ລາວ ແລະ FAO ເສີມສ້າງຄວາມສາມາດຄວບຄຸມພະຍາດລະບາດສັດ

ມາຮອດປັດຈຸບັນ, ພະຍາດອະຫິວາໝູແອຟຣິກາ ແມ່ນຍັງບໍ່ທັນໝົດໄປ, ດັ່ງນັ້ນ ກົມລ້ຽງສັດ ແລະການປະມົງ, ກະຊວງກະສິກຳ ແລະປ່າໄມ້ຮ່ວມກັບອົງການອາຫານ ແລະ ການກະເສດແຫ່ງສະຫະປະຊາຊາດ (FAO) ຈິ່ງໄດ້ເລີ່ມໂຄງການເສີມສ້າງຄວາມສາມາດເພື່ອຄວບຄຸມພະຍາດອະຫິວາໝູແອຟຣິກາ (ASF) ແລະ ພະຍາດລະບາດສັດຂ້າມແດນ ໃນ ສປປ ລາວ.

ເປົ້າໝາຍຂອງໂຄງການກໍເພື່ອໂຕ້ຕອບ ແລະ ຄວບຄຸມພະຍາດອະຫິວາໝູແອຟຣິກາ ທີ່ພົບໃນປະຊາກອນໝູ ແລະ ພະຍາດລະບາດສັດອື່ນໆ, ເພື່ອຫຼຸດຜ່ອນຄວາມສ່ຽງທີ່ອາດເປັນໄປໄດ້ໃນການນຳເຂົ້າ ແລະ ເກີດການລະບາດ, ເພື່ອປ້ອງກັນຜົນກະທົບຈາກພະຍາດ ASF ແລະ ພະຍາດລະບາດສັດຂ້າມແດນທີ່ຈະກໍ່ໃຫ້ເກີດຄວາມເສຍຫາຍແກ່ ສປປ ລາວ ແລະ ເພື່ອຈັດຕັ້ງປະຕິບັດຍຸດທະສາດ ແລະ ເສີມສ້າງຄວາມສາມາດເພື່ອປ້ອງກັນ, ຄົ້ນຫາ ແລະ ຄວບຄຸມພະຍາດ ASF ໃນລະດັບປະເທດ, ລະດັບແຂວງ ແລະ ລະດັບເມືອງ ລວມທັງຫ້ອງວິໄຈແຫ່ງຊາດ.

ພະຍາດອະຫິວາໝູແອຟຣິກາ ເປັນພະຍາດເລືອດອອກຮ້າຍແຮງໃນໝູລ້ຽງ ແລະ ໝູປ່າ, ຊຶ່ງໃນທະວີບເອເຊຍແມ່ນພົບການລະບາດຄັ້ງທຳອິດໃນເດືອນສິງຫາ 2018 ກວມເອົາ 16 ປະເທດໃນເຂດເອເຊຍ-ແປຊີຟິກ, ໂດຍມີລາຍງານການລະບາດຂອງພະຍາດ ASF ໃນຈີນ, ມອງໂກເລຍ, ຫວຽດນາມ, ກຳປູເຈຍ, ສ.ເກົາຫຼີ, ຕິມໍຣ໌ເລສເຕ, ອິນໂດນີເຊຍ, ປາປົວນິວກິນີ, ອິນເດຍ, ພູຖານ, ມາເລເຊຍ ແລະ ໄທ. ພະຍາດດັ່ງກ່າວແພ່ເຊື້ອ ແລະ ຕິດຕໍ່ຢ່າງຮຸນແຮງ, ເຮັດໃຫ້ໝູຫຼາຍລ້ານໂຕໃນພາກພື້ນຕາຍໄປ, ສ້າງຄວາມເສຍຫາຍຢ່າງໜັກໜ່ວງ; ຕາມມາດ້ວຍບັນຫາຂາດແຄນຊີ້ນໝູໃນຫຼາຍປະເທດ, ເຮັດໃຫ້ລາຄາໝູແພງຂຶ້ນ, ລະບົບຕ່ອງໂສ້ການສະໜອງ ລວມທັງການນໍາເຂົ້າ-ສົ່ງອອກໝູທີ່ມີຊີວິດ ແລະ ຊີ້ນໝູຖືກຂັດຂວາງ, ຊຶ່ງໄດ້ເພີ່ມຄວາມອ່ອນແອໃນການສະໜອງອາຫານຢ່າງຫຼີກເວັ້ນບໍ່ໄດ້.

ສຳລັບປະເທດເຮົາ ກົມລ້ຽງສັດ ແລະ ການປະມົງ, ໄດ້ລາຍງານຄັ້ງທໍາອິດກ່ຽວກັບການລະບາດຂອງພະຍາດອະຫິວາໝູແອຟຣິກາຢູ່ທຸກແຂວງໃນປີ 2019, ເຮັດໃຫ້ໝູຕາຍປະມານ20.000 ໂຕ ແລະ 6.000 ໂຕຖືກຂ້າເພື່ອຈຳກັດການແພ່ເຊື້ອ.

ທ່ານ ນາຊາຣ໌ ຮາຢັດ ຜູ້ຕາງໜ້າອົງການ FAO ປະຈຳ ສປປ ລາວ, ໄດ້ກ່າວວ່າ: ອົງການ FAO ໄດ້ຊ່ວຍເຫຼືອກົມລ້ຽງສັດ ແລະ ການປະມົງ ພັດທະນາຄູ່ມືເພື່ອໂຕ້ຕອບການລະບາດຂອງພະຍາດອະຫິວາໝູແອຟຣິກາ ແລະ ໄດ້ສະໜັບສະໜູນການເພີ່ມຂີດຄວາມສາມາດຂອງຫ້ອງວິໄຈພະຍາດແກ່ກົມລ້ຽງສັດ ແລະ ການປະມົງ ເພື່ອກວດຫາພະຍາດ ASF, ສະໜັບສະໜູນດ້ານວິຊາການ ແລະ ອຸປະກອນການສື່ສານຄວາມສ່ຽງຕ່າງໆ, ຊຶ່ງໃນປີ 2021 ກົມລ້ຽງສັດ ແລະ ການປະມົງ, ກໍໄດ້ດຳ ເນີນການຝຶກອົບຮົມຄູຝຶກຂັ້ນແຂວງ ໃນການກວດຫາພະຍາດອະຫິວາໝູແອຟຣິກາ ແລະ ການໂຕ້ຕອບສຸກເສີນໃນ 17 ແຂວງ.

แชร์