທັງປະລິມານ ແລະ ຄຸນນະພາບ, ໄດ້ມອບໃບອະນຸຍາດນໍາໃຊ້ກາໝາຍໜຶ່ງເມືອງໜຶ່ງຜະລິດຕະພັນແຫ່ງຊາດ ໃຫ້ສອງຜະລິດຕະພັນເປັນສິນຄ້າໂອດ໊ອບ ແລະ ອື່ນໆ.

ໄດ້ປັບປຸງກໍ່ສ້າງໂຄງລ່າງພື້ນຖານເຊັ່ນ: ການພັດທະນາຕົວເມືອງຫ້ວຍຊາຍ, ກໍ່ສ້າງປັບປຸງທ່າເຮືອຂອນແກ້ວ, ປ້ອງກັນຕາຝັ່ງເຈື່ອນ ແລະ ທາງຍ່າງລຽບແຄມຂອງ; ໂຄງການກໍ່ສ້າງສວນສາທາລະນະໜອງຖານ; ກໍ່ສ້າງທາງຊອຍ, ຮ່ອງລະບາຍນໍ້າໃນເທສະບານຫ້ວຍຊາຍໄດ້ສໍາເລັດເປັນສ່ວນໃຫຍ່. ໄດ້ສໍາຫຼວດວັດແທກຂຶ້ນທະບຽນອອກໃບຕາດິນໄດ້ຈໍານວນ 3.983 ຕອນ, ມີເນື້ອທີ່ທັງໝົດ 11.056,778 ຕາແມັດ, ໄດ້ຢັ້ງຢືນຮັບຮອງທາງດ້ານສິ່ງແວດລ້ອມໃຫ້ບັນດາໂຄງການພັດທະນາຕ່າງໆ ພ້ອມທັງໄດ້ສໍາຫຼວດເນື້ອທີ່ດິນໃນການປູກພືດກະສິກໍາຂອງບັນດາບໍລິສັດລົງທຶນພາຍໃນ ແລະ ຕ່າງປະເທດ, ທັງໄດ້ຕິດຕາມການແຈ້ງເຕືອນສະພາບອາກາດເປັນປົກກະຕິ. ໄດ້ຊຸກຍູ້ການກໍ່ສ້າງເຂື່ອນໄຟຟ້າ ແລະ ພັດທະນາແຫຼ່ງຜະລິດພະລັງງານໄຟຟ້າ, ປັດຈຸບັນທົ່ວແຂວງມີບ້ານທີ່ໄດ້ຊົມໃຊ້ໄຟຟ້າ 241 ບ້ານ ເທົ່າກັບ 97,18%, ຄົວເຮືອນທີ່ໄດ້ຊົມໃຊ້ໄຟຟ້າ 34.683 ຄົວເຮືອນ ເທົ່າກັບ 96,79%. ຂະຫຍາຍພື້ນຖານໂຄງລ່າງໄປສະນີ, ໂທລະຄົມມະນາຄົມໄປສູ່ເຂດຊົນນະບົດຫ່າງໄກສອກຫຼີກ ເຮັດໃຫ້ປະຊາຊົນບັນດາເຜົ່າໄດ້ຊົມໃຊ້ເຄືອຂ່າຍໂທລະສັບ ແລະ ອິນເທີຣ໌ເນ໊ຕຢ່າງກ້ວາງຂວາງ.

ສາມາດແກ້ໄຂບັນຫາຢາເສບຕິດ, ຂີ້ລັກງັດແງະ, ການລັກລອບເຂົ້າ-ອອກເມືອງແບບບໍ່ຖືກ ຕ້ອງ, ປັບປຸງກໍ່ສ້າງກໍາລັງ ປກຊ-ປກສ ໃນທົ່ວແຂວງໃຫ້ເຂັ້ມແຂງ, ທັງໄດ້ແກ້ໄຂການລັກລອບຂົນສົ່ງ ແລະ ຄ້າຂາຍເຖື່ອນໄດ້ທັງໝົດ 305 ເລື່ອງ ແລະ ຈັບຜູ້ຖືກຫາໄດ້ທັງໝົດ 261 ຄົນ.

ທົ່ວແຂວງມີບ້ານສາທາລະນະສຸກແບບຢ່າງ 227 ບ້ານ ກວມ 91,53%, ສ້າງຄອບຄົວວັດ ທະນະທໍາໃໝ່ໄດ້ 545 ຄອບຄົວ ລວມເປັນທັງໝົດ 26.301 ຄອບຄົວ ເທົ່າກັບ71%, ສ້າງບ້ານວັດທະນະທໍາໃໝ່ໄດ້ 3 ບ້ານ ມີບ້ານວັດທະນະທໍາທັງໝົດ 195 ບ້ານ, ກຸ່ມບ້ານວັດທະນະທໍາ 11 ກຸ່ມບ້ານ, ຫັນເອົາພະນັກງານລົງກໍ່ສ້າງຮາກຖານການເມືອງ ຕາມ 4 ເນື້ອໃນ 4 ຄາດໝາຍ ຕິດພັນກັບວຽກງານ 3 ສ້າງ; ພ້ອມທັງຈັດຕັ້ງພະນັກງານຫຼັກແຫຼ່ງຂອງແຂວງ, ຂອງເມືອງລົງກໍ່ສ້າງຮາກຖານໃນ 22 ຈຸດສຸມພັດທະນາຂອງແຂວງ ແລະ ສຸມໃສ່ແກ້ໄຂປາກົດການຫຍໍ້ທໍ້ຕາມ 8 ແຜນວຽກ ຢູ່ 3 ເມືອງຄື: ຫ້ວຍຊາຍ, ຕົ້ນເຜິ້ງ ແລະ ຜາອຸດົມ ໃນ 24 ບ້ານຈຸດສຸມ.

ຄຽງຄູ່ກັນນັ້ນ, ກໍໄດ້ຊຸກຍູ້ສົ່ງເສີມລູກຫຼານຂອງປະຊາຊົນບັນດາເຜົ່າໃຫ້ໄດ້ເຂົ້າຮຽນຕາມເກນອາຍຸ, ໄດ້ສໍາເລັດການມອບໂອນໂຮງຮຽນເທຄນິຄວິຊາຊີບ ມາຂຶ້ນໃນຄວາມຮັບຜິດຊອບຂອງແຂວງ. ເອົາໃຈໃສ່ຄຸ້ມຄອງ, ບໍລິຫານຕົວເມືອງໃຫ້ເຂົ້າສູ່ຄວາມເປັນລະບຽບຮຽບຮ້ອຍ ດ້ວຍການປົກປັກຮັກສາສິ່ງແວດລ້ອມ. ພ້ອມນັ້ນ, ອົງການປົກຄອງແຂວງ ກໍໄດ້ສໍາເລັດການສ້າງແຜນຜັນຂະຫຍາຍ ແລະ ແຜນດໍາເນີນງານການຈັດຕັ້ງປະຕິບັດວາລະແຫ່ງຊາດ ໃນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ແລະ ການແກ້ໄຂບັນຫາຢາເສບຕິດ ໄປພ້ອມກັບການປະຕິບັດຕົວຈິງຢູ່ພາຍໃນແຂວງບໍ່ແກ້ວ.

 

แชร์