ຄອບຄົວການນຳ ແລະ ສະຫະພັນແມ່ຍິງ ຫສນຍ ຢ້ຽມຢ້າມກອງພົນທະຫານຮາບທີ 1

ນຳພາຄະນະຄອບຄົວການນຳ ແລະ ສະຫະພັນແມ່ຍິງ ຫ້ອງວ່າການສຳນັກງານນາຍົກລັດຖະ ມົນຕີ (ຫສນຍ) ເຄື່ອນໄຫວຢ້ຽມຢາມ ແລະ ນຳເຄື່ອງອຸປະໂພກ-ບໍລິໂພກໄປມອບໃຫ້ກອງພົນທະ ຫານຮາບທີ 1 ທີ່ເມືອງວັງວຽງ ແຂວງວຽງຈັນ, ໂດຍທ່ານ ນາງ ສີຈັນ ວິພາວັນ ພັນລະຍານາຍົກ ລັດຖະມົນຕີ, ມີ ພົຈວ ພູມີ ດາລາເພັດ ຄະນະພັກກະຊວງປ້ອງກັນປະເທດ ຮອງຫົວໜ້າກົມໃຫຍ່ການ ເມືອງກອງທັບ, ພັນເອກ ວົງຈັນ ພັນຈັນທະມານ ເລຂາຄະນະພັກ ຫົວໜ້າການເມືອງກອງພົນທະ ຫານຮາບທີ 1, ພ້ອມດ້ວຍຄະນະພັກ-ຄະນະນຳ, ນາຍ ແລະ ພົນທະຫານພາຍໃນກອງພົນທະຫານຮາບທີ 1 ໃຫ້ການຕ້ອນຮັບ.

ການເຄື່ອນໄຫວຢ້ຽມຢາມ ແລະ ມອບເຄື່ອງຊ່ວຍເຫຼືອເມື່ອວັນທີ 2 ກຸມພາ 2022 ຂອງຄະນະຄອບຄົວການນຳກໍເພື່ອຊຸກຍູ້, ໃຫ້ກຳລັງໃຈນາຍ ແລະ ພົນທະຫານ ທີ່ກຳລັງປະຕິບັດໜ້າທີ່ປ້ອງກັນຊາດ-ປ້ອງກັນສະຫງົບ ຢູ່ເຂດຫຍຸ້ງຍາກຫ່າງໄກສອກຫຼີກ ແລະ ທຸລະກັນດານ, ພ້ອມນີ້ກໍເພື່ອອວຍພອນເນື່ອງໃນໂອກາດສະເຫຼີມສະຫຼອງວັນສ້າງຕັ້ງກອງທັບປະຊາຊົນລາວ ຄົບຮອບ 73 ປີ.

ສຳລັບເຄື່ອງທີ່ນຳໄປມອບໃນຄັ້ງນີ້ປະກອບມີ: ເຄື່ອງອຸປະໂພກ- ບໍລິໂພກ, ຢາສາມັນປະຈຳເຮືອນ ແລະເງິນສົດ ລວມມູນຄ່າທັງໝົດ 150 ລ້ານກວ່າກີບ. ໃນໂອກາດດຽວກັນ, ທັງຄະນະກໍໄດ້ໄປຢ້ຽມຊົມຫໍມູນເຊື້ອ ແລະຢ້ຽມຢາມບັນດາກົມກອງຂອງກອງພົນທະຫານທີ 1 ອີກດ້ວຍ.

ທັງນີ້, ຫົວໜ້າການເມືອງກອງພົນທະຫານຮາບທີ 1 ໄດ້ລາຍງານຫຍໍ້ກ່ຽວກັບປະຫວັດຄວາມເປັນມາ ແລະພາລະບົດບາດໜ້າທີ່ຂອງກອງພົນທະຫານຮາບທີ 1 ທີ່ມີມູນເຊື້ອສູ້ຮົບພິລາດອາດຫານໃນສະໄໝສົງຄາມປົດປ່ອຍຊາດ, ເຄີຍຕີເອົາຊະນະສັດຕູໃນຫຼາຍບັ້ນຮົບ. ປັດຈຸບັນ, ກົມກອງໄດ້ຈັດຕັ້ງປະຕິບັດ 4 ໜ້າທີ່ 26 ແຜນງານທີ່ຄະນະພັກກະຊວງປ້ອງກັນປະເທດວາງອອກ, ໂດຍສະເພາະແມ່ນການຮັກສາຄວາມສະຫງົບ, ການປັບປຸງກໍ່ສ້າງກຳລັງ, ການພົວພັນຮ່ວມມືກັບກົມກອງເພື່ອນທັງພາຍໃນ ແລະສາກົນ.

แชร์