ຕົວເລກຕາຍເພາະໂຄວິດເພີ່ມຂຶ້ນ ຂະນະທີ່ຫຼາຍປະເທດເລີ່ມຜ່ອນຄາຍການປ້ອງກັນ

ຂະນະນີ້, ຫຼາຍປະເທດທົ່ວໂລກເລີ່ມຜ່ອນຄາຍມາດຕະການປ້ອງກັນໂຄວິດ ເຫັນໄດ້ຈາກການທີ່ຜູ້ຄົນກັບມາໃຊ້ຊີວິດຕາມປົກກະຕິ, ເປັນຕົ້ນກໍແມ່ນການປາຣ໌ຕີ້-ສັງສັນ ທີ່ເຮັດໃຫ້ຄົນສ່ວນຫຼາຍຕ້ອງຖອດໜ້າກາກອະນາໄມ ແລະ ໃກ້ຊິດກັນຈົນໜ້າກັງວົງໃຈ; ຢ່າງໃດກໍຕາມ,ສະຖານະການໂຄວິດທີ່ຫຼາຍຄົນຄິດວ່າຜ່ອນຄາຍລົງແລ້ວ; ແຕ່ໃນທາງກັບກັນກໍມີການຢືນຢັນສະຖິຕິການຕາຍຂອງຜູ້ຕິດເຊື້ອທີ່ເພີ່ມຂຶ້ນເຖິງ 9%.

ສຳນັກຂ່າວຕ່າງປະເທດ ໄດ້ລາຍງານໃນວັນທີ 3 ກຸມພາ 2022 ວ່າ: ອົງການອະນາໄມໂລກ (WHO) ມີຄວາມກັງວົນຢ່າງຍິ່ງຕໍ່ການຖືເບົາຂອງຄົນສ່ວນໃຫຍ່, ເພາະໃນເວລານີ້ ຫຼາຍປະເທດພວມຫັນກັບມາໃຊ້ຊີວິດປົກກະຕິ (ແຕ່ບໍ່ແມ່ນປົກກະຕິແບບໃໝ່) ເນື່ອງຈາກພຶດຕິກຳປະໝາດໃນລິດຂອງໄວຣັສໂຄວິດ-19, ດ້ວຍຄິດວ່າຕົນເອງມີພູມຄຸ້ມກັນພໍທີ່ຈະສູ້ຢັນກັບເຊື້ອຮ້າຍໂຕນີ້ໄດ້. ທັງນີ້, ຫາກສັງເກດສະຖິຕິການຕາຍໃນປັດຈຸບັນຈາກການຕິດເຊື້ອໂຄວິດກໍຄິດເປັນຕົວເລກທີ່ເພີ່ມຂຶ້ນເຖິງ 9% ໄປຢູ່ທີ່ 59.000 ລາຍ ໃນສັບປະດາສຸດທ້າຍຂອງເດືອນມັງກອນ 2022.

ລາຍງານຂ່າວດຽວກັນໄດ້ຢໍ້າເຖິງທັດສະນະທີ່ເປັນກັງວົນຂອງອົງການອະນາໄມໂລກ,ທ່າມກາງທີ່ຫຼາຍປະເທດພວມພິຈາລະນາຜ່ອນຄາຍມາດຕະການຢ່າງລະມັດລະວັງ; ແຕ່ໃນນັ້ນ,ກໍມີຫຼາຍປະເທດທີ່ຖືເບົາເກີນໄປ. ໂດຍ WHO ໄດ້ລະບຸວ່າ: ຫາກຜູ້ຄົນໃນປະເທດມີພູມຄຸ້ມກັນສູງ, ປະເທດເຫຼົ່ານັ້ນມີລະບົບສາທາລະນະສຸກທີ່ເຂັ້ມແຂງ ແລະ ທ່າອ່ຽງການແພ່ລະບາດໄປໃນທິດທາງທີ່ເບົາບາງລົງ; ເຖິງແມ່ນວ່າຈະເປັນແນວນັ້ນ,  ແຕ່ເມື່ອສັງເກດຕົວເລກການຕິດເຊື້ອລາຍໃໝ່ໃນອາທິດສຸດທ້າຍຂອງເດືອນມັງກອນ 2022 ກໍຍັງຢູ່ໃນລະດັບດຽວກັນກັບອາທິດກ່ອນໜ້ານີ້, ອີກທັງຕົວເລກຜູ້ເສຍຊີວິດຈາກການຕິດເຊື້ອກໍເພີ່ມຂຶ້ນ 9% ເຖິງຈະຖືວ່າເປັນສະຖານະການປົກກະຕິເພາະການເສຍຊີວິດນັ້ນໆເກີດຂຶ້ນຕາມຫຼັງການຕິດເຊື້ອ; ແຕ່ນັ້ນກໍຄືຮູບປະທຳຂອງການສູນເສຍທີ່ເກີດຂຶ້ນຈາກລິດຂອງໄວຣັສຮ້າຍທີ່ຫຼາຍປະເທດບໍ່ຄວນເບິ່ງຂ້າມ.

ຢ່າງໃດກໍຕາມ, ສະຖິຕິຫຼ້າສຸດທີ່ເປີດເຜີຍໃນເຊົ້າຂອງວັນທີ 3 ກຸມພາ 2022 ລະບຸຜູ້ຕິດເຊື້ອໂຄວິດ-19 ສະສົມທົ່ວໂລກຫຼາຍກວ່າ 370 ລ້ານຄົນ ແລະ ຕົວເລກຜູ້ເສຍຊີວິດມີຫຼາຍກວ່າ5,6 ລ້ານລາຍ.

แชร์