ຢໍ້າ! ໂອມິຄຣອນລ່ອງຫົນ ແພ່ເຊື້ອງ່າຍກວ່າສາຍພັນຍ່ອຍດັ້ງເດີມ

ກຳລັງເປັນທີ່ຕິດຕາມຂອງວົງການແພດ, ສຳລັບເຊື້ອໂອມິຄຣອນລ່ອງຫົນ ຊຶ່ງພົບຜູ້ຕິດເຊື້ອແລ້ວຢ່າງໜ້ອຍໃນ 57 ປະເທດ ໃນນັ້ນ, ກໍລວມທັງບາງພື້ນທີ່ຂອງທະວີບເອເຊຍ ແລະທະວີບຢຸໂຣປ. ຄວາມແຮງຂອງເຊື້ອນີ້ມີຄວາມອາດສາມາດກະຈາຍໄປໄວກວ່າສາຍພັນຍ່ອຍດັ້ງເດີມເຖິງ 33% ເປັນຕົ້ນກໍແມ່ນການລະບາດໃນກຸ່ມຜູ້ບໍ່ໄດ້ສັກວັຄຊີນ.

ເຊື້ອໂຄວິດ-19 ກາຍພັນສາຍພັນ ໂອມິຄຣອນ, ຖືກພົບຄັ້ງທຳອິດເມື່ອເດືອນພະຈິກ 2021ທີ່ແອຟຣິກາໃຕ້. ມາເຖິງຕອນນີ້, ໂອມິຄຣອນໄດ້ກາຍເປັນສາຍພັນຫຼັກທີ່ເຂົ້າມາແທນສາຍພັນເດລຕາ ແລະ ມັນກໍພວມລະບາດຢູ່ທົ່ວໂລກ. ໃນນັ້ນ,ສາຍພັນຍ່ອຍ BA.1 ຄິດເປັນຫຼາຍກວ່າ98% ຂອງການຕິດເຊື້ອໂອມິຄຣອນທົ່ວໂລກ; ແຕ່ຫາກວ່າຢູ່ປະເທດເດນມາຣ໌ກ ສາຍພັນຍ່ອຍBA.2 ຊຶ່ງກວດພົບເມື່ອຕົ້ນປີ 2022 ນີ້ ແລະມັນກໍຖືກຮຽກວ່າ “ໂອມິຄຣອນລ່ອງຫົນ” ໄດ້ກາຍເປັນສາຍພັນຍ່ອຍຫຼັກ, ທັງພົບຫຼາຍທີ່ສຸດນັບແຕ່ສັບປະດາທີສອງຂອງເດືອນມັງກອນປີນີ້ເປັນຕົ້ນມາ.ກ່ອນທີ່ຈະມີລາຍງານອອກມາວ່າ ພົບສາຍພັນດຽວກັນໃນອະເມຣິກາ, ອັງກິດ, ສະວີເດນ ແລະ ນໍເວຍ໌; ແຕ່ໃນປະເທດເຫຼົ່ານັ້ນກໍຍັງບໍ່ມີສັດສ່ວນແພ່ຫຼາຍເທົ່າໃນເດນມາຣ໌ກ.

ມີລາຍງານວ່າ: ນັກວິໄຈໄດ້ຂໍ້ສະຫຼຸບກ່ຽວກັບໂອມິຄຣອນ BA.2 ສາມາດແພ່ເຊື້ອໄດ້ງ່າຍກວ່າ BA.1 ແລະ ມັນຍັງມີຄວາມອາດສາມາດໃນການຫຼົບຫຼີກພູມຄຸ້ມກັນທີ່ຫຼຸດປະສິດທິພາບໃນການປ້ອງກັນຂອງວັຄຊີນຕໍ່ການຕິດເຊື້ອຫຼາຍກວ່າອີກດ້ວຍ, ຊຶ່ງຜູ້ຕິດເຊື້ອ BA.2 ມີໂອກາດແພ່ເຊື່ອສູ່ຄົນອື່ນໄດ້ເຖິງ 39% ພາຍໃນໜຶ່ງອາທິດ, ສ່ວນ BA.1 ມີໂອກາດແພ່ເຊື້ອ 29%. ຊຶ່ງການຕິດເຊື້ອ BA.2 ແມ່ນພົບຫຼາຍໃນກຸ່ມຄົນທີ່ບໍ່ໄດ້ສັກວັຄຊີນ. ຢ່າງໃດກໍດີ, ໃນກຸ່ມຄົນທີ່ສັກວັຄຊີນຄົບໂດສ ແລະ ໄດ້ສັກເຂັມກະຕຸ້ນ (ເຂັມ3) ມີໂອກາດໜ້ອຍທີ່ຈະຕິດເຊື້ອນີ້.

แชร์